جۋرناليستەر الدىندا ساياساتتانۋشىلار نۇربولات نىشانباي, نۇرگەلدى ابدىعاني ۇلى, قوعام قايراتكەرى دوس كوشىم جانە قوعام مۇشەسى بەكنۇر قىسىقوۆ پىكىر ءبىلدىردى. سپيكەرلەردىڭ ايتۋىنشا, تاۋەلسىز باقىلاۋشىلار توبىن قۇرۋ باستاماسى جاڭا كونستيتۋتسيا جوباسىنىڭ العاشقى نۇسقاسى جاريالانعان ساتتە كوتەرىلگەن. يدەيانى ساياساتتانۋشى نۇربولات نىشانباي ۇسىنعان, كەيىن بۇل ۇسىنىستى قوعامدىق بەلسەندىلەر مەن ازاماتتىق قوعام ساراپشىلارى قولداعان.
تۇركپا بايقاۋشىلارى: رەفەرەندۋمدا زاڭ بۇزۋشىلىقتار انىقتالعان جوق
باقىلاۋشىلاردىڭ نەگىزگى مىندەتى 15 ناۋرىز كۇنى وتكەن داۋىس بەرۋ راسىمىنە قوعامدىق باقىلاۋ جۇرگىزىپ, پروتسەستىڭ اشىقتىعىن قامتاماسىز ەتۋ جانە ىقتيمال زاڭبۇزۋشىلىقتاردىڭ الدىن الۋ ەدى. وسى ماقساتتا ءبىر اي بويى دايىندىق جۇرگىزىلىپ, ەلدىڭ ءار قالاسىنان ەرىكتىلەر تارتىلىپ, ارنايى وقىتۋ مەن نۇسقاۋلىقتار ۇيىمداستىرىلعان. قاتىسۋشىلارعا سايلاۋ زاڭناماسىنىڭ تالاپتارى مەن قوعامدىق باقىلاۋ قاعيدالارى تۇسىندىرىلگەن.
رەفەرەندۋم كۇنى «حالىق ءۇنى» توبىنىڭ شامامەن ەكى مىڭ باقىلاۋشىسى قازاقستاننىڭ 11 قالاسىنداعى ۋچاسكەلەردە جۇمىس ىستەدى. ولاردىڭ قاتارىندا الماتى, تاراز, تۇركىستان, ورال, قوناەۆ جانە تالدىقورعان قالالارى بار. باقىلاۋشىلار ۋچاسكەلەر اشىلعان ساتتەن باستاپ داۋىس بەرۋ اياقتالعانعا دەيىن قاتىسىپ, راسىمدەردىڭ ساقتالۋىن باقىلاپ, بارلىق دەرەكتى تىركەپ وتىرعان.
ساياساتتانۋشى نۇربولات نىشانبايدىڭ ايتۋىنشا, مۇنداي تاۋەلسىز باقىلاۋ باستامالارى قوعامداعى ساياسي مادەنيەتتى دامىتۋعا جانە ينستيتۋتتارعا دەگەن سەنىمدى كۇشەيتۋگە ىقپال ەتەدى. ونىڭ سوزىنشە, باقىلاۋ بارىسىندا جينالعان ۇسىنىستار مەن ەسكەرتۋلەر الداعى ۋاقىتتا تالدانىپ, ورتالىق رەفەرەندۋم كوميسسياسىنا جولدانادى.
سپيكەرلەردىڭ مالىمەتىنشە, ساراپشىلار جاساعان قورىتىندى جالپى العاندا ورتالىق رەفەرەندۋم كوميسسياسى جاريالاعان رەسمي اقپاراتپەن سايكەس شىققان. سونىمەن قاتار استانا, الماتى جانە شىمكەنت سياقتى ءىرى قالالارداعى ۋچاسكەلەردە تاۋەلسىز باقىلاۋشىلاردىڭ بولۋى قوعامدىق باقىلاۋدىڭ ماڭىزدى تەتىگىنە اينالعانى ايتىلدى. بۇل ءوز كەزەگىندە داۋىس بەرۋ ءراسىمىنىڭ اشىقتىعىن قامتاماسىز ەتىپ, ازاماتتاردىڭ ساياسي ناۋقانعا دەگەن سەنىمىن ارتتىرۋعا مۇمكىندىك بەرگەن.
ولجاس بەكتەنوۆ: ەل تاعدىرىنا قاتىستى تاريحي وقيعانىڭ كۋاگەرى بولدىق
كەزدەسۋ سوڭىندا توپ وكىلدەرى باستامانىڭ نەگىزگى ماقساتى قوعامنىڭ سايلاۋ راسىمىنە دەگەن سەنىمىن نىعايتىپ, ازاماتتىق قاتىسۋ مادەنيەتىن دامىتۋ ەكەنىن اتاپ ءوتتى. ءباسپاسوز كونفەرەنتسياسى قوعامدىق باقىلاۋدىڭ العاشقى قورىتىندىسىن جاريالاپ قانا قويماي, ماڭىزدى ساياسي پروتسەستىڭ اشىقتىعىن قامتاماسىز ەتۋدەگى ازاماتتىق قوعامنىڭ ءرولى تۋرالى پىكىر الماسۋعا ارنالعان الاڭعا اينالدى.
