تمد باقىلاۋشىلار ميسسياسىنىڭ جەتەكشىسى يگور پەتريشەنكونىڭ ايتۋىنشا, باقىلاۋشىلار ەلدە حالىقارالىق باقىلاۋ پرينتسيپتەرىن ساقتاي وتىرىپ, ەركىن جانە تاۋەلسىز جۇمىس ىستەگەن.
ول سونداي-اق ميسسيا قۇرامىندا 161 باقىلاۋشى اككرەديتتەلگەنىن اتاپ ءوتتى.
«ميسسيا جۇمىسى اشىق ءارى ءادىل بولدى. شتاب رەفەرەندۋمعا دايىندىق مونيتورينگى تۋرالى اقپاراتتىق حابارلامالاردى ۇنەمى تاراتتى. باق وكىلدەرىنە سۇحبات بەرىلدى. وسى ورايدا, ميسسيامىزدىڭ جۇمىسىن جان-جاقتى جانە كاسىبي قامتىعان بارلىق جۋرناليستەرگە العىسىمدى بىلدىرەمىن», دەدى ميسسيا باسشىسى.
تۇركى مەملەكەتتەرى ۇيىمىنىڭ باقىلاۋشىلارى: رەفەرەندۋم اشىق جانە زاڭعا سايكەس ءوتتى
تمد باقىلاۋشىلارىنىڭ باعالاۋىنشا, قازاقستاننىڭ زاڭنامالىق بازاسى دەموكراتيالىق داۋىس بەرۋگە قاجەتتى بارلىق شارتتاردى قامتاماسىز ەتەدى.
«رەفەرەندۋم وتكىزۋ زاڭناماسى حالىقارالىق قۇقىق نورمالارىنا ساي, جالپىعا تانىلعان پرينتسيپتەرگە سايكەس جۇرگىزىلدى. حالىق ەركىن جانە دەموكراتيالىق تۇردە داۋىس بەردى», دەدى پەتريشەنكو.
ونىڭ ايتۋىنشا, ورتالىق رەفەرەندۋم كوميسسياسى دا داۋىس بەرۋدى ۇيىمداستىرۋ ءۇشىن بارلىق قاجەتتى شارالاردى قابىلدادى.
«ورتالىق رەفەرەندۋم كوميسسياسى رەفەرەندۋمعا دايىندىقتى جوعارى دەڭگەيدە ۇيىمداستىردى. بارلىق دەڭگەيدەگى رەفەرەندۋم كوميسسيالارى, مەملەكەتتىك ورگاندار مەن باق حالىقتىق داۋىس بەرۋگە دايىندىق پەن ونى وتكىزۋ پروتسەسىن كەڭىنەن قامتىدى», دەدى پەتريشەنكو.
ميسسيا مالىمەتى بويىنشا, داۋىس بەرۋ كۇنى باقىلاۋشىلار جۇزدەگەن سايلاۋ ۋچاسكەسىندە بولدى.
«رەفەرەندۋم كۇنى ميسسيا وكىلدەرى قازاقستاننىڭ توعىز وڭىرىندە 750-دەن استام ۋچاسكەنى بارىپ باقىلادى. شەتەلدەگى ۋچاسكەلەردە دە باقىلاۋ جۇرگىزىلدى. ميسسيا مۇشەلەرىنىڭ حابارلاۋىنشا, سايلاۋ ۋچاسكەلەرى ۋاقىتىندا اشىلدى, داۋىس بەرۋ مەملەكەتتىك ءانۇراننىڭ ورىندالۋىمەن باستالدى جانە تىنىش ءوتتى», دەدى ميسسيا جەتەكشىسى.
يمران ساديحوۆ: باس حاتشىلىق رەفەرەندۋمنىڭ بەيبىت ءارى تارتىپپەن وتكەنىن جوعارى باعالايدى
سونىمەن قاتار, ول داۋىس ساناۋ كەزەڭى زاڭعا سايكەس جۇرگىزىلگەنىن اتاپ ءوتتى.
«داۋىس ساناۋ پروتسەدۋراسى زاڭعا سايكەس جۇزەگە اسىرىلدى. باقىلاۋشىلار تىركەگەن كەيبىر كەمشىلىكتەر تەحنيكالىق سيپاتتا بولىپ, ۋچاسكە كوميسسيالارى ارقىلى جەدەل تۇزەتىلدى», دەپ قورىتىندىلادى تمد باقىلاۋشىلار ميسسياسىنىڭ باسشىسى.
