پرەزيدەنتتىڭ پىكىرىنشە, بارلىق زاڭ تالاپتارى مەن دەموكراتيالىق نورمالار قاتاڭ ساقتالدى. مۇنى ەلىمىزدىڭ جانە شەتەلدىڭ بايقاۋشىلارى دا ايتىپ وتىر.
«ازاماتتار جاساعان تاڭداۋدىڭ تۇپكىلىكتى قورىتىندىسىن زاڭعا سايكەس ورتالىق رەفەرەندۋم كوميسسياسى رەسمي تارتىپپەن شىعارادى. بىراق قازىردىڭ وزىندە قازاقستان حالقى ىنتىماق پەن بىرلىكتىڭ, ءپاتريوتيزمنىڭ, وتان تاعدىرىنا ورتاق جاۋاپكەرشىلىكتىڭ كەرەمەت ۇلگىسىن كورسەتتى دەپ ايتا الامىز. ازاماتتارىمىزدىڭ باسىم بولىگى وركەندەۋ, ادىلەت, زاڭ مەن ءتارتىپ, تابيعاتتى ايالاۋ جانە تازالىق جولىن تاڭدادى. بۇل – وتە جاقسى جول. جاڭا حالىق كونستيتۋتسياسى ەلىمىزدى تىڭ جەتىستىكتەر مەن تابىستارعا باستايدى. بۇعان ەشقانداي كۇمان جوق. داۋىس بەرۋشىلەر سانى بويىنشا ەڭ جوعارى رەكوردتىق كورسەتكىش تىركەلدى. مۇنداي جاعداي كوپتەن بەرى بولماپ ەدى. ۋچاسكەگە كەلىپ, ازاماتتىق ۇستانىمىن انىق بىلدىرگەن بارشاعا العىس ايتامىن. وسى ارقىلى كۇللى الەمگە قازاق قوعامىنىڭ ساياسي مادەنيەتى جوعارى ەكەنىن پاش ەتتىك. «بىرلىك بار جەردە تىرلىك بار». بىرلىك بار جەردە وركەندەۋ بار. ەلدىڭ قۋاتى – بىرلىكتە. بىزگە تاتۋلىق پەن دوستىق, سابىرلىق پەن تاباندىلىق, جاسامپازدىق پەن ۇقىپتىلىق, ەڭبەكقورلىق پەن سەنىمدىلىك اۋاداي قاجەت. سوندا عانا وزىق, دامىعان, باسەكەگە قابىلەتتى ەل بولامىز», دەدى پرەزيدەنت.
مەملەكەت باسشىسىنىڭ ايتۋىنشا, قازاقستان حالقى قولداعان, جاپپاي داۋىس بەرگەن كونستيتۋتسيا – ەلىمىزدىڭ تەمىرقازىعى.
«جاڭا كونستيتۋتسيا – تاۋەلسىزدىك پەن ەگەمەندىك تىرەگى. اتا زاڭىمىز – ادام قۇقىعى مەن بوستاندىعىنىڭ مىزعىماس كەپىلى. ءبىز ءبىر ەل بولىپ زاڭ مەن ءتارتىپ ساقتالاتىن, جاۋاپتى جانە جاسامپاز ازاماتتارى بار ادىلەتتى قوعام قۇرۋ جولىندا ماڭىزدى قادام جاسادىق. وسىلايشا, بۇگىن ۇلت تاريحىنىڭ جاڭا پاراعىن اشتىق. الدا اۋقىمدى جۇمىستار كۇتىپ تۇر. ەڭ باستىسى, حالقىمىز تۇبەگەيلى وزگەرىستەردى بارىنشا قولدايدى. ءبىز ورتاق مۇددە جولىندا كۇش بىرىكتىرىپ, كەلەر ۇرپاققا وركەنيەتتى, وزىق قازاقستاندى امانات ەتەمىز. مەن بۇعان كامىل سەنەمىن. وسى رەفەرەندۋم كەزىندە جاستار بەلسەندى تۇردە سايلاۋعا قاتىستى. جاستارىمىزعا مىڭ دا ءبىر راقمەت! جاستارىمىزدىڭ داۋىسى, ءۇنى وتە جاقسى ەستىلدى. ارقاشان امان بولىڭىزدار! قازاق ەلىنىڭ قاسيەتتى تاۋەلسىزدىگى ماڭگى بولسىن! وتانىمىز – قازاقستان رەسپۋبليكاسى جاساي بەرسىن! جاڭا كونستيتۋتسيامىز قۇتتى بولسىن!», دەدى قاسىم-جومارت توقاەۆ.ايتا كەتەيىك, بۇعان دەيىن مەملەكەت باسشىسى رەسپۋبليكالىق رەفەرەندۋم اياسىنداعى ۇگىت-ناسيحات ناۋقانىنا بەلسەندى قاتىسقان جاستارمەن كەزدەسۋ بارىسىندا 15 ناۋرىز – كونستيتۋتسيا كۇنى بولىپ بەلگىلەنگەنىن مالىمدەگەن ەدى.
