ءوزىمىز بارىپ داۋىس بەرگەن قوستاناي قالاسىنداعى №11 رەفەرەندۋم ۋچاسكەسىندە دە داۋىس بەرۋشىلەردىڭ قاراسى كوپ. اتالعان ۋچاسكەگە 2 542 ادام تىركەلگەن. ونىڭ 40%-نا جۋىعى داۋىس بەرىپ ۇلگەرگەن.
«رەفەرەندۋم ۋچاسكەسى تاڭعى ساعات 7:00-دە اشىلدى. سوعان قاراماستان تاڭەرەڭ كەلگەن تۇرعىندار كوپ بولدى. ادەتتە مۇنداي ماڭىزدى ناۋقانعا قارت كىسىلەر ەرتە كەلەتىن. بۇگىن بايقاعانىمىز, تاڭەرەڭنەن بەرى جاستار كوپ كەلىپ جاتىر. ءبىزدىڭ ۋچاسكە بويىنشا كامەلەت جاسقا جاڭا تولعان 11 ازامات بۇگىن ءبىرىنشى رەت داۋىس بەرەدى. 17 مۇمكىندىگى شەكتەۋلى ازامات, ءجۇرىپ-تۇرۋى قيىن قاريالار بار. ولاردىڭ ءبىرازى جاقىن تۋىستارىمەن بىرگە وزدەرى كەلىپ داۋىس بەرىپ كەتتى. تۇستەن كەيىن قالعان 5-6 ادامنىڭ ۇيىنە ءوزىمىز بارىپ كەلەمىز. كوميسسيامەن بىرگە 4 باقىلاۋشى جۇمىس ىستەپ جاتىر. داۋىس بەرۋ بارىسىندا ەشقانداي وقىس وقيعا, زاڭ بۇزۋشىلىق بولعان جوق. ءبارى زاڭ اياسىندا, بەلگىلەنگەن ءتارتىپ بويىنشا ءوتىپ جاتىر», دەيدى ۋچاسكەلىك رەفەرەندۋم كوميسسياسىنىڭ توراعاسى گۇلۆيرا مۇسابەكوۆا.
№11 ۋچاسكەگە كەلىپ داۋىس بەرگەن قوستاناي قالاسىنىڭ تۇرعىنى راحىمباي ورازاقوۆ جاڭا كونستيتۋتسيا جوباسىن قابىلداۋ, قابىلداماۋ حالىقتىڭ ءوز ىقتيارىندا دەپ ەسەپتەيدى.
«قوستانايداعى «تەحنوپاركتە» جۇمىس ىستەيمىن. تاياۋدا زەينەت دەمالىسىنا شىعامىن. ەڭ باستىسى, تىنىشتىق, اۋىزبىرشىلىك بولسىن. ەڭبەك ەتەم دەگەن ادامعا, جۇمىس كوپ. سول جۇمىستى ءبىز ىستەمەسەك, كىم ىستەيدى؟ ادال ەڭبەكتىڭ, ەلدەگى تىنىشتىقتىڭ ارقاسىندا بالالاردى باعىپ-قاعىپ, ءوسىرىپ, وقىتتىق. نەمەرە-شوبەرە ءسۇيىپ اتا بولىپ وتىرمىز. بالالارىم دا جۇمىس ىستەپ جاتىر. دەنساۋلىعىمىز جاقسى. ادامعا كەرەكتىڭ ءبارى بار. نە ىشەم, نە جەيمىن دەمەيمىز. وسىعان ءتاۋبا دەيمىن. كونستيتۋتسيا جوباسىن كوردىك, وقىدىق. بۇگىن ەندى ءوز تاڭداۋىمىزدى جاساپ, ازاماتتىق بورىشىمىزدى وتەيىك دەپ كەلدىك. حالىقتىڭ قالاۋى قالاي بولاتىنى وسى ناۋقاننىڭ قورىتىندىسى شىققان بىلەمىز. باستىسى, ىرگەمىز ءبۇتىن, اسپانىمىز اشىق بولسىن», دەيدى راحىمباي ورازاقوۆ.
اتىراۋدا «قىز جىبەك» فيلمىندەگى «گاككۋدى» ورىنداعان ءانشى داۋىس بەردى
قوستاناي وبلىسى
