باس پروكۋراتۋرانىڭ قوعامدىق مۇددەلەردى قورعاۋ قىزمەتى باسقارماسىنىڭ باسشىسى بەكجان قارامانوۆ بۇگىنگى ماڭىزدى ءىس-شارا اياسىندا ساعات 13:00-دەگى جاعداي بويىنشا زاڭ بۇزۋشىلىقتار تىركەلمەگەنىن حابارلادى.
«قازىرگى ۋاقىتتا داۋىس بەرۋ پروتسەسى قالىپتى جاعدايدا ءوتىپ جاتىر. پروكۋراتۋرا ورگاندارىنا رەفەرەندۋمعا قاتىستى ەشقانداي ءوتىنىش تۇسكەن جوق. سونداي-اق سوت ورگاندارىنا دا تالاپ-ارىزدار ەنگىزىلمەگەن. قازىرگە دەيىن زاڭسىز ساۋالناما جۇرگىزۋ نەمەسە ۇگىت جۇرگىزگەنى ءۇشىن جاۋاپكەرشىلىككە تارتۋ فاكتىلەرى تىركەلگەن جوق. ءبىز زاڭدىلىقتىڭ ساقتالۋىن قامتاماسىز ەتۋ بويىنشا جۇمىستى جالعاستىرامىز», دەدى ب.قارامانوۆ.
ءىىم: رەفەرەندۋم كەزىندە ەلدەگى جاعداي پوليتسيانىڭ تولىق باقىلاۋىنا الىنعان
سونداي-اق ىشكى ىستەر مينيسترلىگىنىڭ رەسمي وكىلى شىڭعىس الەكەشەۆ رەفەرەندۋم قاۋىپسىزدىگىن ساقتاۋ ءۇشىن پوليتسيا كۇشەيتىلگەن رەجيمدە جۇمىس ىستەپ جاتقانىن مالىمدەدى.
«ىشكى ىستەر ورگاندارى رەفەرەندۋمنىڭ قاۋىپسىز ءارى تىنىش ءوتۋىن قامتاماسىز ەتۋ جۇمىستارىن جالعاستىرىپ جاتىر. بۇعان دەيىن حابارلانعانداي, بارلىق جەكە قۇرام كۇشەيتىلگەن رەجيمدە قىزمەت اتقارىپ جاتىر. كەز كەلگەن جاعدايعا جەدەل ارەكەت ەتۋ ءۇشىن ءار قالا مەن اۋداندىق پوليتسيا بولىمدەرىندە ءموبيلدى جەدەل توپتار قۇرىلدى. سونىمەن قاتار رەفەرەندۋم ۋچاسكەلەرىنىڭ ماڭىنداعى اۋماقتارعا باقىلاۋ كۇشەيتىلدى. ىشكى ىستەر مينيسترلىگىنىڭ جەدەل باسقارۋ ورتالىقتارىنا قوسىلعان بەينەكامەرالار ارقىلى جاعداي تۇراقتى تۇردە باقىلاۋدا. قازىرگى ۋاقىتتا رەفەرەندۋم ۋچاسكەلەرىندەگى جاعداي تىنىش, قوعامدىق ءتارتىپ بۇزۋشىلىقتارى تىركەلگەن جوق», دەدى شىڭعىس الەكەشەۆ.
