مەرەكەلىك جارىستارعا شامامەن 150 مىڭ ادام قاتىسادى دەپ كۇتىلەدى. ءىس-شارالار بارلىق ءوڭىردى قامتىپ, اۋىلدىق وكرۋگتەردەن باستاپ اۋدان, قالا جانە وبلىس ورتالىقتارىنا دەيىن وتكىزىلەدى.
باعدارلاماعا نەگىزىنەن قازاق حالقىنىڭ داستۇرلەرى مەن مادەني مۇراسىن دارىپتەيتىن ۇلتتىق سپورت تۇرلەرى ەنگىزىلگەن. اتاپ ايتقاندا, قازاق كۇرەسى, اسىق اتۋ, جامبى اتۋ, توعىزقۇمالاق, ساداق اتۋ, قۇسبەگىلىك, اۋدارىسپاق, كوكپار, تەڭگە ءىلۋ جارىستارى جوسپارلانعان.
سونىمەن قاتار مەيرام اياسىندا حالىق ويىندارى مەن سپورت جارىستارى دا وتكىزىلەدى. ولاردىڭ ىشىندە: قوي كوتەرۋ, جىلىك سىندىرۋ, لاڭگى تەبۋ, ارقان تارتۋ, الىپتار سايىسى سىندى ءداستۇرلى ويىندار بار. بۇدان بولەك, شاعىن فۋتبول, ۆولەيبول, ۇستەل تەننيسى جانە دزيۋدو تۋرنيرلەرى دە ۇيىمداستىرىلادى.
ەڭ كوپ سپورتتىق ءىس-شارالار بىرنەشە وڭىردە جوسپارلانعان, بۇل حالىقتىڭ ناۋرىزدى بەلسەندى اتاپ ءوتىپ, قاتىسۋ دەڭگەيىنىڭ جوعارى ەكەنىن كورسەتەدى.
وڭىرلەر بويىنشا سپورتتىق-بۇقارالىق ءىس-شارالار سانى:
• اباي وبلىسى – 6
• اقتوبە وبلىسى – 11
• اقمولا وبلىسى – 88
• الماتى وبلىسى – 40
• اتىراۋ وبلىسى – 7
• شىعىس قازاقستان وبلىسى – 19
• الماتى قالاسى – 21
• استانا قالاسى – 10
• شىمكەنت قالاسى – 22
• جامبىل وبلىسى – 48
• جەتىسۋ وبلىسى – 82
• باتىس قازاقستان وبلىسى – 12
• قاراعاندى وبلىسى – 22
• قوستاناي وبلىسى – 77
• قىزىلوردا وبلىسى – 13
• ماڭعىستاۋ وبلىسى – 88
• پاۆلودار وبلىسى – 80
• سولتۇستىك قازاقستان وبلىسى – 18
• تۇركىستان وبلىسى – 65
• ۇلىتاۋ وبلىسى – 18
ناۋرىزناما اياسىندا وتكىزىلەتىن سپورتتىق ءىس-شارالار سالاماتتى ءومىر سالتىن ناسيحاتتاۋعا, ۇلتتىق سپورت تۇرلەرىن دامىتۋعا جانە قوعامدىق بىرلىكتى نىعايتۋعا باعىتتالعان. مەرەكەلىك جارىستار ءداستۇرلى تۇردە كوپ قاتىسۋشى مەن كورەرمەندى جيناپ, كوكتەمگى جاڭارۋ مەن بىرلىك مەرەكەسىنىڭ ماڭىزدى بولىگىنە اينالادى.
