پەتروپاۆل. 26 ماۋسىم. ايىرتاۋ اۋدانىندا وڭىرلىك ۇيلەستىرۋ كەڭەسىنىڭ كوشپەلى وتىرىسى ءوتىپ, تۋريزم سالاسىن دامىتۋ, دەمالۋشىلارعا قالىپتى جاعداي جاساۋ ماسەلەلەرى تالقىلاندى. بۇل تۋرالى وبلىستىق كاسىپكەرلىك جانە تۋريزم باسقارماسىنىڭ ماماندارى حابارلادى.
وبلىس اكىمىنىڭ ورىنباسارى ەرلان اۋكەنوۆ بۇل باعىت بويىنشا ۇشجىلدىق دامىتۋ جوسپارى جاسالعانىن, وعان ەنگىزىلگەن 89 شارانىڭ 16-سى ورىندالعانىن جەتكىزدى.
ايىرتاۋ اۋدانىنىڭ اكىمى اعزام تاستەمىروۆتىڭ ايتۋىنشا, 34 دەمالىس ايماعى جۇمىس ىستەيدى. تابيعاتى تاماشا جەرلەرگە ساياحاتتاۋ ءۇشىن 12 باعدار جاسالعان. بىلتىر تاۋلىگىنە 45 ادامعا دەيىن قابىلدايتىن بۇعى مۇيىزىمەن ەمدەۋ ورنى ىسكە قوسىلىپ, 30 مارال اكەلىنگەن. 48 جازعى شاعىن ءۇيىن تۇرعىزۋعا 65,5 ميلليون تەڭگە جۇمسالعان. الداعى ۋاقىتتا استانا-ۆولودار باعىتىندا ەلەكتر پويىزى قاتىناسىن اشۋ, گيدتەر ءۇشىن شەبەرلىك سىنىپتارىن ۇيىمداستىرۋ جوسپارلانعان.
ەرلان مۇرات ۇلى جينالعانداردى تۋريستىك ماۋسىمنىڭ اشىلۋ سالتاناتىمەن قۇتتىقتاپ, جول جايىنا ەرەكشە نازار اۋدارۋدى تاپسىردى.
قوناقتار نازارىنا سۋرەت كورمەسى, قازاق حالقىنىڭ ۇلتتىق كيىمدەرى مەن ىدىس-اياقتارى, باتىرلاردىڭ قارۋ-جاراقتارى ۇسىنىلدى. اق شاڭقان كيىز ۇيلەر تىگىلىپ, ۇلتتىق ويىندار تاماشالاندى.
ءومىر ەسقالي.
دەرەك, سۋرەت: سولتۇستىك قازاقستان وبلىستىق كاسىپكەرلىك جانە تۋريزم باسقارماسى.
