ولاردىڭ ىشىندە كاسىبي بالىقشىلار دا, قاراپايىم تۇرعىندار دا بولدى. مۇز ويىپ, قارماق سالعاندار اراسىندا وبلىس اكىمى نۇرىمبەت ساقتاعانوۆ تا ءجۇردى.
بالىقشىلار اراسىنداعى جارىسقا قاتىسۋعا نيەت بىلدىرگەندەر الدىن الا تىركەلىپ, قاۋىپسىزدىك ەرەجەلەرىمەن تانىستى. جانكۇيەرلەر مەن كورەرمەندەرگە ۇيىمداستىرۋشىلار ءتۇرلى ويىن-ساۋىق باعدارلاماسىن ۇسىندى. مۇز ۇستىندە قوناقتارعا ارنايى كيىز ءۇي تىگىلىپ, جارمەڭكە ۇيىمداستىرىلدى. قارماق سالماعاندار تابيعات اياسىندا اتقا ءمىنىپ, يت جەگىلگەن شانامەن سەرۋەندەدى. ساحنادا قازاق ەستراداسىنىڭ جۇلدىزى ەركىن نۇرجانوۆ ءان شىرقاپ, كوپشىلىككە كوتەرىڭكى كوڭىل كۇي سىيلادى. سوناۋ كۋبادان ارنايى كەلگەن «پروەكت ۋمبەرتو» توبى التايدىڭ ساقىلداعان سارى ايازىنا قاراماستان, اۋەلەتە ءان سالدى. جيىلعان جۇرت ونەرپازدارعا قوشەمەت كورسەتىپ قولپاشتادى.
«جىل سايىن قاتىسۋشىلار قاتارى ارتىپ كەلەدى. مۇنداي شارالار ءتۋريزمدى دامىتۋدا, بەلسەندى ءارى سالاماتتى ءومىر سالتىن ناسيحاتتاۋدا ماڭىزدى ءرول اتقارادى. الداعى ۋاقىتتا دا وسىنداي باستامالاردى قولداپ, ءتۋريزمدى دامىتىپ, شىعىس قازاقستان كارتاسىندا جاڭا تارتىمدى ورىندار قالىپتاستىرا بەرەمىز», دەدى ءوڭىر باسشىسى نۇرىمبەت ساقتاعانوۆ.
كاسىبي بالىقشىلار مەن اۋەسقويلار باق سىناعان فەستيۆالدا ۇزدىكتەر بىرنەشە اتالىم بويىنشا انىقتالدى. «ايەل بالىقشى» اتالىمىندا يرينا سلاميحينا جەڭىمپاز اتانىپ, 100 مىڭ تەڭگە اقشالاي سىياقىعا يە بولدى. ەڭ ۇلكەن بالىق اۋلاعان گالي تەمىرعاليەۆ «Big Fish» اتالىمىندا ۇزدىك شىقتى. 3-ورىن مەن 300 مىڭ تەڭگە سىياقىنى ايقىن نۇرمۇحامبەتوۆ يەلەندى. 2-ورىندى ۆلاديمير كارپەنكو جەڭىپ الدى. وعان 400 مىڭ تەڭگە سىياقى بەرىلدى. ال «بۇقتىرما بالىقشىسى» فەستيۆالىنىڭ باس جۇلدەسىن جانە 500 مىڭ تەڭگە سىياقىنى بىسترۋحا اۋىلىنىڭ تۇرعىنى رومان يۆانوۆ جەڭىپ الدى.
شىعىس قازاقستان وبلىسى,
التاي اۋدانى
