مەملەكەتتىك كەڭەسشى ءسوزىن ەل بىرلىگىنە قىزمەت ەتۋدىڭ قادىر-قاسيەتىن ايقىنداۋدان باستادى.
«وسىدان ءۇش جىل بۇرىن قازاقستان حالقى اسسامبلەياسىنىڭ كەزەكتى سەسسياسىندا مەملەكەت باسشىسى: «ەل بىرلىگىن نىعايتۋ ءۇشىن قىزمەت ەتۋ – ەڭ جاۋاپتى ءارى ساۋاپتى ءىس», – دەگەن ەدى. پرەزيدەنتتىڭ وسى ءسوزىن ءتۇرلى جيىنداردا ۇنەمى قايتالاپ جۇرەمىن. بىرلىكتە جانە بىرلىككە قىزمەت ەتۋ – جاقسىلىقتىڭ ەڭ ابزالى. ويتكەنى جۇمىلىپ ىستەگەن ءىستىڭ پايداسى دا, ناتيجەسى دە وراسان بولادى», دەدى ەرلان قارين.
مەملەكەتتىك كەڭەسشى كونستيتۋتسيالىق رەفورمانىڭ ۇزاق ۋاقىت بويى جان-جاقتى تالقىلانعانىن, بۇل قۇجاتتىڭ بۇكىلحالىقتىق سيپاتىن ەرەكشە اتاپ ءوتتى.
«7 ايدان استام ۋاقىت بويى دايىندالىپ, پىسىقتالعان كونستيتۋتسيالىق رەفورما – قوعام بىرلىگى مەن حالىق ىنتىماعىنىڭ ايعاعى. بۇل جاڭا اتا زاڭدى ازىرلەۋگە مىڭداعان ادام قاتىستى. سوندىقتان جاڭا كونستيتۋتسيا ەلىمىز ءۇشىن بەرەكەلى قۇجات بولادى دەپ سەنەمىن», دەدى ول.
ەرلان قارين: كونستيتۋتسيالىق وزگەرىستەر حالىق مۇددەسىنە قىزمەت ەتەدى
بۇعان قوسا, ەرلان قارين وڭىرلەردەگى كەزدەسۋلەرگە توقتالىپ, حالىقتىڭ رەفورمالارعا دەگەن ىقىلاسى مەن مەملەكەت باسشىسىنا دەگەن سەنىمىن اتاپ ءوتتى.
«ازاماتتارىمىزدىڭ باسىم بولىگى جاڭا كونستيتۋتسيانى قولداپ وتىر. بۇل قولداۋدىڭ وزەگىندە – مەملەكەت باسشىسىنا جانە ونىڭ باستاماسىمەن جۇزەگە اسىرىلىپ جاتقان وزگەرىستەرگە دەگەن ءۇمىت بار. ەگەر حالىق بيلىككە سەنبەسە, رەفورمالاردى باستاۋ دا قيىن بولار ەدى. تەك حالىقتىڭ قولداۋى بىزگە وسىنداي جۇيەلى وزگەرىستەردى جاساۋعا كۇش بەرىپ وتىر», دەدى ەرلان قارين.
سونىمەن قاتار مەملەكەتتىك كەڭەسشى قوعامداعى پىكىر الۋاندىعىنا توقتالىپ, رەفورمانى سىناۋشىلارعا قاتىستى ءوز ويىن ءبىلدىردى.
«بۇگىندە ەلىمىزدىڭ ءار ازاماتى ءوز ويىن, ءوز پىكىرىن ەركىن ايتۋعا قۇقىلى. سوندىقتان, بۇگىندە بولىپ جاتقان وزگەرىستەردى بىرەۋلەر قولدايدى, بىرەۋلەر سىن ايتادى, بىرەۋلەر سۇراق قويادى. بۇل – ءبىز قۇرۋعا ۇمتىلعان اشىق قوعامنىڭ بەلگىسى. بىراق سول سىن ايتىپ جۇرگەندەر ۇلتتىق بىرەگەيلىككە, اۋماقتىق تۇتاستىققا نەمەسە ءداستۇرلى قۇندىلىقتاردى قورعاۋعا باعىتتالعان نورمالارعا قارسى بولعاندارىن تۇسىنە مە؟!», دەدى ول.
ەرلان قارين پرەزيدەنتتىڭ نەگە تاۋەلسىزدىك پەن ەگەمەندىك سوزدەرىن باس ارىپپەن جازاتىنىن ءتۇسىندىردى
ەرلان قاريننىڭ ايتۋىنشا, وسىنداي تاعدىر شەشتى ساتتە تۇتاس قوعامدى ارتقا تارتۋ – دۇرىس ەمەس. ول جاڭا كونستيتۋتسيانىڭ باستى ميسسياسى – ساياسي كوزقاراسىنا قاراماستان, ءاربىر قازاقستاندىقتىڭ قۇقىعىن تەڭ قورعاۋ ەكەنىن ءتۇسىندىردى.
ء«تۇپتىڭ تۇبىندە جاڭا كونستيتۋتسيا ونى قولداعانداردى دا, كۇمان كەلتىرگەندەردى دە ءبارىبىر بىردەي قورعاپ, تەڭ كەپىلدىك بەرەدى. ەرتەڭ ءبىر ازاماتىمىز الەمنىڭ ءبىر شەتىندە قيىن جاعدايعا ۇشىراسا, مەملەكەت ونى جالعىز قالدىرمايدى. ء«ار قازاق – جالعىزىم» دەگەن ۇلتتىق ۇرانىمىز ەندى ء«ار ازامات – باستى قۇندىلىق» دەگەن كونستيتۋتسيالىق قاعيداتقا اينالدى», دەپ ناقتىلادى مەملەكەت كەڭەسشى.
ءسوز سوڭىندا ەرلان قارين رەفەرەندۋم وتكىزىلەتىن كۇندى جاڭارۋ كۇنى دەپ اتاپ, ونىڭ تاريحي ماڭىزىنا نازار اۋداردى.
«15 ناۋرىز – بۇل تەك رەفەرەندۋم كۇنى ەمەس, بۇل – جاڭارۋ كۇنى. ەگەر ازاماتتارىمىز قولداسا, ءبىز جاڭا داۋىرگە اياق باسامىز. ادامدار تۇرعىن ۇيدەن زاڭسىز شىعارىلمايدى, جەكە دەرەكتەر قورعالادى, ەگەمەندىكتىڭ يەسى حالىق بولىپ تانىلادى. جاڭا كونستيتۋتسيا ۇلكەن جاڭاشىلدىقتاردىڭ, بەرەكەلى ىستەردىڭ باستاۋى بولسىن!», دەپ تۇيىندەدى مەملەكەتتىك كەڭەسشى.
