بۇل ساياساتتىڭ نەگىزگى ماقساتى – ەلدىڭ ونەركاسىپتىك الەۋەتىن كۇشەيتىپ, ىشكى نارىقتى وتاندىق ونىممەن قامتاماسىز ەتۋ. شيكىزات بازاسىن كەڭەيتۋ مەن ەكسپورتتىق الەۋەتتى ارتتىرۋ مەملەكەتتىك بيۋدجەتتىڭ كىرىس بولىگىن تولىقتىرۋعا دا ىقپال ەتەدى. سونىمەن قاتار ىشكى نارىق قاجەتتىلىكتەرىن وتەيتىن, قوسىلعان قۇنى جوعارى ءونىم وندىرۋگە قابىلەتتى تۇراقتى ونەركاسىپتىك بازا قالىپتاسادى.
ىشكى قايتا وڭدەۋدى دامىتۋداعى ءتيىمدى قۇرالداردىڭ ءبىرى – وتاندىق كاسىپورىنداردى نەگىزگى بازالىق مەتالدارمەن قامتاماسىز ەتۋ تەتىگى. بۇل مەحانيزم بويىنشا ءىرى ءوندىرۋشى كومپانيالار الدىمەن ىشكى نارىقتىڭ سۇرانىسىن قامتاماسىز ەتەدى. ياعني ولار وتاندىق كاسىپورىندار الدىنداعى مىندەتتەمەلەرىن ورىنداعاننان كەيىن عانا ءونىمىن ەكسپورتقا شىعارا الادى.
وتاندىق كاسىپورىندارعا بەرىلەتىن جەڭىلدىكتەر وڭدەۋ دەڭگەيىنە قاراي بەلگىلەنگەن. دايىن ءونىم وندىرۋشىلەر لوندون مەتال بيرجاسى (LME) باعاسىنان 5 پايىز جەڭىلدىكپەن شيكىزات الادى. ال ارالىق ءونىم وندىرۋشىلەر ءۇشىن 1 پايىز جەڭىلدىك قاراستىرىلعان.
مەملەكەتتىك قولداۋ شارالارىن جۇزەگە اسىرۋ اياسىندا مينيسترلىك 2025 جىلى كاسىپورىنداردان وتىنىمدەر قابىلداپ, قاجەتتى ساراپتامالار جۇرگىزدى. ناتيجەسىندە كاتودتى مىس, باستاپقى اليۋميني جانە مەتالل مىرىشىن جەتكىزۋگە 18 كاسىپورىنمەن ۇشجاقتى كەلىسىمدەر جاسالدى.
وڭدەۋ ونەركاسىبى كاسىپورىندارى تاراپىنان شيكىزاتقا سۇرانىس تۇراقتى تۇردە ءوسىپ كەلەدى. ماسەلەن, 2025 جىلى مىسقا دەگەن قاجەتتىلىك 18,6 مىڭ توننانى قۇراسا, 2026 جىلى بۇل كورسەتكىش 20,4 مىڭ تونناعا دەيىن ارتادى دەپ كۇتىلەدى.
اليۋميني سالاسىندا دا ىشكى وڭدەۋ قارقىنى كۇشەيگەن. 2025 جىلى ىشكى نارىقتا قايتا وڭدەۋ كولەمى 57,4 مىڭ توننانى قۇرادى. ال باستاپقى اليۋمينيگە دەگەن قاجەتتىلىك 2026 جىلى 77,7 مىڭ توننا دەڭگەيىندە بولجانىپ وتىر. بۇل وتكەن جىلمەن سالىستىرعاندا 35 پايىزدان استام ءوسىم.
مىرىش وندىرىسىندە دە سۇرانىس ارتىپ كەلەدى. 2026 جىلى مىرىشقا دەگەن قاجەتتىلىك 2,6 مىڭ توننانى قۇرايدى. بۇل وتكەن جىلمەن سالىستىرعاندا 45 پايىزعا كوپ. 2025 جىلى بۇل كورسەتكىش 1,8 مىڭ توننا دەڭگەيىندە بولعان.
سۇرانىستىڭ وسۋىنە بايلانىستى جەتكىزىلەتىن شيكىزات كولەمىنىڭ ارتۋى مەملەكەتتىك قولداۋ تەتىكتەرىنىڭ تيىمدىلىگىن ايقىندايدى. وتاندىق وندىرۋشىلەردى بازالىق مەتالدارمەن قامتاماسىز ەتۋ ورتا جانە جوعارى دەڭگەيدە وڭدەلگەن ءونىم شىعاراتىن كاسىپورىنداردىڭ جۇكتەمەسىن ارتتىرۋعا مۇمكىندىك بەرەدى.
بۇل ءوز كەزەگىندە, كاتانكا, كابەل جانە وتكىزگىش ونىمدەر, اككۋمۋلياتورلار, تەرەزە پروفيلدەرى, جيھاز جابدىقتارى سياقتى ءتۇرلى تاۋار ءوندىرىسىن كوبەيتۋگە جول اشادى.
ناتيجەسىندە وڭدەۋ ونەركاسىبىن دامىتۋعا, قوسىلعان قۇنى جوعارى ءونىم شىعارۋعا جانە ەكسپورتتىق الەۋەتتى كەڭەيتۋگە قوسىمشا مۇمكىندىك تۋادى. وسى باعىتتاعى جۇمىستار شيكىزاتتى ىشكى نارىقتا وڭدەۋدى كۇشەيتىپ, ەل اۋماعىندا وندىرىلەتىن دايىن ءونىم كولەمىن ارتتىرۋعا, وتاندىق كاسىپورىنداردى قولداۋ ارقىلى حالىقتىڭ ءال-اۋقاتىن كوتەرۋگە نەگىز قالايدى.
