قوستانايدا جاس سارباز جۇمباق جاعدايدا قازا تاپتى

استانا. 26 ماۋسىم. قوستانايداعى اسكەري بولىمشەدە جاس سارباز جۇمباق جاعدايدا مەرت بولدى. ۇلتتىق گۆارديا ساپىنا قابىلدانعان اقتوبەلىك تاڭاتقان وتەپوۆ بەلگىسىز سەبەپتەرمەن اقىل-ەسى اۋىتقىعان جانداردى ەمدەيتىن مەكەمەگە جاتقىزىلىپ, ارتىنشا جاعدايى ناشارلاپ, جانساقتاۋ بولىمىنەن ءبىر-اق شىققان. دەنساۋلىعىندا ءمىن بولماعان جىگىتتىڭ نەبارى 5 كۇننەن سوڭ ۇيىنە تابىتپەن ورالۋىنا اتا-انالارى اسكەري بولىمدەگىلەردى كىنالاپ وتىر. بۇل تۋرالى «قازاقپارات» حابارلادى. اسكەرگە اتتانباس بۇرىن تاڭاتقان وتەپوۆ جوعارى ءبىلىم الىپ, مەملەكەتتىك كىرىس بولىمىندە جۇمىس ىستەگەن. ايتا كەتەيىك, 22 جاستاعى جىگىت اسكەرگە شاقىرتۋ الىپ, وتان الدىنداعى بورىشىن قوستاناي قالاسىنداعى اسكەري بولىمدە وتەۋ بۇيىرعان. الايدا, 3 كۇننەن سوڭ تەپسە تەمىر ۇزەتىن جىگىت بەلگىسىز سەبەپتەرمەن اقىل-ەسى كەم جانداردى ەمدەيتىن مەكەمەگە جاتقىزىلىپتى. «ءومىر بويى ءبىر رەت اۋرۋحاناعا جاتىپ, ءبىر ەكپە  الىپ كورگەن جوق.  ساباسىنا ءتۇسىرۋ ءۇشىن دوزا بەرگەن سياقتى. جەتەم دەگەنشە رەانيماتسياعا جاتقىزىلعان», – دەيدى ساربازدىڭ اكەسى دۇيسەنباي وتەپوۆ. جايسىز حاباردى ەستىگەن تاڭاتقاننىڭ اتا-اناسى الىپ-ۇشىپ قوستانايعا جەتكەن. الايدا جانساقتاۋ بولىمىندەگى جىگىت ەس جيماستان كوز جۇمدى. اسكەري بولىمدەگىلەر تاڭاتقان ساپتا تۇرىپ ساندىراقتاعانىن ايتقان. دەگەنمەن جىگىتتىڭ اتا-اناسى ۇلىنىڭ ولىمىنە اسكەري بولىمشەنىڭ باسشىلارى كىنالى دەپ وتىر. «3 كۇندە نە بولعانىن بىلمەيمىن. كۇمانىمىز بار. اپارىپ پسيحياتريالىق اۋرۋحاناعا قامادى. بوتاقانىم-اۋ. ءبىز جەتەمىز دەگەنشە ايتەۋىر بىلگەندەرىن ىستەگەن», – دەدى مارقۇمنىڭ اناسى ايمان وتەپوۆا. قوستانايلىق دارىگەرلەر سارباز بەلگىسىز نارسەدەن ۋلانۋى مۇمكىن دەگەن بايلامعا كەلگەن. مۇنى كورگەن اتا-انا دياگنوزى ناقتىلانباعان ادامدى قالايشا ديسپانسەرگە جاتقىزعانىن تۇسىنبەي وتىر. ال اسكەري بولىمدەگىلەر بۇل جايت بويىنشا تۇسىنىك بەرۋدەن باس تارتۋدا. قازىردە وقيعا بويىنشا تەرگەۋ باستالعان. قايعى جۇتقان اتا-انا بولسا, زاڭگەر جالداپ سوتتاسۋعا ازىرلەنۋدە. تالعات رايىمبەك. دەرەك, سۋرەت: «قازاقپارات».