فوتو: اقوردا
پرەزيدەنت ءوز سوزىندە جيىنداعى ۇسىنىستار پارلامەنتتىڭ, ۇكىمەتتىڭ الداعى جۇمىسىندا ەسكەرىلەتىنىن اتاپ ءوتتى.
«شىن مانىندە, بۇل باسقوسۋدىڭ ەلىمىز ءۇشىن ءمان-ماڭىزى ايرىقشا. بۇگىنگى فورۋمعا بارلىق ايماقتان جەرگىلىكتى بيلىك وكىلدەرى ارنايى كەلدى. قازىر وسى زالدا ميلليونداعان وتانداسىمىزدىڭ مۇددەسىن قورعاپ جۇرگەن ەكى مىڭعا جۋىق دەپۋتات وتىر. سىزدەر حالىقپەن تىعىز جۇمىس ىستەپ جۇرسىزدەر. جۇرتتىڭ مۇڭ-مۇقتاجىن, تالاپ-تىلەگىن جاقسى بىلەسىزدەر. سوندىقتان مەن مەملەكەت باسشىسى رەتىندە سىزدەر اتقارىپ جاتقان جۇمىستى ۇدايى باستى نازاردا ۇستايمىن», دەدى پرەزيدەنت.
قاسىم-جومارت توقاەۆ مۇنداي جيىندار وڭىرلىك ساياساتتىڭ تيىمدىلىگىن باعالاپ, وزەكتى ماسەلەلەردى تالقىلاۋعا مۇمكىندىك بەرەتىنىن جەتكىزدى.
«وزدەرىڭىزگە ءمالىم, قازاقستاندا كەڭ اۋقىمدى, تاريحي وزگەرىستەر جۇزەگە اسىرىلىپ جاتىر. يگى باستامالاردىڭ ءبارى دە حالىقتىڭ ءال-اۋقاتىن ارتتىرۋ ءۇشىن قولعا الىندى. ءبىز مەملەكەتتىك باسقارۋ جۇيەسىن, ەكونوميكانى جانە الەۋمەتتىك سالانى تۇبەگەيلى جاڭعىرتۋعا كىرىستىك. بۇل ورايدا, ءماسليحاتتاردىڭ الدىندا تۇرعان ميسسيا – ايرىقشا. وكىلدى ورگانداردى كۇشەيتۋ مەملەكەتتىك ساياساتتىڭ نەگىزگى باسىمدىعى بولىپ قالا بەرەدى. ءبىز بۇعان دەيىن ءبىراز شارۋا اتقاردىق. «قۋاتتى ايماقتار – قۋاتتى ەل» قاعيداتىنا سايكەس ءماسليحاتتاردىڭ بەدەلىن كوتەردىك. سونىڭ ارقاسىندا وسى قۇرىلىمدار مەملەكەتتىك باسقارۋ جۇيەسىندەگى باستى ينستيتۋتتىڭ بىرىنە اينالدى. دەگەنمەن ءماسليحاتتاردىڭ الەۋەتىن ودان ءارى كۇشەيتۋ ءۇشىن بىرقاتار مىندەتتى ورىنداۋىمىز كەرەك», دەدى پرەزيدەنت.
ءماسليحات دەپۋتاتتارىنىڭ ءىىى رەسپۋبليكالىق فورۋمى ءوتىپ جاتىر
