ءىس-شارانى اتالعان شەكارا باسقارماسى مەن شەكاراشى ارداگەرلەردىڭ «زاستاۆا تارلاندارى» رەسپۋبليكالىق قوعامدىق ۇيىمى بىرلەسىپ ۇيىمداستىردى.
ايقارا اشىلعان قاقپادان ەنگەن وقۋشىلاردى مۇندا شەكارا قىزمەتىنىڭ قولدانىسىنداعى ءتۇرلى تەحنيكالار مەن قارۋ-جاراقتار, بايلانىس قۇرالدارى مەن ازىق-ت ۇلىكتەر قويىلعان كورمەلەر كۇتىپ تۇرعان. ايتا كەتەرلىگى, شەكارا باسقارماسىنىڭ ورتالىق الاڭىندا ساپ تۇزەگەن كادەتتەر وزدەرىنىڭ جاڭا اسكەري فورمالارىمەن دارالاندى. اسىرەسە, جاسىل كۇنقاعارلى قىزدار مەن ۇلدار بىردەن كوزگە ءتۇستى.
سونداي-اق شاراعا جەتىسۋ وبلىسى بويىنشا دەپارتامەنتىنىڭ باستىعى پولكوۆنيك م.نارباەۆ, الماتى وبلىسى بويىنشا دەپارتامەنتى باستىعىنىڭ ورىنباسارى پولكوۆنيك ە.تۇلكىباەۆ, «زاستاۆا تارلاندارى» رەسپۋبليكالىق قوعامدىق بىرلەستىگىنىڭ توراعاسى زاپاستاعى گەنەرال-مايور م.سابيدولدانوۆ باستاعان اعا بۋىن شەكاراشىلار قاتىسىپ, كورمەلەرمەن تانىستى.
لايىقتى باعاسىن بەرۋ كەرەك, كورمەگە قويىلعان زاماناۋي ۇلگىدەگى تەحنيكالار مەن قارۋ-جاراقتار اسىرەسە بالالاردىڭ قىزىعۋشىلىعىن تۋعىزدى. ولار ەل شەبىن كۇزەتۋگە ارنالعان اسكەري كولىكتەر مەن ۇرىس ماشينالارىنا ءمىنىپ كورىپ, قارۋلاردى قولدارىنا ۇستاپ كورگەنشە الىپ-ۇشقانى بايقالدى. قولدارىنا شەكاراشىلاردىڭ ءدۇربىسىن ۇستاپ, ساربازدار اسىناتىن اۆتوماتتان نىسانا كوزدەگەن مەزەتتە وزدەرىن ناعىز اسكەري سەزىنگەن بالالاردىڭ قۋانىشتارىندا شەك بولمادى.
ءىس-شارا سوڭىندا بالالار مەن شەكاراشىلار ەستەلىك سۋرەتكە ءتۇسىپ, وزدەرىنىڭ جىلى لەبىزدەرىمەن ءبولىستى.
بۇل كەزدەسۋ ساپتىق داعدىلارى قالىپتاسىپ ۇلگەرگەن, الماتى وبلىسى بويىنشا دەپارتامەنتى ءجيى وتكىزەتىن ءتۇرلى شارالارعا قاتىسۋدى بىرتىندەپ داستۇرگە اينالدىرىپ كەلە جاتقان «جاس شەكاراشى» اسكەري-پاتريوتتىق كلۋبىنىڭ مۇشەلەرى ءۇشىن تاعىلىمدى كۇن بولدى.
تامارا داۋلەتباەۆا,
ۇقك شەكارا قىزمەتى الماتى وبلىسى بويىنشا دەپارتامەنتىنىڭ ءباسپاسوز قىزمەتى
