ونىڭ ايتۋىنشا, قىلمىسقا ۇزاق ۋاقىتقا سوزىلعان تۇرمىستىق جانجالدار سەبەپ بولۋى مۇمكىن. قازىرگى ۋاقىتتا تەرگەۋ ەكى نەمەسە ودان دا كوپ ادامدى ءولتىرۋ بابى بويىنشا جۇرگىزىلىپ جاتىر. ءىس ىشكى ىستەر مينيسترلىگىنىڭ باقىلاۋىنا الىنعان.
تەرگەۋ نۇسقاسىنا سايكەس, نەگىزگى كۇدىكتى – وتباسىنىڭ كۇيەۋ بالاسى سۇلتان سارسەماليەۆ. ونىڭ جۇبايى, وتباسىنىڭ كىشى قىزى اقباياننىڭ بۇل ىسكە قاتىسى بار-جوعى انىقتالىپ جاتىر. پوليتسيا مالىمەتىنشە, ايەلدىڭ پسيحيكالىق جاعدايىن تەكسەرۋ ءۇشىن سوت-پسيحياتريالىق ساراپتاما تاعايىندالىپ, مەديتسينالىق مەكەمەگە جىبەرىلگەن.
ەسكە سالايىق, اتىراۋ وبلىسىنىڭ قىزىلقوعا اۋدانىندا تۇراتىن ەرلى-زايىپتى, ۇلى مەن قىزى ءىز-ءتۇزسىز جوعالىپ كەتكەن ەدى. كەيىن ەرلى-زايىپتىنىڭ ءمايىتى تابىلدى. ولاردىڭ ولىمىنە كۇدىكتى رەتىندە كۇيەۋ بالاسى مەن قىزىنا حالىقارالىق ىزدەۋ جاريالاندى.
اتىراۋدا جوعالعان وتباسى مۇشەلەرىنىڭ تەلەفونى سوڭعى رەت شىمكەنتتەن سيگنال بەرگەنى بەلگىلى بولدى.
ىشكى ىستەر مينيسترلىگىنىڭ قىزمەتكەرلەرى شەتەلدىك ارىپتەستەرمەن بىرلەسە جۇمىس ىستەپ, يندونەزيا رەسپۋبليكاسىنىڭ لومبوك ارالىنداعى سەنارۋ اۋىلىندا اسا اۋىر قىلمىس جاسادى دەپ ايىپتالعان سۇلتان سارسەماليەۆتى ۇستادى.
كۇدىكتى بۇرىن جوعالىپ كەتكەن ناۋرىز بەن مەيرامگۇلدى ءولتىرىپ, اتىراۋ قالاسىنىڭ ماڭىنداعى گەولوگ ىقشام اۋدانىنا كومگەنىن مويىندادى.
