Financial Times باسىلىمى تاراتقان مالىمەتكە سايكەس, مامىلە شامامەن 1,4 ملرد دوللار كولەمىندە باعالانىپ وتىر. اقپاراتقا قاراعاندا, ساتىپ الۋدى قارجىلاندىرۋ ءۇشىن Glencore بولاشاقتا جەتكىزىلەتىن فەرروحرومعا الدىن الا 800 ملن دوللار اۆانس بەرۋگە دايىن. فەرروحروم نەگىزىنەن توت باسپايتىن بولات وندىرۋدە قولدانىلاتىن ماڭىزدى شيكىزات سانالادى.
Financial Times دەرەگىنشە, ERG ۇلەسىن ساتىپ الۋعا قاتىستى ءمۇتالىپتىڭ ۇسىنىسى كومپانيانىڭ باس ديرەكتورى, كاسىپكەر شۋحرات يبراگيموۆتىڭ وتىنىمىنە قاراعاندا اناعۇرلىم تارتىمدى دەپ باعالانعان. شۋحرات يبراگيموۆ – كومپانيانىڭ نەگىزىن قالاۋشىلاردىڭ ءبىرى مارقۇم اليدجان يبراگيموۆتىڭ ۇلى.
سونىمەن قاتار ءمۇتالىپ پەن Glencore اراسىندا تاعى ءبىر ءىرى مامىلە تالقىلانىپ جاتىر. اڭگىمە Glencore-عا تيەسىلى قازاقستاندىق «قازتسينك» كومپانياسىنىڭ 70,2% اكتسياسىن ساتىپ الۋ مۇمكىندىگى جونىندە. الدىن الا باعالاۋ بويىنشا بۇل كەلىسىمنىڭ قۇنى شامامەن 3,5 ملرد دوللار بولۋى ىقتيمال.
وسىلايشا, ەكى مامىلەنىڭ جالپى كولەمى 5 ملرد دوللارعا جۋىقتاۋى مۇمكىن. سوعان قاراماستان Glencore ۇزاق مەرزىمدى كەلىسىمدەر ارقىلى مەتالل شيكىزاتىنا قولجەتىمدىلىگىن ساقتاپ قالماق.
ەكونوميست ءارى Finmentor Telegram-ارناسىنىڭ اۆتورى ارمان باتاەۆتىڭ ەسەپتەۋىنشە, Eurasian Resources Group-تىڭ قازاقستانداعى نەگىزگى اكتيۆتەرى 2024 جىلدىڭ قورىتىندىسىندا شامامەن 23 ملرد تەڭگە شىعىنعا ۇشىراعان. ال 2023 جىلى كومپانيا 135 ملرد تەڭگە كولەمىندە تازا پايدا تاپقان ەدى.
بۇعان دەيىن قازاقستاندىق كاسىپكەر شاحمۇرات ءمۇتالىپ ERG-ءدىڭ 40% ۇلەسىن 1,4 ملرد دوللارعا ساتىپ الۋدى ۇسىنعانى حابارلانعان. بۇل ۇلەس قازىر كومپانيانىڭ تەڭ قۇرىلتايشىلارىنىڭ ءبىرى پاتوح شوديەۆكە جانە 2025 جىلى ومىردەن وتكەن كاسىپكەر الەكساندر ماشكەۆيچتىڭ مۇراگەرلەرىنە تيەسىلى.
قازىرگى ۋاقىتتا Eurasian Resources Group اكتسيونەرلەرىنىڭ قۇرىلىمى مىناداي: قازاقستاننىڭ قارجى مينيسترلىگى – 40%, ماشكەۆيچتىڭ مۇراگەرلەرى مەن يبراگيموۆتار وتباسى – ارقايسىسى 20,7%-دان, پاتوح شوديەۆ – 18,6%. Forbes دەرەگى بويىنشا, يبراگيموۆتار وتباسى 2,06 ملرد دوللارلىق بايلىعىمەن قازاقستانداعى ەڭ اۋقاتتى ادامدار تىزىمىندە 7-ورىندا تۇر.
ERG, KIA, Mars: قازاقستاندا ونەركاسىپ لوكاليزاتسياسى ءوسىپ كەلەدى
ERG-ءدىڭ نەگىزىن قالاعان كاسىپكەرلەر الەكساندر ماشكەۆيچ, پاتوح شوديەۆ جانە اليدجان يبراگيموۆ 2005 جىلى Forbes باعالاۋىنشا قازاقستانداعى العاشقى دوللارلىق ميللياردەرلەر قاتارىنا ەنگەن ەدى. ولاردىڭ ارقايسىسىنىڭ سول كەزدەگى كاپيتالى شامامەن 1 ملرد دوللار دەپ باعالانعان.
