تەرگەۋ دەرەكتەرىنە قاراعاندا, جانگەلدين اۋىلىنىڭ تۇرعىندارى – ناۋرىز بەن مەيرامگۇل ءبىراز ۋاقىت بۇرىن حابارسىز كەتكەندەر تىزىمىنە ەنگىزىلگەن. كەيىن ولاردىڭ دەنەسى كۇدىكتى سۇلتان سارسەماليەۆ بۇرىن جۇبايى اقبايانمەن بىرگە جالداپ تۇرعان ءۇيدىڭ اۋلاسىنان تابىلدى.
كەشە سۇلتان سارسەماليەۆ پەن ونىڭ جۇبايى اقبايان الماتىعا جەتكىزىلگەن. تەرگەۋ بارىسىندا سۇلتان سارسەماليەۆ ناۋرىز بەن مەيرامگۇلدى ولتىرگەنىن مويىنداپ, ولاردىڭ دەنەسىن گەولوگ ىقشاماۋدانىنداعى بۇرىن جالداپ تۇرعان ءۇيدىڭ اۋلاسىنا كومگەنىن ايتقان. وسى اقپاراتتان كەيىن اتىراۋداعى تەرگەۋشىلەر اتالعان جەردە قايتا قازۋ جۇمىستارىن جۇرگىزىپ, مايىتتەردى تاپتى.
قازىر سۇلتان سارسەماليەۆ ايەلىنىڭ ءتورت تۋىسىن ءولتىردى دەگەن كۇدىككە ءىلىندى. بۇعان دەيىن اقباياننىڭ اتا-اناسىنىڭ دەنەسى ءوز ءۇيىنىڭ قوراسى قۇلاعان كەزدە تابىلعان ەدى. ال اقباياننىڭ ءوزى دە باستاپقىدا جوعالعاندار قاتارىندا بولعان. كەيىن ەرلى-زايىپتى يندونەزيادا ۇستالعان سوڭ, ول دا كۇدىكتى رەتىندە قاراستىرىلىپ جاتىر. دەگەنمەن وعان ناقتى قانداي ايىپ تاعىلعانى ازىرگە جاريالانعان جوق.
ەسكە سالا كەتەيىك, 29 جاستاعى سۇلتان سارسەماليەۆ قوس ادامدى ءولتىردى دەگەن كۇدىكپەن حالىقارالىق ىزدەۋدە جۇرگەن. ول 24 اقپاندا يندونەزياداعى سەنارۋ اۋىلىنداعى قوناقۇيدە ۇستالدى. وپەراتسيا يندونەزيا پوليتسياسىنىڭ حالىقارالىق بولىمشەسىمەن بىرلەسىپ جۇرگىزىلگەن.
مارقۇمداردىڭ وتباسى اتىراۋ وبلىسىنداعى جانگەلدين اۋىلىندا تۇرعان. 66 جاستاعى ماقسوت قارابالين مەن 64 جاستاعى ناسيپ وتەشقاليەۆا ءۇشىنشى توپتاعى مۇگەدەكتىگى بار جاندار بولعان, مال شارۋاشىلىعىمەن اينالىسىپ, اۋىلدان سيرەك شىعاتىن. وتباسىندا ەكى قىز, ءبىر ۇل تاربيەلەنگەن.
2025 جىلعى 25 جەلتوقساندا تۋىستارى پوليتسياعا وتباسىنىڭ جوعالعانى تۋرالى حابارلاعان. ايتۋلارىنشا, ماقسوت قارابالين, ونىڭ جۇبايى جانە ولاردىڭ ەكى بالاسى – 32 جاستاعى ناۋرىز بەن 35 جاستاعى مەيرامگۇل قاراشا ايىنان بەرى بايلانىسقا شىقپاعان. كەيىن وتباسىنىڭ ۇيدەن بەلگىسىز باعىتتا كەتىپ, سول كۇيى حابارسىز كەتكەنى بەلگىلى بولعان.
