ساراپشى ەڭ الدىمەن ەلىمىزدەگى ۇلتارالىق قاتىناستاردىڭ دامۋى تۋرالى ويىمەن ءبولىستى. ونىڭ ايتۋىنشا, قازىرگى كونستيتۋتسيالىق رەفورما – ەل ومىرىندەگى ەلەۋلى ساياسي بەتبۇرىس.
ء«وزىم سولتۇستىك وڭىردەگى كوپەتنوستى ورتادا ءوسىپ-جەتىلگەندىكتەن, بالا كەزىمنەن-اق ورتاق مۇددەنى ۇعىنۋ, ءوزارا ىمىراعا كەلۋ جانە ەتنيكالىق تاتۋلىقتى ساقتاۋ قۇندىلىقتارى ساناما تابيعي تۇردە ءسىڭدى. وسى ومىرلىك تاجىريبە مەنى قوعامدىق كەلىسىم ماسەلەلەرىنە بەيجاي قاراماي, ونى تەرەڭ تۇسىنۋگە جەتەلەدى. سول سەبەپتى قحا جانىنداعى جاس عالىمدار كلۋبىنىڭ مۇشەسى, سونداي-اق ۇزاق جىلدار بويى اقمولا وبلىستىق قحا عىلىمي-ساراپشىلىق كەڭەسىنىڭ مۇشەسى رەتىندە ەلدەگى قوعامدىق-ساياسي وزگەرىستەرگە باعىتتالعان جاڭا بەتبۇرىستى ەرەكشە سەرپىن, ماڭىزدى كەزەڭ رەتىندە قابىلداپ وتىرمىن», دەدى ول.
وسى ورايدا ول قازاقستان حالقى اسسامبلەياسى اتقارىپ كەلگەن ۇلتارالىق تاتۋلىققا باعىتتالعان قىزمەتتىڭ كەلەشەگىنە قاتىستى دا ويىن ايتتى.
«قحا الداعى كەزەڭدە ءوز جۇمىسىن بۇرىنعى ۇيرەنشىكتى فورماتتا جالعاستىرماعانىمەن, ۇلتتىق بىرلىكتىڭ دىڭگەگىن نىعايتۋعا باعىتتالعان جيناقتاعان تاجىريبەسى جاڭا ينستيتۋتتار اياسىندا ءوز جالعاسىن تابادى. بۇل جاعداياتتى كەرىسىنشە, ءتۇرلى سىني كەزەڭدەردەن سۇرىنبەي ءوتىپ, ءبىر تۋ استىندا توپتاسا الاتىن قوعام رەتىندە كەمەلدەنگەنىمىزدىڭ ايقىن بەلگىسى دەپ باعالاۋعا تولىق نەگىز بار», دەدى ول.
سونداي-اق جاڭا اتا زاڭ جوباسىندا قوعامدىق بەيبىتشىلىك پەن تۇراقتى دامۋدىڭ ىرگەتاسى سانالاتىن ەتنوسارالىق جانە كونفەسسياارالىق كەلىسىمدى ساقتاۋعا ايرىقشا ءمان بەرىلگەنىن اتاپ ءوتتى.
الماتىداعى رەفەرەندۋمعا دايىندىق بارىسى
«قازاق قوعامى تاريحتىڭ ءار بەلەسىندە سان قىرلى بولمىسىمەن دارالانىپ, ءبىر قالىپتا قاتىپ قالعان ەمەس. ۋاقىت الماسقان سايىن قوعام قۇرىلىمى دا جاڭارىپ, وزگەرىپ وتىردى. بۇل ءومىردىڭ زاڭدىلىعى. ال سول الۋاندىقتىڭ وزەگىندە ءبارىمىزدى بىرىكتىرەتىن ەڭ بەرىك تۇعىر – ازاماتتىق نەگىزدە ۇيىسقان ءبىرتۇتاس ۇلت بولۋىمىز», دەدى ر.تاسىم.
ساراپشى ۇلتارالىق, دىنارالىق تاتۋلىققا, ءوزارا قۇرمەت پەن سىيلاستىققا باعىتتالعان بۇل وزگەرىستەر حالىقتىڭ ساياسي مادەنيەتىنىڭ ارتۋىنا دا الىپ كەلەتىنى تۋرالى ويىن قوستى.
