قالام مەن ءبىلىمنىڭ ساباقتاستىعى
ءلاززات قوجاحمەتوۆا 1976 جىلى قاراعاندى وبلىسىنىڭ اقتوعاي اۋدانىنداعى اۋىلدا دۇنيەگە كەلدى. 1993-1997 جىلدارى ە. بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىندە ءبىلىم الدى.
عىلىم مەن بىلىمگە دەگەن ىزدەنىسى مۇنىمەن توقتاعان جوق. 2012 جىلى وسى ۋنيۆەرسيتەتتە ماگيستراتۋرانى ءتامامداپ, 2018 جىلى ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە دوكتورانتۋرانى اياقتادى. بۇدان بولەك, جۋرناليستەرگە ارنالعان رەسپۋبليكالىق جانە حالىقارالىق جۇزدەگەن كۋرستار مەن سەمينارلارعا, ترەنينگتەر مەن باعدارلامالارعا قاتىسىپ, كاسىبي بىلىكتىلىگىن ۇنەمى جەتىلدىرىپ وتىردى.
1997 جىلدان باستاپ 2025 جىلعا دەيىن ە. بوكەتوۆ اتىنداعى قاراعاندى ۋنيۆەرسيتەتىنىڭ جۋرناليستيكا كافەدراسىندا اعا وقىتۋشى بولىپ قىزمەت اتقارىپ, جۇزدەگەن جاس جۋرناليستكە ءبىلىم بەردى.
عالىم ايەلدەر اكادەميك ءنايلا بازانوۆا اتىنداعى قۇرمەت بەلگىسىمەن ماراپاتتالدى
ۇستازدىق قىزمەتپەن قاتار كاسىبي جۋرناليستيكادان قول ۇزگەن جوق. ءار جىلدارى «Qaraghandy Habary» گازەتىنىڭ باس رەداكتورى, رەسپۋبليكالىق «ايقىن», «نەحابار» گازەتتەرىنىڭ, bnews.kz/kz, abctv.kz, munara.kz اقپاراتتىق پورتالدارىنىڭ قاراعاندى وبلىسىنداعى مەنشىكتى ءتىلشىسى بولدى.
سونىمەن قاتار قاراعاندى وبلىسىنىڭ ءىىد مەملەكەتتىك ءتىل جانە اقپارات باسقارماسىندا وقىتۋشى, قاراعاندى قالالىق ءىىب ءباسپاسوز قىزمەتىندە ينسپەكتور, «ارت-تۆ» جانە «5 كانال» تەلەكومپانيالارىندا ءتىلشى قىزمەتتەرىن اتقاردى.
وسى جىلدار ىشىندە ول جۋرناليستيكانىڭ شىنايى مەكتەبىنەن ءوتىپ, قوعامداعى وتكىر ماسەلەلەردى باتىل كوتەرەتىن كاسىبي مامان رەتىندە قالىپتاستى.
انالار اماناتى
ءلاززات قوجاحمەتوۆانىڭ قوعامدىق بەلسەندىلىگى ونىڭ جەكە ومىرىمەن تىعىز بايلانىستى. ول – كوپبالالى انا. ءۇشىنشى پەرزەنتىن 40 جاسىندا, ءتورتىنشىسىن 41 جاسىندا دۇنيەگە اكەلگەن.
2019 جىلدىڭ قاڭتارىندا استانادا 5 بالانىڭ ورتتەن قازا بولۋى بۇكىل ەلدى ءدۇر سىلكىندىردى. وسى قايعىلى وقيعادان كەيىن ءلاززات قوجاحمەتوۆا قاراعاندى قالاسىندا «تالبەسىك» كوپبالالى انالار وداعى» قوعامدىق ۇيىمىن قۇرىپ, وڭىردەگى كوپبالالى انالاردىڭ باسىن قوستى.
جۋرناليستىك تاجىريبەسىن پايدالانىپ, ول كوپبالالى انالارعا مەملەكەتتىك باعدارلامالاردى قاراپايىم ءارى تۇسىنىكتى تىلدە جەتكىزدى. جاردەماقى الۋ, باسپانا كەزەگىنە تۇرۋ, الەۋمەتتىك قولداۋ تەتىكتەرى تۋرالى اقپارات بەرىپ, كوپتەگەن وتباسىنىڭ ماسەلەسىن شەشۋگە كومەكتەستى.
2020 جىلدان باستاپ ونىڭ باستاماسىمەن «تالبەسىك» ۇيىمى وبلىس ورتالىعى مەن اۋداندارىندا «شاڭىراق» وتباسى ورتالىقتارىن اشتى. بۇل ورتالىقتار تەك كوپبالالى انالارعا عانا ەمەس, ومىرلىك قيىن جاعدايعا تاپ بولعان بارلىق وتباسىلارعا كومەك كورسەتەتىن ماڭىزدى الەۋمەتتىك الاڭعا اينالدى.
اقمارال ءالنازاروۆا مەرەكە قارساڭىندا مەديتسينا قىزمەتكەرلەرىن ماراپاتتادى
ورتالىقتار ارقىلى كوپتەگەن وتباسى مەملەكەتتىك باعدارلامالارعا قاتىسىپ, باسپانالى بولدى. الەۋمەتتىك جاعدايى تومەن ازاماتتارعا جاردەماقىلار راسىمدەۋگە كومەك كورسەتىلدى. انالارعا كاسىپكەرلىك نەگىزدەرى بويىنشا تەگىن كۋرستار مەن شەبەرلىك ساباقتارى ۇيىمداستىرىلىپ, قۇقىقتىق جانە پسيحولوگيالىق كەڭەس بەرىلدى. ءلاززات قوجاحمەتوۆانىڭ مۇرىندىق بولۋىمەن كوپبالالى جانە مۇمكىندىگى شەكتەۋلى بالاسى بار وتباسىلار قايىرىمدىلىق نەگىزدە باسپانالى بولدى.
ءلاززات تايمىرقىزى قاراعاندى قالاسىندا جانە شەت, بۇقار جىراۋ, قارقارالى اۋداندارىندا اشىلعان وسى ورتالىقتاردىڭ جۇمىسىن ۇيلەستىرىپ, وتباسى ينستيتۋتىن نىعايتۋ ءىسىن جۇيەلى جولعا قويدى. سونىمەن قاتار قازاقستان حالقى اسسامبلەياسىنىڭ قاراعاندى وبلىسىنداعى انالار كەڭەسىنىڭ توراعاسى بولىپ, وڭىردەگى بەلسەندى انالاردى بىرىكتىردى.
وبلىستىق ءماسليحات دەپۋتاتى رەتىندە دە ول وڭىردەگى الەۋمەتتىك باستامالاردىڭ بەل ورتاسىندا ءجۇردى.
2023 جىلى ءلاززات قوجاحمەتوۆا قاراعاندى قالاسىنداعى «وتباسىن قولداۋ ورتالىعى» مەملەكەتتىك مەكەمەسىنىڭ باسشىسى بولىپ تاعايىندالدى.
ونىڭ باستاماسىمەن تۇرمىستىق زورلىق-زومبىلىق بەلگىلەرى بار ازاماتتارعا ارنالعان ۋاقىتشا تۇراق-جاي اشىلدى. 111 بايلانىس ورتالىعى ارقىلى جۇگىنگەن ازاماتتارعا 14 ورىندىق قاۋىپسىز باسپانا ۇسىنىلىپ, كوپتەگەن وتباسىعا ناقتى كومەك كورسەتىلدى.
ءلاززات تايمىرقىزى ءۇشىن باستى قۇندىلىق − حالىقتىڭ يگىلىگى. ول قاي سالادا ەڭبەك ەتسە دە ادالدىق پەن جاۋاپكەرشىلىكتى باستى قاعيدا ەتىپ كەلەدى.
جان-تانىمەن قوعامعا قىزمەت ەتىپ جۇرگەن ول مىڭداعان انانىڭ سەنىمىنە يە بولىپ, كوپتەگەن وتباسىنىڭ تىرەگىنە اينالدى.
ۇلتتىق دەڭگەيدەگى قوعامدىق قىزمەت
ارىپتەستەرىنىڭ ايتۋىنشا, ءلاززات تايمىرقىزى قوعامدىق ومىردە ءاردايىم بەلسەندىلىك تانىتىپ, الەۋمەتتىك ماسەلەلەردى باتىل كوتەرەتىن قايراتكەر.
ول «Talbesik» كوپبالالى انالار وداعى» قوعامدىق بىرلەستىگىنىڭ جەتەكشىسى رەتىندە پرەزيدەنت جانىنداعى ۇلتتىق قوعامدىق سەنىم كەڭەسىنىڭ, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ, ۇلتتىق قۇرىلتايدىڭ مۇشەسى بولدى.
بۇل الاڭداردا ول انالار مەن وتباسىلاردىڭ ماسەلەسىن كوتەرىپ, الەۋمەتتىك ساياساتتى جەتىلدىرۋگە قاتىستى ناقتى ۇسىنىستار ايتتى. ونىڭ كوپتەگەن باستامالارى مەملەكەتتىك باعدارلامالار مەن زاڭنامالىق وزگەرىستەردىڭ نەگىزىنە اينالدى.
ەڭبەك – ەل قۇرمەتىنىڭ ولشەمى
ءلاززات قوجاحمەتوۆانىڭ قوعامدىق قىزمەتى مەن ەڭبەگى جوعارى باعالانىپ كەلەدى. ول قاراعاندى وبلىسى اكىمىنىڭ «التىن سۇڭقار», قاراعاندى قالاسى اكىمىنىڭ «زامانداس» سىيلىقتارىنىڭ لاۋرەاتى.
سونىمەن قاتار قازاقستان رەسپۋبليكاسى پرەزيدەنتىنىڭ, «AMANAT» پارتياسى توراعاسىنىڭ, مينيسترلەر مەن اكىمدەردىڭ قۇرمەت گراموتالارى مەن العىس حاتتارىمەن ماراپاتتالعان.
ول «حالىق العىسى», «ەرەن ەڭبەگى ءۇشىن», «تاۋەلسىزدىككە 30 جىل», «كونستيتۋتسياعا 30 جىل», «قازاقستان حالقى اسسامبلەياسىنا 30 جىل» مەدالدارىنىڭ جانە «قۇرمەت» وردەنىنىڭ يەگەرى.
قىزىلوردا قالاسىندا وتكەن ۇلتتىق قۇرىلتاي وتىرىسىندا مەملەكەت باسشىسى ءلاززات قوجاحمەتوۆانىڭ كەۋدەسىنە «قۇرمەت» وردەنىن تاقتى. بۇل – ەل دامۋىنا, ازاماتتىق قوعامنىڭ نىعايۋىنا جانە الەۋمەتتىك ماسەلەلەردى شەشۋگە قوسقان ۇلەسىنىڭ جوعارى باعالانۋى.
وسى رەتتە پرەزيدەنت قاسىم-جومارت توقاەۆ جەتى جىل قاتارىنان 8 ناۋرىز مەرەكەسى قارساڭىندا ءلاززات قوجاحمەتوۆاعا قۇتتىقتاۋ حات جولداعانىن ايتا كەتكەن ءجون.
قازىرگى تاڭدا ءلاززات قوجاحمەتوۆا استانا قالاسىندا ەڭبەك ەتىپ جاتىر. ول مادەنيەت جانە اقپارات مينيسترلىگىنە قاراستى ەتنوسارالىق قاتىناستاردى دامىتۋ كوميتەتىنىڭ «قوعامدىق كەلىسىم» رمم اقپاراتتىق جۇمىس جانە قوعاممەن بايلانىس باسقارماسىنىڭ باسشىسى قىزمەتىن اتقارادى.
بۇل قىزمەتتە ول قوعامداعى كەلىسىم مەن بىرلىكتى نىعايتۋعا باعىتتالعان اقپاراتتىق ساياساتتى جۇزەگە اسىرىپ كەلەدى.
ۇلتتىڭ ۇيىتقىسى, ۇرپاقتىڭ تىرەگى
ءلاززات قوجاحمەتوۆانىڭ ءومىر جولى – قوعامعا قىزمەت ەتۋدىڭ, ازاماتتىق جاۋاپكەرشىلىكتىڭ جانە انالىق مەيىرىمنىڭ جارقىن ۇلگىسى.
جۋرناليستيكادا – شىندىقتى ايتقان قالامگەر, ءبىلىم سالاسىندا – جاس بۋىندى تاربيەلەگەن ۇستاز, قوعامدا – مىڭداعان انانىڭ جاناشىرى, مەملەكەتتىك قىزمەتتە – حالىق مۇددەسىن قورعاعان باسشى.
وسىنداي تۇلعالاردىڭ ءومىر جولى بۇگىنگى قوعام ءۇشىن دە, كەلەشەك ۇرپاق ءۇشىن دە ۇلكەن ونەگە. ءلاززات تايمىرقىزىنىڭ ەڭبەگى – ءبىر عانا ادامنىڭ تابىسى ەمەس, تۇتاس قوعامنىڭ ءۇمىتى مەن سەنىمىن اقتاعان ەڭبەك.
سوندىقتان ونىڭ ءومىر جولى – قازاق ايەلىنىڭ قايسارلىعى مەن پاراساتىنىڭ, مەيىرىمى مەن جاۋاپكەرشىلىگىنىڭ ايقىن كورىنىسى.
