ارقالى اقىننىڭ مەرەيتويى كىندىك قالادان باستالۋى بەكەر ەمەس. ويتكەنى ەل ورداسى الاتاۋدان ارقاعا بەت العان ۇلى كوشپەن بىرگە سەرىك تۇرعىنبەك ۇلى دا باس شاھارعا قونىس اۋدارعان ەدى. جاڭا ەلوردا اقىنعا ەكىنشى تىنىس بەردى. استانا تۋرالى بىرنەشە تۋىندى جازدى. تاريحي داستاندارى ومىرگە كەلدى. درامالىق شىعارمالارى قويىلدى. ءسويتىپ, اقىننىڭ ەلوردامەن بىرگە شىعارماشىلىعى دا ءوسىپ, كەمەلدەندى.
ءىس-شارا تىزگىنىن اقىن داۋلەتكەرەي كاپ ۇلى ۇستادى. كەش قۇتتىقتاۋلارمەن باستالدى. مەملەكەتتىك كەڭەسشى ەرلان قاريننىڭ قۇتتىقتاۋىن اقىن قالقامان سارين وقىدى. ودان كەيىن ۇلتتىق اكادەميالىق كىتاپحانانىڭ ديرەكتورى كۇمىس سەيىتوۆا مەرەيتوي يەسىنە ىزگى لەبىزىن ءبىلدىرىپ, سىي-سياپات كورسەتتى. سونداي-اق جازۋشىلار وداعى استانا قالالىق فيليالىنىڭ ديرەكتورى باۋىرجان باباجان ۇلى وداق توراعاسى مەرەكە قۇلكەنوۆتىڭ قۇتتىقتاۋ حاتىن تاپسىرىپ, اقىن يىعىنا شاپان جاپتى.
كەش بارىسىندا جازۋشى, مەملەكەتتىك سىيلىقتىڭ لاۋرەاتى الدان سمايىل مەرەيتوي يەسىنىڭ شىعارماشىلىعى تۋرالى پاراساتتى وي ايتتى.
– ءبىز سەرىك ەكەۋمىز تۇيدەي قۇرداسپىز. الماتىداعى قازاق ۇلتتىق ۋنيۆەرسيتەتىندە قاتار وقىدىق. سول جىلدارى اتالعان وقۋ ورنىندا ادەبيەت ۇيىرمەسى بولىپ, سوندا جاس اقىنداردىڭ پوەزيا كەشتەرى ءجيى وتەتىن. بىردە كەڭشىلىك مىرزابەكوۆ پەن سەرىك تۇرعىنبەكوۆتىڭ قاتىسۋىمەن سونداي جىر كەشى ءوتتى. ەكەۋى ءبىر-بىرىمەن جارىسىپ ولەڭ وقىدى. ەكەۋىنىڭ دە ولەڭدەرى تۋعان جەرى – تورعايدىڭ سايىن دالاسىنداي كەڭ. ەكەۋىنىڭ دە پوەزياسى باسقا اقىندارعا قاراعاندا تىنىستى, كوركەمدىگى, قۇرىلىمى باسقاشا ەدى. سونداي-اق سەرىكتىڭ جايساڭ مىنەزى مەن تازالىعىن قازاقتىڭ تۇلعالى ازاماتتارى ەرەكشە جاقسى كوردى. ماسەلەن, جازۋشى ساكەن ءجۇنىسوۆ: «مەن كورگەندەردىڭ ىشىندە ناعىز اقىن بولىپ جاراتىلعان وسى – سەرىك تۇرعىنبەك» دەيتىن. ءدال وسى ءسوزدى اقسەلەۋ سەيدىمبەكتەن دە ەستىدىم, – دەدى قالامگەر.
ال عالىم, مەملەكەتتىك سىيلىقتىڭ لاۋرەاتى ساۋىتبەك ابدراحمانوۆ سەرىك اعامىزدىڭ اقىندىق مىنەزى مەن پوەزياسى تۋرالى قىزىقتى اڭگىمە ءوربىتتى.
– سەكەڭنىڭ بۇكىل پوەزياسى تورعايدىڭ توسىنەن ەسكەن سارىارقانىڭ سامالى سەكىلدى قاراپايىم كەلەدى. قوڭىر جەل سەكىلدى وقىرماندى شارشاتپايدى. توگىلىپ, قۇيىلىپ جاتادى. ودان سونشالىقتى مەتافورالىق تەڭەۋ ىزدەۋ كەرەك ەمەس. قازاقتىڭ ولەڭى نەگىزىنەن قاراپايىم بولعان. وسى تۇرعىدان العاندا سەكەڭنەن ۇيرەنەتىن قاسيەت كوپ, – دەدى ول.
سونىمەن بىرگە كەش بارىسىندا بەلگىلى ديپلومات سايلاۋ باتىرشا ۇلى, عالىم, جازۋشى تۇرسىن جۇرتباي, قالامگەر جولتاي ءالماش ۇلى, اكادەميك كارىمبەك قۇرماناليەۆ, سىنشى امانگەلدى كەڭشىلىك ۇلى, اقىن مۇحاربەك جاكەي ايتۋلى ازاماتتىڭ شىعارماشىلىعى تۋرالى جىلى پىكىرلەرىن ءبىلدىردى. مەرەيتوي يەسىنىڭ ولەڭىنە جازىلعان اندەر ورىندالدى. ءىس-شارا سوڭىندا سەرىك تۇرعىنبەك ۇلى ءسوز الىپ, جينالعان قاۋىمعا ريزاشىلىعىن جەتكىزدى.
