فوتو: ەرلان ومار (EQ)
سالتاناتتى ءىس-شاراعا فيلولوگيا عىلىمدارىنىڭ دوكتورى, پروفەسسور تۇرسىن جۇرتباي قاتىسىپ, الاش رۋحانياتى تۋرالى ءسوز سويلەدى.
ء«اليحان بوكەيحان جانە ول تۇيىندەپ بەرگەن يدەيا ناتيجەسىندە قازاقتىڭ تاۋەلسىزدىك نىساناسى بەكىدى. ول قازاقتىڭ مۇددەسىنە كەشەگى كۇنى قىزمەت ەتكەن, بۇگىن دە, ەرتەڭ دە قىزمەت ەتە بەرەدى. ۇلت كوشباسشىسىنىڭ ءومىرى مەن شىعارماشىلىعىنا بايىپتى كوزقاراس, سىندارلى زەرتتەۋ ءالى دە قاجەت. جۇرت ىسىندە جۇمىلاتىن جاستار باردا الەكەڭنىڭ تىككەن تۋى قاشاندا بيىك بولادى», دەدى ت. جۇرتباي.
راسىندا, ءاليحان بوكەيحان باتقان كۇننىڭ شۇعىلاسىنان ەمەس, اتار تاڭنىڭ شاپاعىنان كوپ ءۇمىت كۇتتى. وقىعان جاستارعا سەنىم ارتىپ, ەل كەلەشەگىن سولاردىڭ ءبىلىم-بىلىگى مەن ازاماتتىق جاۋاپكەرشىلىگىنە تاپسىردى. ء«بىز – سۋدى تەرىس اعىزعان اتانىڭ بالاسىمىز» دەپ ارۋاقتى بابالارعا يىق تىرەي وتىرىپ, «الدا ءالى كۇندى كورە بىلەتىن ۇرپاق كەلەدى» دەپ ەرتەڭگە ەلجىرەي قارايدى. سالتاناتتى راسىمدە الاشتانۋشى, پروفەسسور ايگۇل ىسماقوۆانىڭ دا ءسوزى وسى ويدى قۋاتتادى.
ء«بىز بەيبىت حالىقپىز. سونىمىزبەن باسقاعا ۇلگى كورسەتىپ كەلەمىز. ادامدىق مۇراتتى بارىنەن جوعارى قوياتىن تولەرانتتى, زايىرلى مەملەكەت – ەلدىڭ باقىتى. مۇنىڭ باسىندا ءاليحان بوكەيحان تۇجىرىمداعان الاش يدەياسى تۇر», دەدى ا. ىسماقوۆا.
تاعىلىمدى ءىس-شارادا الاش ارداقتىلارىنا تاعزىم ەتىلىپ, ارۋاقتارىنا قۇران باعىشتالدى.
