«اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا كەيىنگى ەكى جىلدىڭ ىشىندە وبلىستا 38 مەديتسينالىق نىسان سالىنىپ, پايدالانۋعا بەرىلدى. وعان 9 ملرد تەڭگەدەن استام قاراجات بولىنگەنى تۋرالى الماتى وبلىستىق دەنساۋلىق ساقتاۋ باسقارماسىنىڭ باسشىسى ەرجان سۇلەيمەنوۆ اتاپ ءوتتى.
«بۇگىندە حالىق تىعىز قونىستانعان قاراساي اۋدانىنىڭ اباي مەن ۇشتەرەك اۋىلدارىندا مەديتسينالىق-سانيتارلىق العاشقى كومەك ورتالىقتارى اشىلىپ جاتىر. قوس اۋىل ءۇشىن بۇل ۇلكەن جاڭالىق. جاڭا نىساندار زامانعا ساي سالىنىپ, زاماناۋي تەحنيكامەن جاراقتاندىرىلعان. بۇلاردىڭ ارقايسىسى 50 ادامدى قابىلداۋعا قاۋقارلى. ولار بىلىكتى, تاجىريبەلى دارىگەرلەرمەن, ورتا بۋىن مەديتسينا ماماندارىمەن قامتىلعان. حالىققا قالتقىسىز قىزمەت كورسەتۋ – باستى ماقساتىمىز. وسى كۇنى اباي اۋىلىندا 50 مىڭعا تاياۋ حالىق تۇرادى. سوعان وراي مەديتسينالىق كومەكتىڭ اۋقىمىن كەڭەيتىپ, دارىگەرلەر سانىن ارتتىرۋ دا ماڭىزدى», دەدى باسقارما باسشىسى.
جاڭا مەديتسينالىق نىساننىڭ اشىلۋ سالتاناتىنا اۋىلدىڭ اقسامايلى قاريالارى مەن تۇرعىندارى كوپتەپ جيىلدى. قۋانىشتى ءساتتىڭ كۋاگەرلەرىن قاراساي اۋدانىنىڭ اكىمى جاسۇلان ەستەنوۆ قۇتتىقتادى. ول ءوز سوزىندە اۋداننىڭ اقسەڭگىر, كوكتوعان, كەمەرتوعان اۋىلدارىندا دا جاڭا نىساندار بوي كوتەرىپ, پايدالانۋعا بەرىلگەنىن, الداعى ۋاقىتتا قاراتوبە اۋىلىنداعى فەلشەرلىك-اكۋشەرلىك پۋنكت ىسكە قوسىلاتىنىن اتادى.
«وسى رايىمبەك اۋىلدىق وكرۋگىنىڭ ورتالىعى اباي اۋىلىنداعى مەديتسينالىق مەكەمەدە 1978 جىلدان باستاپ باس دارىگەر بوپ جۇمىس ىستەپ, زەينەتكە شىقتىم. ول عيمارات وتە ەسكىرىپ, ەڭسەنى باساتىن ەدى. جاڭا عيماراتتىڭ اشىلۋىن اسىعا كۇتتىك, رازىمىز. ەلىمىزدىڭ وركەندەپ, كۇننەن-كۇنگە كوركەيىپ جاتقانىن ناقتى ىستەردەن سەزىنىپ جاتىرمىز. قاريالارعا قامقورلىق تانىتۋدان ايانبايتىن اق حالاتتى جاندارعا العىس ايتامىز», دەيدى اۋىل اقساقالى كوگەرشىن ءابدۋالي ۇلى.
اباي اۋىلىنىڭ تۇرعىندارىنا ەسىگىن ايقارا اشقان جاڭا مەديتسينالىق-سانيتارلىق العاشقى كومەك ورتالىعىنىڭ مەڭگەرۋشىسى ايجان بايماحانوۆا مۇندا بۇرىن-سوڭدى بولماعان ستوماتولوگيالىق, لابوراتوريالىق, اكۋشەر-گينەكولوگيالىق, فيزيوەمدەۋ, ەگۋ كابينەتتەرى, سونىمەن قاتار 5 توسەكتىك كۇندىزگى ستاتسيونار زاماناۋي قۇرال-جابدىقتارمەن جاراقتالعانىن قۋانا تىلگە تيەك ەتتى.
ەندى باسى اۋىرىپ, بالتىرى سىزداعان تۇرعىندار اناليز تاپسىرىپ, ءتىس ەمدەتۋ ءۇشىن اۋدان ورتالىعىنا سابىلماي, اۋىل ىشىندەگى سۋ جاڭا ورتالىقتىڭ بىلىكتى دارىگەرلەرىنە قارالىپ, ءتيىستى ەم-شارالارىن قابىلداي الادى.
ءدال وسىنداي جان جادىراتارلىق جاڭالىق ءتۇس اۋا ۇشتەرەك اۋىلىندا جالعاسىن تاپتى.
الماتى وبلىسى,
قاراساي اۋدانى
