سونىڭ ىشىندە يراننىڭ جوعارعى كوشباسشىسى اياتوللا ءالي حامەنەي جانە جوعارى لاۋازىمدى اسكەري باسشىلار, سونىڭ ىشىندە يسلام رەۆوليۋتسياسى ساقشىلار كورپۋسىنىڭ جەتەكشىسى قازا تاپتى.
تەگەران ديپلوماتياعا ءاردايىم اشىق بولدى
يراننىڭ سىرتقى ىستەر ءمينيسترى ابباس اراكچي جەكسەنبى كۇنى اقش پەن ءيزرايلدىڭ يرانعا جاساعان بىرلەسكەن سوققىلارىنان كەيىن تەگەران ءاردايىم ديپلوماتياعا اشىق بولعانىن ايتتى.
«يران ءاردايىم ديپلوماتياعا اشىق بولعان. بۇل امەريكالىقتارمەن كەلىسسوز جۇرگىزىپ وتىرعانىمىزدىڭ ەكىنشى قادامى ەدى جانە ولار كەلىسسوزدىڭ ءدال ورتاسىندا بىزگە شابۋىل جاساۋدى ءجون كوردى», دەدى ول.
اقش اسكەري ۇشاقتارى جەرگە قۇلادى
امەريكا قۇراما شتاتتارى قارۋلى كۇشتەرىنىڭ حابارلاۋىنشا, كۋۆەيتتىڭ اۋە قورعانىس جۇيەلەرى يرانعا قاتىستى وپەراتسيالارعا قاتىسىپ جاتقان ءۇش F-15 امەريكالىق جويعىش ۇشاقتى قاتەلەسىپ اتىپ ءتۇسىردى.
رەسمي اقپاراتتا ەكيپاجدىڭ التى مۇشەسىنىڭ بارلىعى ءساتتى كاتاپۋلت جاساپ, جەرگە قاۋىپسىز قونعانى جانە ولاردىڭ جاعدايى جاقسى ەكەنى ايتىلعان.
ءىرى مۇناي وڭدەۋ زاۋىتى جۇمىسىن توقتاتتى
يران پارسى شىعاناعى جاعالاۋىنداعى ساۋد ارابياسىنداعى Ras Tanura مۇناي وڭدەۋ زاۋىتىنا – تاياۋ شىعىستاعى ەڭ ءىرى كاسىپورىنداردىڭ بىرىنە شابۋىل جاسادى. مۇناي وڭدەۋ زاۋىتى جۇمىسىن توقتاتتى. ەلدىڭ قورعانىس مينيسترلىگى زاۋىتتاعى ءورت اتىپ تۇسىرىلگەن ەكى ۇشقىشسىز ۇشۋ اپپاراتى سىنىقتارىنىڭ قۇلاۋىنان شىققانىن حابارلادى.
اقش-تىڭ باحرەيندەگى ەلشىلىگى ءوز ازاماتتارىنا ماناماداعى قوناقۇيلەر شابۋىل نىساناسىنا اينالۋى مۇمكىن ەكەنىن ەسكەرتىپ, ول جەرلەردەن اۋلاق جۇرۋگە شاقىردى. ەسكەرتۋدە تەراكتىلەردىڭ كەنەتتەن بولۋى مۇمكىن ەكەنى ايتىلعان.
«قارا التىن» قىمباتتاپ, اكتسيالار ارزاندادى
تاياۋ شىعىستاعى تۇراقسىزدىققا بايلانىستى مۇناي باعاسى كۇرت ءوسىپ, اكتسيالار ارزاندادى.
دۇيسەنبى كۇنى مۇناي باعاسى ءوستى, ال قور نارىقتارى قىسىمعا ۇشىرادى, سەبەبى تاياۋ شىعىستاعى قاقتىعىس بىرنەشە اپتاعا سوزىلۋى مۇمكىن دەگەن قاۋىپ بار. بۇل جاھاندىق ەكونوميكالىق قالپىنا كەلۋگە نۇقسان كەلتىرىپ, ينفلياتسيانى قايتا ءورشىتۋى ىقتيمال.
Brent ماركالى مۇناي باعاسى ساۋدا-ساتتىقتىڭ باسىندا 13 پايىزعا قىمباتتاپ, باررەلىنە 82 دوللارعا جەتتى. بۇل – كەيىنگى 14 ايداعى ەڭ جوعارى كورسەتكىش. بىرىككەن اراب امىرلىكتەرى مەن كۋۆەيت توڭىرەكتەگى جاعدايعا بايلانىستى قور نارىقتارىن ۋاقىتشا جاپتى.
قىتاي شابۋىلداردى قاتاڭ ايىپتادى
قىتاي يراننىڭ جوعارعى كوشباسشىسىنا جاسالعان شابۋىلعا جانە ونىڭ قازاسىنا باتىل تۇردە قارسى شىعىپ, ونى قاتاڭ ايىپتادى. بۇل تۋرالى جەكسەنبى كۇنى قىتاي سىرتقى ىستەر مينيسترلىگىنىڭ رەسمي وكىلى جۋرناليستەر الدىندا مالىمدەدى.
قىتاي ديپلوماتى يراننىڭ جوعارعى كوشباسشىسىنا جاسالعان شابۋىل مەن ونىڭ ءولتىرىلۋى يراننىڭ ەگەمەندىگى مەن قاۋىپسىزدىگىن ورەسكەل بۇزۋ ەكەنىن اتاپ ءوتتى. ول بۇل ارەكەت بۇۇ جارعىسىنىڭ ماقساتتارى مەن قاعيداتتارىنا, سونداي-اق حالىقارالىق قاتىناستاردىڭ نەگىزگى نورمالارىنا قايشى ەكەنىن ايتتى.
