فوتو: ەنەرگەتيكا مينيسترلىگى
ەنەرگەتيكا ۆيتسە-ءمينيسترى ەرلان اقباروۆ ءىرى كومىر ءوندىرۋشى كومپانيالار وكىلدەرىمەن وتكەن كەڭەستە پرەزيدەنت تاپسىرمالارىنىڭ ورىندالۋ بارىسىن ايتتى. جيىندا كومىر گەنەراتسياسىن دامىتۋعا ارنالعان ۇلتتىق جوبا ازىرلەۋ ماسەلەسى تالقىلاندى.
جوبا قازاقستان ءۇشىن كومىردى تەك وتىن كوزى ەمەس, ەكونوميكانىڭ ۇزاق مەرزىمدى ستراتەگيالىق رەسۋرسى رەتىندە قاراستىرادى. ەل اۋماعىندا جالپى قورى 33 ملرد توننادان اساتىن كومىر بازاسىن ءتيىمدى پايدالانۋ كوزدەلىپ وتىر. بۇل باعىت ينۆەستيتسيا تارتۋعا, وندىرىستىك لوگيستيكانى جاڭعىرتۋعا جانە ەكولوگيالىق تالاپتارعا ساي تەحنولوگيا ەنگىزۋگە مۇمكىندىك بەرەدى.
كەڭەسكە نيكولاي رادوستوۆەتس, ەۆگەني ماستەرناك جانە پاۆەل چۋۆاشەۆ قاتىسىپ, ءوندىرىستى دامىتۋ جوسپارلارىن تانىستىردى.
اتاپ ايتقاندا, بوگاتىر كومىر جشس ءوندىرىس كولەمىن كەزەڭ-كەزەڭىمەن ۇلعايتۋدى جوسپارلاپ وتىر. كومپانيا 2024 جىلعى 42,7 ملن توننا ءوندىرىس دەڭگەيىن:
-
2026 جىلى – 45,2 ملن تونناعا
-
2032 جىلى – 56,5 ملن تونناعا دەيىن جەتكىزۋدى كوزدەيدى.
360 ملرد تەڭگە ينۆەستيتسيا ءوندىرىستى جاڭعىرتۋعا, تەحنيكا ساتىپ الۋعا جانە تسيكلدى-تولاسسىز تەحنولوگيا (تستت) نىساندارىن سالۋعا باعىتتالادى. سونىمەن بىرگە MES جۇيەسى ارقىلى جۇك اعىندارىن باسقارۋ جانە ءوندىرىس قاۋىپسىزدىگىن كۇشەيتۋ شارالارى ەنگىزىلىپ جاتىر.
ال شۇباركول كومىر اق 2026 جىلعا قاراي كومىر ءوندىرۋ كولەمىن 16,1 ملن تونناعا جەتكىزۋدى جوسپارلاپ وتىر. 2026-2032 جىلدار ارالىعىندا 95,5 ملرد تەڭگە ينۆەستيتسيا تارتۋ كوزدەلگەن.
بۇل قاراجات تەحنيكالىق قايتا جاراقتاندىرۋعا, تسيفرلىق تەحنولوگيالاردى ەنگىزۋگە جانە وندىرىستىك پروتسەستەردى اۆتوماتتاندىرۋعا جۇمسالادى. جوسپاردا:
-
تستاك-2 تسيكلدى-تولاسسىز ارشۋ كەشەنىنىڭ ەكىنشى كەزەڭىن ىسكە قوسۋ;
-
49,4 ملرد تەڭگەگە جابدىقتار پاركىن جاڭارتۋ;
-
Hovermap گەومونيتورينگ جۇيەسىن ەنگىزۋ;
-
روبوتتاندىرىلعان اۆتواۋدارعىش ساموسۆالداردى پايدالانۋ قاراستىرىلعان.
كەڭەس قورىتىندىسىندا ۆيتسە-مينيستر كومىر تاسىمالى ماسەلەسىنە ەرەكشە توقتالدى. جارتىلاي ۆاگوندار پاركىن كەڭەيتۋ جانە تەمىرجول ينفراقۇرىلىمىن جاڭعىرتۋ جۇمىستارى قاتار جۇرگىزىلۋى ءتيىس.
بۇل شارالار وتىن جەتكىزۋ تۇراقتىلىعىن ارتتىرىپ, ەلدىڭ ەنەرگەتيكالىق قاۋىپسىزدىگىن نىعايتادى. سونىمەن بىرگە كومىر سالاسىن تسيفرلاندىرۋ ءوندىرىستىڭ تيىمدىلىگىن كوتەرىپ, ەكولوگيالىق تالاپتاردى ساقتاۋعا مۇمكىندىك بەرەدى.
قازاقستان الداعى جىلدارى كومىر ءوندىرىسىن دامىتا وتىرىپ, ەنەرگەتيكالىق جۇيەنىڭ تۇراقتىلىعىن قامتاماسىز ەتۋدى جانە جاڭا ونەركاسىپتىك جوبالاردىڭ سۇرانىسىن تولىق وتەۋدى ماقسات ەتىپ وتىر.
