سۋرەت: primeminister.kz
ۆيتسە-پرەمەر نۇرا وزەنىنىڭ ارناسى بويىنداعى كوكپەكتى, بايقادام, پەتروۆكا, سارىتوبە, بوتاقارا, شەشەنقارا اۋىلدارىن, سونداي-اق «بايقادام», «مينكوۆسكايا» سۋ بوگەتتەرىن, اششىسۋ سۋ قويماسىن ارالادى. شەرۋباي-نۇرا وزەنى بويىنداعى قاراشوقى, بەسوبا, اقسۋ-ايۋلى, قايراقتى, نۇراتالدى, اقسۋ, شوپا ەلدى مەكەندەرى تەكسەرىلدى. سونىمەن قاتار كراسنايا پوليانا اۋىلىنداعى قورعانىس بوگەتتىرىنىڭ جاي-كۇيى قارالدى.
اباي اۋدانىندا يۋجنىي, قۇلاايعىر جانە تاسزاەمكا اۋىلدارى, سونداي-اق «شەرۋباي-نۇرا» مەن «جارتاس» سۋ قويمالارىنىڭ جاعدايى زەردەلەندى. بۇدان بولەك, قانات بوزىمباەۆ سامارقاند سۋ قويماسى گيدروتورابىنىڭ جۇمىسىمەن تانىسىپ, چكالوۆ اۋىلىنداعى قورعانىس بوگەتتەرىن تەكسەردى.
قاراعاندى وبلىسى اكىمدىگىنىڭ مالىمەتىنشە, وڭىردە نەگىزگى سۋ تاسقىنىنا قارسى ءىس-شارالار اياقتالعان. قازىر جۇمىستار تەمىرتاۋ قالاسىندا جالعاسىپ جاتىر. 25 شاقىرىم قورعانىس دامبالارى مەن بوگەتتەر سالىنىپ, نىعايتىلدى, وزەن ارنالارىنىڭ 28 شاقىرىمنان استام سۋ تاسقىنى قاۋپى بار ۋچاسكەلەرىنە ساناتسيا جۇرگىزىلدى, 21 شاقىرىم درەناج بەن سۋ بۇرۋ جۇيەلەرى تازارتىلدى. 54 اۆتوجول ۋچاسكەسىندە سۋ وتكىزۋ قابىلەتى ارتتىرىلدى, ءتورت گيدروتەحنيكالىق نىسانعا جوندەۋ جۇرگىزىلدى.
جەرگىلىكتى اتقارۋشى ورگاندار ماتەريالدىق-تەحنيكالىق جانە قارجىلىق رەزەرۆتەردى قالىپتاستىردى. شامامەن 1 ملن 200 مىڭ تەكشە مەتر قار شىعارىلدى. وبلىستىڭ 7 اۋدانى مەن 4 قالاسىندا سۋ باسۋ قاۋپى بار 139 ەلدى مەكەن, سونداي-اق اۆتوموبيل مەن تەمىرجولداردىڭ 130 قاۋىپتى ۋچاسكەسى ەرەكشە باقىلاۋعا الىنعان. 217 سۋ شارۋاشىلىعى نىسانى تۇراقتى مونيتورينگتە تۇر. قازىر وڭىردەگى سۋ تاسقىنى جاعدايى تۇراقتى. نەگىزگى سۋ قويمالارى شتاتتىق رەجىمدە جۇمىس ىستەپ تۇر. سامارقاند پەن ىنتىماق سۋ قويمالارىنان سانيتارلىق سۋ جىبەرۋ جۇرگىزىلىپ جاتىر. كوكتەمگى سۋ تاسقىنى جاعدايىنىڭ قولايسىز دامۋى كەزىندە قۇتقارۋ مەن وزگە دە جۇمىستاردى ۇيىمداستىرۋعا دايىندىق ماقساتىندا «كوكتەم-2026» رەسپۋبليكالىق كوماندالىق-شتابتىق وقۋ-جاتتىعۋى باستالدى. توتەنشە جاعدايلار مينيسترلىگى اۋماقتىق دەڭگەيدەگى حابارلاندىرۋ جۇيەسىنىڭ دايىندىعىن تەكسەردى.
1 ناۋرىزدان باستاپ توتەنشە جاعدايلاردىڭ الدىن الۋ ماقساتىندا ازاماتتىق قورعاۋدىڭ اۋماقتىق كىشى جۇيەسىنىڭ بارلىق كۇشتەرى مەن قۇرالدارى جوعارى دايىندىق رەجىمىنە كوشىرىلەدى. جاۋاپ بەرۋ شارالارىنا 3 579 ادام جانە 1 047 تەحنيكا بىرلىگى جۇمىلدىرىلعان.
