قالاي باستالدى؟
بۇعان مىسال رەتىندە «Digital Business» پەن «Astana Hub» بىرلەسكەن «ورتالىق ازيانىڭ 100 ستارتاپ تاريحى» جوباسىندا تانىستىرىلعان «Black Swan» ستارتابىن ايتۋعا بولادى. جۇيەنىڭ نەگىزىن قالاعان – الماتىلىق ينجەنەر-ازىرلەۋشى دارا تۇمەنباەۆا. كوماندا مي سيگنالدارى مەن قول قيمىلى ارقىلى درون باسقاراتىن نەيروقۇرىلعى ازىرلەپ جاتىر. ستارتاپتىڭ العاشقى سىناقتارى اقش-تا ءوتىپ, تەحنولوگيا قاناتقاقتى رەجىمدە قولدانىسقا ەنە باستاعان.
دارا تۇمەنباەۆا بۇعان دەيىن بىرنەشە ەلدە ءبىلىم الىپ, ازيا مەن ەۋروپادا جۇمىس ىستەگەن. يسپانيادا «Amazon» كومپانياسىندا ەڭبەك ەتىپ, ءوز جوبالارىن دامىتقان. سونىڭ ءبىرى – دەرماتولوگيا جانە ەستەتيكا مەديتسيناسىنا ارنالعان «Doro AI» ستارتابى. پلاتفورما كوسمەتولوگيالىق ەم-شارادان كەيىن ادامنىڭ سىرت كەلبەتى قالاي وزگەرەتىنىن الدىن الا كورسەتەدى ەكەن, ءتىپتى بىرنەشە ەلدەگى كلينيكالارمەن جۇمىس تا جولعا قويىلعان. الايدا اتالعان جوبا قوماقتى تابىس اكەلسە دە دارا بۇل باعىتتان ءمان تاپپاعان. ءسويتىپ, ول ادامداردىڭ نازاردى قالاي شوعىرلاندىراتىنىن زەرتتەي باستايدى. وسى ىزدەنىس ونى ءينۆازيۆتى ەمەس نەيروتەحنولوگياعا الىپ كەلەدى. ياعني بۇل جۇيە وپەراتسيا جاساماي-اق, باس تەرىسى ارقىلى مي سيگنالدارىن ولشەيدى.
دارانىڭ تۇسىندىرۋىنشە, مۇنداي قۇرىلعى ويدى وقىمايدى. سەنسورلار ادامنىڭ نازارىن قالاي شوعىرلاندىرىپ تۇرعانىن, الاڭداۋىن نەمەسە بوساڭسۋىن تىركەيدى. جينالعان دەرەكتەر دۇرىس تالدانسا, ەشقانداي باتىرماسىز-اق قۇرىلعىنى باسقارۋعا بولادى. سىرت كوزگە «وي كۇشىمەن باسقارۋ» سياقتى كورىنەتىنى سوندىقتان. وسى يدەيا كەيىن «Black Swan» جوباسىنا اينالعان.
قازىر قاي كەزەڭدە؟
«Black Swan» وسى كۇنى زەرتحانالىق دەڭگەيدەن شىعىپ, شىنايى ورتادا جۇمىس ىستەپ جاتىر.
«ادام بارىنشا زەيىن قويعان كەزدە ميدا جوعارى جيىلىكتى تولقىندار باسىم بولادى. جۇيە سونى تىركەيدى دە, درون قوزعالا باستايدى. ال زەيىن شاشىراي سالىسىمەن, جۇيە ونى دا بايقايدى, سول كەزدە درون توقتايدى», دەيدى جوبا جەتەكشىسى.
كوماندا بۇل ستارتاپتى قول قيمىلىن وقيتىن بىلەزىكتەرمەن تولىقتىرعان. ياعني جۇيە ءبىر جاعىنان ادامنىڭ نازار قويۋىن, ەكىنشى جاعىنان قولدىڭ قاراپايىم ارەكەتتەرىن تىركەپ, ءبارىن ءبىر كوماندالار جيىنتىعىنا اينالدىرادى.
قازىر تەحنولوگيانى قاناتقاقتى رەجىمدە سىناپ جاتقان العاشقى قولدانۋشىلار بار. ولاردىڭ اراسىندا ءىس-شارا كەزىندە درون ارقىلى ءتۇسىرىلىم جۇرگىزەتىندەر دە, روبوتتار جەكپە-جەگى سەكىلدى جوبالارعا قولداناتىندار دا كەزدەسەدى. سونىمەن بىرگە كوماندا سان-فرانتسيسكودا درون جارىستارىن ۇيىمداستىرىپ ءجۇر. بۇل كوپشىلىككە قىزىق فورمات بولعانىمەن, ستارتاپقا ەڭ ماڭىزدىسى, دەرەك جيناۋ. ءارتۇرلى ادامدار قاتىسقان سايىن جۇيە كوپ اقپارات جينايدى. دارانىڭ سوزىنشە, وسى ۋاقىتقا دەيىن مىڭعا جۋىق نەيرودەرەك جازباسى جينالعان. دەگەنمەن جوبانىڭ نەگىزگى باعىتى كوڭىل كوتەرۋ ەمەس, «DefenceTech» نارىعى.
ەندىگى مەجە قانداي؟
«Black Swan»-نىڭ الداعى ماقساتى – قورعانىس سالاسىنداعى تاپسىرىستارعا شىعۋ. دارا تۇمەنباەۆانىڭ ايتۋىنشا, بۇل باعىتتا ەڭ اۋەلى اقش قورعانىس مينيسترلىگى مەن ونىڭ زەرتتەۋ اگەنتتىگى – «Darpa» نازاردا تۇر. «Astana Hub» قولداۋىمەن كرەمني القابىنداعى «Silkroad Innovation Hub» بازاسىندا وتكەن باعدارلامالارعا قاتىسۋى دا اقش نارىعىنىڭ تالاپتارىن تەرەڭىرەك تۇسىنۋگە كومەكتەسكەن.
«الداعى كەزەڭدەگى باستى مىندەت جۇيەنىڭ دالدىگىن ارتتىرۋ. قازىر درون كوبىنە وپەراتور نيەتىنە ساي ارەكەت ەتكەنىمەن, كوماندا سيگنالداعى شۋ, كەنەتتەن كەلگەن كۇيزەلىس, زەيىننىڭ السىرەۋى سياقتى فاكتورلاردى اجىراتىپ, قاۋىپسىز رەجىمگە اۋىستىرۋ تەتىگىن جەتىلدىرىپ جاتىر. درون جارىسىن تۇراقتى وتكىزۋ – تەحنولوگيانى «دالا جاعدايىندا» ۇيرەتۋدىڭ ءبىر جولى. كەلەسى كەزەڭدە جارىس فورماتىن كۇردەلەندىرىپ, ءبىر ۋاقىتتا بىرنەشە قاتىسۋشىنى قوسۋ, تراسساعا كەدەرگىلەر ەنگىزۋ جوسپاردا بار», دەيدى دارا تۇمەنباەۆا.
سونىمەن «Black Swan» جوباسىنىڭ ناقتى پايداسى قاراپايىم, ياعني بۇل ادامعا قاۋىپتى جەردە دروندى تەز ءارى ىڭعايلى باسقارۋعا كومەكتەسەدى. كەي جاعدايدا وپەراتوردىڭ قولى بوس بولمايدى, كەيدە بايلانىس السىرەيدى, كەي ۋاقىتتا شەشىم ازداعان سەكۋند ىشىندە قابىلدانۋى كەرەك. وسىنداي ساتتە جۇيە ادامنىڭ زەيىنىن «وقىپ», درونعا كوماندا بەرۋدى جەڭىلدەتەدى. ەڭ ماڭىزدىسى – قاۋىپسىزدىك. ەگەر ادام شارشاسا, الاڭداسا, نە كەنەت كۇيزەلسە, درون قاتە قيمىل جاساپ كەتۋى مۇمكىن. ال بۇل جۇيە زەيىننىڭ السىرەگەنىن بايقاسا, دروندى توقتاتىپ نەمەسە قاۋىپسىز رەجىمگە اۋىستىرا الادى. سوندىقتان مۇنداي تەحنولوگيا قورعانىس پەن قاۋىپسىزدىك سالاسىندا عانا ەمەس, ىزدەۋ-قۇتقارۋ جۇمىستارى, تابيعي اپات كەزىندەگى بارلاۋ, قيىن جەرلەردە باقىلاۋ سياقتى باعىتتاردا دا قاجەت. ياعني «Black Swan» – «قىزىق ويىنشىق» ەمەس, قاۋىپتى جاعدايلاردا ادامدى قورعاپ, جۇمىستى جىلدامداتاتىن جاڭا قۇرال.
