ونىڭ ايتۋىنشا, وتىز جىلدا الەم جانە قوعام وزگەردى. جاڭا سۇرانىستار, جاڭا تالاپتار, جاڭا قۇندىلىقتار پايدا بولدى. كەيبىر ماسەلەلەردى قوعام 30 جىل بۇرىنعىداي ەمەس, قازىر مۇلدەم باسقاشا قابىلدايدى.
«مىسالى, ەكولوگيا ماسەلەلەرىن الايىق. قازىرگى قولدانىستاعى كونستيتۋتسيادا بۇل تاقىرىپ مۇلدەم قامتىلماعان. ءداستۇرلى قۇندىلىقتاردى قورعاۋ ماسەلەسى دە قازىر وزەكتى تاقىرىپقا اينالدى. 1995 جىلى مۇنداي مىندەت قويىلعان جوق. سونىمەن قاتار, جاڭا اتا زاڭدا مەملەكەتتىڭ زايىرلىق سيپاتى ناقتى بەكىتىلگەن. بۇل دا – قوعامدا سوڭعى جىلدارى قالىپتاسقان سۇرانىستاردىڭ ءبىرى. ءبىز, ارينە, رۋحاني دامۋدى, يماندىلىقتى قولدايمىز. بىراق, دەي تۇرعانمەن دە, مەملەكەت پەن ءدىننىڭ اراجىگىن اجىراتۋ كەرەك. «نەكە – ەر مەن ايەلدىڭ مەملەكەت زاڭعا سايكەس تىركەگەن ەرىكتى جانە تەڭ قۇقىقتى وداعى» دەگەن نورمانى ەنگىزدىك. ايەلدەردىڭ قۇقىقتارىن قورعاۋ دا وزەكتى ماسەلەگە اينالدى. جاڭا كونستيتۋتسيادا بۇعان قاتىستى دا ناقتى نورمالار قامتىلعان. مىنە, سوڭعى جىلدارى پايدا بولعان وسىنداي سۇرانىستاردى قالايدا ەسكەرۋ قاجەتتىلىگى تۋىندادى», دەدى مەملەكەتتىك كەڭەسشى.
وسى ورايدا ەرلان قارين قوعامدا ءجيى تالقىلاناتىن ماسەلە – «جاڭا كونستيتۋتسيا تەك بيلىكتىڭ عانا مۇددەسىن كوزدەپ وتىرعان جوق پا؟ قاراپايىم ادامداردىڭ مۇددەسى ەسكەرۋسىز قالعان جوق پا؟» دەگەن ساۋالعا ناقتى جاۋاپ بەردى.
«بۇل سۇراققا دا سەنىمدى تۇردە جاۋاپ بەرە الامىز. جاڭا كونستيتۋتسيا ەڭ الدىمەن ادامداردىڭ مۇددەسى, قۇقىقتارى مەن بوستاندىقتارىن ءبىرىنشى ورىنعا قويادى. 1995 جىلى قابىلدانعان قولدانىستاعى كونستيتۋتسيا نەگىزىنەن مەملەكەت مۇددەسى مەن وكىلەتتىگىن قامتىعان بولسا, جاڭا اتا زاڭ ەل دامۋىنىڭ ادامي ولشەمىن ەنگىزدى. سول ءۇشىن ادام قۇقىقتارى نەگىزگى باسىمدىق رەتىندە ايقىندالدى. جاڭا اتا زاڭدا «ادام» دەگەن ءسوز قازىرگى كونستيتۋتسيامەن سالىستىرعاندا 1,5 ەسە كوپ قولدانىلعان, ياعني, 76 رەت اتالعان. بۇل دا جايدان جاي ەمەس. ماسەلە قايتا-قايتا اتالۋىندا ەمەس, ماسەلە – كوپتەگەن نورمالاردا ادامنىڭ مۇددەسى, ادامنىڭ قۇقىقتارى قامتاماسىز ەتىلگەن. بۇل جايت جاڭا كونستيتۋتسيانىڭ قاراپايىم ادامداردىڭ مۇددەسىنە باعىتتالعانىن كورسەتەدى. سەبەبى, مەملەكەتتىڭ باستى قازىناسى دا, تىرەگى دە – ونىڭ ازاماتتارى», دەپ تۇيىندەدى ەرلان قارين.
