بۇل ۇدەرىستە حالىققا قىزمەت كورسەتۋ ورتالىقتارى ارقىلى ءجيى كورسەتىلەتىن توپ-10 قىزمەتكە باسىمدىق بەرىلگەن. اتالعان قىزمەتتەر فرونت-وفيستەردەگى جالپى وتىنىشتەردىڭ شامامەن 80 پايىزىن قۇرايدى. ولاردى ونلاين فورماتقا كوشىرۋ كەزەكتەردى قىسقارتۋعا, ازاماتتاردىڭ ۋاقىتىن ۇنەمدەۋگە جانە راسىمدەردىڭ اشىقتىعىن ارتتىرۋعا باعىتتالعان.
سونىڭ ىشىندە ەلەكتروندىق تسيفرلىق قولتاڭبا قىزمەتى تولىقتاي ونلاين فورماتقا اۋىستىرىلدى. 2025 جىلدىڭ تامىزىنان باستاپ ەتسق الۋ ءۇشىن حقو-عا بارۋ قاجەت ەمەس. ءوتىنىش بەرۋ جانە قولتاڭبانى الۋ مىندەتتى بيومەتريالىق سايكەستەندىرۋ ارقىلى قاشىقتان جۇزەگە اسادى.
ەندى حقكو-دان قۇجاتتى تاۋلىكتىڭ كەز كەلگەن ساتىندە الىپ كەتۋگە بولادى
قاشىقتان قىزمەت الۋعا دەگەن سۇرانىس بۇل شەشىمگە دەيىن-اق قالىپتاسقان. 2025 جىلدىڭ قاڭتار مەن تامىز ايلارى ارالىعىندا 26,7 ملن ەتسق ونلاين راسىمدەلسە, 1,2 ملن قولتاڭبا عانا حقو ارقىلى بەرىلگەن. ياعني, قولتاڭبالاردىڭ شامامەن 96 پايىزى قاشىقتان الىنعان, ال وفلاين وتىنىشتەردىڭ ۇلەسى 4 پايىزدى قۇراعان. 2026 جىلدىڭ قاڭتارىمەن سالىستىرعاندا بۇل ءۇردىس ودان ءارى كۇشەيىپ, بۇگىندە ازاماتتاردىڭ 99,6 پايىزدان استامى ەتسق-نى ونلاين فورماتتا الۋدى تاڭدايدى.
الەۋمەتتىك فاكتورلار دا نازاردان تىس قالعان جوق. ەگەر ازامات بيومەتريالىق سايكەستەندىرۋدەن بەس رەت وتە الماسا, قىزمەتتى حقو وپەراتورى ارقىلى وفلاين الۋ مۇمكىندىگى ساقتالادى. بۇل جاعدايدا قوسىمشا ءفوتوتۇسىرىلىم جۇرگىزىلىپ, جەكە باس دەرەكتەرى مودەراتور تەكسەرىسىنەن وتەدى.
سونىمەن قاتار جاڭا مەحانيزم ءموبيلدى ابونەنتتىك نومىرلەر تۋرالى مالىمەتتەردى وزەكتەندىرۋگە جول اشتى. بۇل SIM-كارتالاردى تىركەۋ جونىندەگى زاڭ تالاپتارىن ورىنداۋعا, نومىرلەردىڭ ءۇشىنشى تۇلعالار تاراپىنان قولدانىلۋىن ازايتۋعا جانە تسيفرلىق قاۋىپسىزدىكتى كۇشەيتۋگە ىقپال ەتىپ وتىر.
تۇرعىلىقتى مەكەنجايى بويىنشا تىركەلۋ قىزمەتى دە تولىقتاي تسيفرلىق فورماتقا كوشىرىلدى. 2025 جىلدىڭ 19 قاراشاسىنان باستاپ بۇل قىزمەت eGov پورتالى, eGov Mobile ءموبيلدى قوسىمشاسى جانە بانك قوسىمشالارى ارقىلى عانا قاشىقتان كورسەتىلەدى. تسيفرلاندىرۋ ومىرلىك جاعدايلاردى دا قامتىدى: قامقورشىلار, قورعانشىلار جانە جالدامالى پاتەردە تۇراتىن ازاماتتار بۇرىنعىداي حقو-عا بارىپ, قاعاز قۇجات تاپسىرماي-اق, تىركەۋ ءراسىمىن ونلاين ورىنداي الادى.
ء«بىزدىڭ باستى مىندەتىمىز – ازاماتتىڭ مەملەكەتپەن ءوزارا ارەكەتىن ءبىرتۇتاس ءارى تەحنولوگيالىق ەتۋ. بۇگىن كوپتەگەن ادامدار ەتسق راسىمدەۋدە تسيفرلىق جولدى تاڭداعانىن كورىپ وتىرمىز. بۇل تەك ۋاقىتتى ۇنەمدەۋ ەمەس, بۇل ەلىمىزدىڭ قاۋىپسىز تسيفرلىق ەكوجۇيەسىنىڭ نەگىزى. توپ-10 قىزمەتتى ونلاين فورماتقا كوشىرۋ رەسۋرستاردى باسقارۋ مودەلىن قايتا قاراۋعا مۇمكىندىك بەردى. بوساتىلعان الەۋەت يننوۆاتسيالىق سەرۆيستەردى دامىتۋعا جانە جاساندى ينتەللەكت شەشىمدەرىن ەنگىزۋگە باعىتتالدى», دەدى تسيفرلىق دامۋ جانە جاساندى ينتەللەكت ۆيتسە-ءمينيسترى روستيسلاۆ كونياشكين.
ستاتيستيكا دا بۇل وزگەرىستىڭ ناقتى ناتيجەسىن كورسەتەدى. 2024 جىلى حقو وپەراتورلارى ارقىلى 15,2 ملن مەملەكەتتىك قىزمەت كورسەتىلسە, 2025 جىلى بۇل كورسەتكىش 13 ميلليوننان ءسال استى. ياعني جەكە وتىنىشتەر سانى 2 ميلليونعا نەمەسە 13 پايىزعا ازايىپ, قىزمەت الۋشىلاردىڭ باسىم بولىگى eGov پورتالى, eGov Mobile قوسىمشاسى جانە وزىنە ءوزى قىزمەت كورسەتۋ ايماقتارىنا اۋىسقان.
ەندى مەرزىمى وتكەن جۇرگىزۋشى كۋالىگىن ونلاين اۋىستىرۋعا بولادى
جالپى, قولعا الىنعان شارالار تۇراقتى تسيفرلىق مەملەكەتتىك مودەلدى قالىپتاستىرۋعا باعىتتالعان. قىزمەتتەر جىلدامىراق ءارى تۇسىنىكتى بولا ءتۇسىپ, ۇنەمدەلگەن رەسۋرستار تەحنولوگيالىق ينفراقۇرىلىمدى دامىتۋعا جانە جاساندى ينتەللەكت سالاسىنداعى زاماناۋي شەشىمدەردى ەنگىزۋگە جۇمسالىپ جاتىر.
