سۋرەت: ernur.kz
پرەمەر-ءمينيستردىڭ ورىنباسارى مەملەكەت باسشىسى الەۋمەتتىك سالاعا ەرەكشە كوڭىل بولەتىنىن اتاپ ءوتتى. ازاماتتاردىڭ جاعدايى مەن ەلدىڭ تۇراقتى دامۋى جاڭا كونستيتۋتسيا جوباسىنىڭ نەگىزگى وزەگىنە اينالعانى ايتىلدى.
وتىرىستا ءمالىم ەتىلگەن باستى ماسەلەنىڭ ءبىرى حالىقتى جۇمىسپەن قامتۋ جايى بولدى. 2025 جىلدىڭ قورىتىندىسى بويىنشا ەلدە 2,9 ملن ساپالى جۇمىس ورنى ساقتالدى. 2026 جىلى وڭىرلىك جۇمىسپەن قامتۋ كارتالارى اياسىندا 547,7 مىڭ ادامدى جۇمىسقا ورنالاستىرۋ جوسپارلانىپ وتىر.
جيىندا جۇمىس ورنىنداعى ادام قاۋىپسىزدىگى مەن قورعالۋى دا قارالدى. «تسيفرلاندىرۋ جاعدايىندا ىڭعايلى ءارى تۇسىنىكتى كوممۋنيكاتسيا قۇرالدارىن ەنگىزۋ ماڭىزدى», دەپ اتاپ ءوتتى ا.بالاەۆا.
سونىمەن قاتار تاراپتاردىڭ كەپىلدىكتەرىن, قۇقىقتارى مەن مىندەتتەرىن ايقىندايتىن ەڭبەك شارتىن ازىرلەۋ تاپسىرىلدى. مينيسترلىكتىڭ باسىم مىندەتتەرىنىڭ ءبىرى – مۇگەدەك جانداردى كەشەندى الەۋمەتتىك قورعاۋ. ولاردى جۇمىسپەن قامتۋ تاسىلدەرىن جەتىلدىرۋ, تەحنيكالىق قاجەت قۇرالدارىمەن قامتاماسىز ەتۋ, ينفراقۇرىلىم نىساندارىنىڭ قولجەتىمدىلىگىن ارتتىرۋ ماسەلەلەرى وزەكتى ەكەنى ايتىلدى. سونداي-اق مۇگەدەكتىگى بار بالالاردى دامىتۋ مەن الەۋمەتتەندىرۋگە ەرەكشە نازار اۋدارىلدى.
مۇگەدەكتىكتى تاعايىنداۋ ءراسىمىنىڭ اشىقتىعىن قامتاماسىز ەتۋ ماقساتىندا پرەمەر-ءمينيستردىڭ ورىنباسارى دەنساۋلىق ساقتاۋ مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتتىق جۇيەلەرىن بىرىكتىرۋدى تاپسىردى. مەملەكەت باسشىسى جاريالاعان «تسيفرلاندىرۋ جانە جاساندى ينتەللەكت جىلى» اياسىندا مينيسترلىك الدىندا الەۋمەتتىك-ەڭبەك سالاسىن تەحنولوگيالىق تۇرعىدا جاڭعىرتۋ جونىندە اۋقىمدى مىندەت تۇرعانى ءسوز ەتىلدى.
وتىرىستا مينيستر اسقاربەك ەرتاەۆ بايانداما جاساپ, سالا جۇمىسىنىڭ ناتيجەلەرىن قورىتىندىلاپ, الداعى كەزەڭگە ارنالعان نەگىزگى مىندەتتەردى بەلگىلەدى.
