بيىل جىلىجايدا ول 200 مىڭ قىزعالداق ءوسىردى. ءوزىنىڭ جەكە يەلىگىندەگى جىلىجايدىڭ اۋماعى – 3 مىڭ شارشى مەتر. قىزعالداقتىڭ تۇقىمىن نيدەرلاندتان الدىرىپتى.
«كوپتەن بەرى جىلىجاي اشۋدى ويلاپ ءجۇر ەدىم. بىرنەشە جىلدان بەرى گۇل وسىرەمىن عوي. گۇلدى تەك وسىرۋمەن شەكتەلمەي, سورەگە دەيىنگى دايىندىعىن ءوزىم قاداعالايمىن. ءار ءىستىڭ وزىندىك قيىندىعى بولاتىنى سەكىلدى, گۇلدىڭ ءتۇر-ءتۇرىن ءوسىرۋ وڭاي ەمەس. اسىرەسە قىزعالداقتى جىلىجايدا ءوسىرۋ ءۇشىن الدىمەن توپىراقتى ساپالى دايىنداپ, تەمپەراتۋرانىڭ رەجىمىن قاتاڭ ساقتاۋ قاجەت. ۇدايى كۇتىم جاسالسا, قىزعالداقتىڭ تۇينەگى ءۇش ايدان سوڭ كورىنە باستايدى», دەيدى ب.ىسقاقوۆا.
گۇل ءوسىرۋشىنىڭ ايتۋىنا قاراعاندا, بيىلعى ايازدا جىلىجايداعى تەمپەراتۋرانى 14-16 گرادۋس شاماسىندا ۇستاۋ قيىندىق تۋدىرىپتى. بىراق بىرقالىپتى جىلۋدىڭ ناتيجەسىندە 200 مىڭ قىزعالداق ءوسىرىلىپتى.
«قىزعالداقتى ءوسىرۋ تاباندىلىق پەن شىدامدىلىقتى قاجەت ەتەدى. ءبىز 200 مىڭ قىزعالداقتى ءوزىمىزدىڭ 11 ساۋدا ورنىندا ساتۋ ماقساتىندا ءوسىرىپ وتىرمىز. ويتكەنى وعان سۇرانىس بار. دەگەنمەن بۇل – ماۋسىمدىق بيزنەستىڭ ءبىر ءتۇرى. سول سەبەپتەن قىزعالداق وسىرۋشىلەردىڭ دەنى بۇل ءىستى ءبىر-ەكى جىلدان سوڭ تاستاپ كەتەدى. ال ءبىز مۇنى تۇراقتى ءارى وتباسىلىق كاسىپكە اينالدىردىق», دەيدى ول.
كاسىپكەردىڭ پىكىرىنشە, قىزعالداققا سۇرانىس 8 ناۋرىز قارساڭىندا ارتا تۇسەدى. سوندىقتان جىلىجايدا وسىرىلگەن قىزعالداقتىڭ باسىم بولىگى سول كەزدە ساتىلىمعا شىعارىلادى. قازىر ونى وسىرۋگە 20-دان استام ادام جۇمىسقا تارتىلىپتى. دەنى – قىز-كەلىنشەكتەر. جىلىجايداعى جۇمىس تاۋلىك بويى جالعاسادى. ونىڭ كاسىبىنە ۇلى مەن كەلىنى قولداۋ كورسەتىپ وتىر.
«باستاپقىدا وتباسىلىق كاسىبىمىزگە اينالعان گۇلدىڭ سان ءتۇرىن شەتەلدەن تاسىمالدايتىن ەدىك. كەيبىرىن نيدەرلاندىدان, بەلارۋس پەن رەسەيدەن الدىردىق. بىراق جىل وتكەن سايىن لوگيستيكا مەن كەدەندىك راسىمدەۋگە بايلانىستى قيىندىق تۋىندادى. مۇنداي كەدەرگىدەن سوڭ گۇلدى, اسىرەسە قىزعالداقتى ءوزىمىز وسىرۋگە شەشىم قابىلدادىق», دەيدى كەلىنى ايگەرىم داۋلەتياروۆا.
قازىر پيون گ ۇلىنىڭ 11 500 تۇقىمىنا تاپسىرىس بەرىلىپتى. گۇلدىڭ بۇل ءتۇرىن ءۇش جىلدان كەيىن عانا ساتا الادى. ەندى جىلىجايدا حريزانتەما, راۋشان مەن باسقا گۇلدەردى ءوسىرۋ كوزدەلىپتى.
«بىلتىر ءبىر تال گۇلدى 800 تەڭگەدەن ساتقان ەدىك. بيىل ءوزىمىز وسىرگەن وتاندىق گۇلدىڭ ءبىر داناسىن 700 تەڭگەدەن ساتامىز. جىلىجايدا وسىرىلگەن گۇلدىڭ سانىن كوبەيتىپ, كورشىلەس وڭىرلەرگە جىبەرۋدى ماقسات ەتىپ وتىرمىز», دەيدى ب.ىسقاقوۆا.
اتىراۋ وبلىسى
