جيىننىڭ اشىلۋ سالتاناتىندا پرەزيدەنت جانىنداعى ۇلتتىق عىلىم اكادەمياسىنىڭ ءبىلىم جانە الەۋمەتتىك دامۋ ورتالىعىنىڭ باسشىسىتولەن جeڭىسبەك راديونىڭ ۇشقىر اقپارات قۇرالى رەتىندەگى ءرولىن اتاپ ءوتتى. زاماناۋي عىلىم مەن مەديانىڭ ۇشتاسۋى قوعام دامۋىنىڭ نەگىزگى قوزعاۋشى ەكەنىنە, جاساندى ينتەللەكت داۋىرىندە اقپاراتتىق قاۋىپسىزدىك پەن عىلىمي نەگىزدەلگەن كوممۋنيكاتسيانىڭ ءرولى ارتا تۇسەتىنىنە نازار اۋداردى.
جيىندا ەقىۇ باق بوستاندىعى جونىندەگى وكىلىنىڭ باس كەڭەسشىسى باربارا تريونفي تسيفرلىق ترانسفورماتسيا كەزىندە مەدياپليۋراليزمدى ساقتاۋ مەن ءسوز بوستاندىعىن قورعاۋدىڭ ماڭىزىن تىلگە تيەك ەتتى. ول جاساندى ينتەللەكت قۇرالدارىن پايدالانۋدا ەتيكالىق نورمالاردى ساقتاۋ قاجەتتىگىن باسا ايتتى.
بۇۇ-نىڭ قازاقستانداعى اقپاراتتىق بيۋروسىنىڭ باسشىسى ۆلاستيميل سامەك «جاساندى ينتەللەكت جۋرناليستيكاعا جاڭا مۇمكىندىكتەر اشۋمەن قاتار, اقپاراتتىڭ شىنايىلىعى مەن بەيبىتشىلىكتى نىعايتۋ جولىندا ۇلكەن جاۋاپكەرشىلىك جۇكتەيدى» دەپ اتاپ وتسە, يۋنەسكو ايماقتىق بيۋروسىنىڭ مامانى مادجەر ماسانوۆ مەديا جانە اقپاراتتىق ساۋاتتىلىق سالاسىنداعى ۇيىمنىڭ سوڭعى رەسۋرستارىمەن تانىستىرىپ, تسيفرلىق راديوتەحنولوگيالاردى مەڭگەرۋدىڭ ماڭىزىنا توقتالدى.
جۋرناليستيكا قالاي وزگەرىپ جاتىر: قازاقستاندا باق وكىلدەرى تسيفرلىق داعدىلاردى مەڭگەردى
تالقىلاۋعا قاتىسقان جەتەكشى باسىلىمداردىڭ باس رەداكتورلارى دا ماڭىزدى پىكىر ءبىلدىردى. «الماتى اقشامى» گازەتىنىڭ باس رەداكتورى ەسحات بوجان ءباسپاسوزدىڭ جۇمىسىن ۇيىمداستىرۋداعى جاڭا ۇردىستەردى اتاپ ءوتىپ, جاساندى ينتەللەكت كونتەنتىن ەتيكالىق رەتتەۋ ماسەلەلەرىن اتاپ ءوتتى. «Shalqar» راديوسىنىڭ باس رەداكتورى بولاتبەك تولەپبەرگەن ءداستۇرلى راديونىڭ تسيفرلىق ەكوجۇيەگە كوشۋ تاجىريبەسىمەن بولىسسە, «يۋريديچەسكايا گازەتا» باسىلىمىنىڭ باس رەداكتورى باحتيار توحتاحۋنوۆ قۇقىقتىق مەدياداعى جۋرناليست پەن جاساندى ينتەللەكت ءرولىنىڭ اراجىگىنە قاتىستى ماسەلە كوتەردى.
اقپاننىڭ سوڭىنا دەيىن جالعاساتىن قىسقى مەكتەپتە قىتاي, ورتالىق ازيا ەلدەرى مەن اۋعانستان, يەمەن, بانگلادەش جانە ەپيوفيادان كەلگەن جاس زەرتتەۋشىلەر بۇۇ-نىڭ تۇراقتى دامۋ ماقساتتارىن مەديا ارقىلى ناسيحاتتاۋدىڭ جاڭا ادىستەرىن مەڭگەرەدى.
قىسقى مەكتەپ جۇمىسى بولاشاق جۋرناليستەردىڭ كاسىبي بىلىكتىلىگىن ارتتىرىپ, حالىقارالىق ىنتىماقتاستىقتى نىعايتۋعا باعىتتالىپ وتىر.
