سۋرەتتەر: سالي سابيروۆ, تۇرار قازانعاپوۆ
سالتاناتتى ءراسىم «Beauty in Action», قازاقشالاساق «قوزعالىستاعى سۇلۋلىق» تۇجىرىمى اياسىندا ءوربىدى. شوۋ سپورت, ونەر جانە تابيعاتتىڭ ءوزارا ۇيلەسىمىن پاش ەتۋگە ارنالدى. ساحنانىڭ نەگىزگى ەلەمەنتى قوزعالىستى بەينەلەيتىن ەرەكشە قۇرىلىم بولدى. ول وليمپيادا وتكەن ءالپى تاۋلى ايماقتارى مەن يتاليانىڭ جازىقتاعى قالالارىن بايلانىستىراتىن نىشان رەتىندە ۇسىنىلدى. قويىلىم ۆەرونا فيلارمونيالىق تەاترىندا دا ءوتتى.
ءراسىم بارىسىندا جارىستار اياقتالعاننان كەيىنگى بىرلىكتى بىلدىرەتىن سپورتشىلار شەرۋى ءوتىپ, قاتىسۋشىلار ءوز ەلدەرىنىڭ بايراعىن الىپ شىقتى. ايتا كەتەرلىگى مۇندا تۋ ۇستاۋشى وكىل جالپى دەلەگاتتان بولەك ءجۇرىپ ءوتتى. ەلىمىزدىڭ كوك تۋىن يتاليا تورىندە مانەرلەپ سىرعاناۋشى ميحايل شايدوروۆ ۇستاپ شىقتى.
دجەكي چان, گەننادي گولوۆكين جانە ميحايل شايدوروۆ ميلاندا كەزدەستى
وليمپيادا كوميتەتىنىڭ مالىمەتىنشە, جابىلۋ سالتاناتىنىڭ قويىلىمىنا 800-دەن اسا ءانشى, مۋزىكانت جانە ءبيشى قاتىستى. ارنايى كوپدەڭگەيلى LED-ساحنا جاسالىپ, كوستيۋمدەر يتاليالىق وپەرا داستۇرىنە ساي تىگىلدى. ۇيىمداستىرۋشىلار ەرىكتىلەردىڭ ەڭبەگىن, سونداي-اق سپورتشىلاردىڭ وليمپياداعا دەيىن ءجۇرىپ وتكەن ۇزاق ءارى قيىن جولىن ايرىقشا اتاپ ءوتتى. مادەني باعدارلامادا يتاليالىق ءانشى اكيللە لاۋرو, اكتريسا بەنەدەتتا پوركارولي, ديدجەي ءارى پروديۋسەر گابري پونتە جانە وزگە دە ونەرپازدار ونەر كورسەتتى. الەمدىك بالەت جۇلدىزى روبەرتو بوللە جەتەكشىلىك ەتكەن اسەرلى حورەوگرافيالىق شىعارما كەشتىڭ ەرەكشە ساتتەرىنىڭ بىرىنە اينالدى.
ۇزدىك وندىق: قازاقستاندىق سپورتشىلار 2026 جىلعى وليمپيادادا ۇزدىكتەر قاتارىنان كورىندى
كەلەسى قىسقى وليمپيادا ويىندارىن فرانتسيا قابىلدايدى
ءداستۇر بويىنشا سالتاناتتى ءراسىمنىڭ نەگىزگى بولىگى اياقتالعان سوڭ وليمپيادا تۋى ءتۇسىرىلىپ, كەلەسى قىسقى وليمپيادانى قابىلدايتىن فرانتسيا وكىلدەرىنە تابىستالدى. 2030 جىلعى قىسقى وليمپيادا ويىندارى وسى مەملەكەتتە وتەدى. سونداي-اق ۇيىمداستىرۋشى ەل الداعى دودانىڭ «تاڭ شۋاعى» اتتى تانىستىرىلىمىن ۇسىندى. ودان كەيىن يتاليالىق سازگەر ليۋدوۆيكو ەيناۋديدىڭ اۋەنىمەن ميلان مەن كورتينادا جانعان 2026 جىلعى وليمپيادا الاۋى ءسوندىرىلدى.
ايتا كەتەيىك, يتالياداعى قىسقى وليمپيادا ويىندارىندا 18 التىن, 12 كۇمىس, 11 قولا مەدالمەن نورۆەگيا ەلى كوش باستادى. 12 التىن, 12 كۇمىس, 9 قولا جۇلدەمەن اقش قۇراماسى ەكىنشى ورىنعا جايعاستى. ۇزدىك ۇشتىكتى 10 التىن, 7 كۇمىس, 3 قولا يەلەنگەن نيدەرلاندى سپورتشىلارى تۇيىندەدى.
ال ەلىمىز 1 التىن مەدالمەن جالپىكوماندالىق ەسەپتە 19-ورىن الدى. بۇل – 1994 جىلعى ليللەحاممەر وليمپياداسىنان كەيىنگى ۇزدىك كورسەتكىش (12-ورىن). ميلاندا قورجىنعا جالعىز جۇلدەنى مانەرلەپ سىرعاناۋشى ميحايل شايدوروۆ سالدى. ول – سپورتتىڭ وسى تۇرىنەن وليمپيادا چەمپيونى اتانعان تۇڭعىش وتانداسىمىز. وسىعان دەيىن بۇل سپورت تۇرىنەن قازاقستان قورجىنىندا تەك قولا جۇلدە بولعان. اتالعان جۇلدەنى 2014 جىلعى قىسقى وليمپيادادا دەنيس تەن سالعان ەدى.
