فوتو: ۇوك
ەسكە سالايىق, ەل قورجىنىنا جالعىز جۇلدەنى مانەرلەپ سىرعاناۋشى ميحايل شايدوروۆ سالىپ, وليمپيادا چەمپيونى اتاندى. قازاقستان قۇراماسىنىڭ بىرنەشە وكىلى ءوز جارىستارىندا العاشقى وندىققا كىردى. ولاردىڭ كەيبىر جەتىستىكتەرى تاريحي ماڭىزعا يە بولدى.
ماسەلەن, يليا ميزەرنىح تاۋەلسىز قازاقستان تاريحىنداعى ەڭ ۇزدىك ناتيجەنى تىركەدى. شاڭعىمەن ۇلكەن تۇعىردان سەكىرۋدە ول سەگىزىنشى ورىن الىپ, وسى سپورت تۇرىندەگى ۇلتتىق رەكوردتى جاڭارتتى.
كونكيمەن جۇگىرۋشى نادەجدا موروزوۆا 3000 مەتر قاشىقتىقتا التىنشى بولىپ مارەگە جەتتى. بۇل - 1998 جىلى ليۋدميلا پروكاشەۆا وليمپيادادا قولا مەدال العاننان بەرگى ەڭ جوعارى ناتيجە. سونىمەن قاتار موروزوۆا 5000 مەتردە توعىزىنشى, كوماندالىق ءىز كەسۋ سايىسىندا سەگىزىنشى ورىن يەلەندى.
ونىڭ كوماندالاسى ەليزاۆەتا گولۋبەۆا دا ءۇش رەت ۇزدىك وندىققا ەندى. ول 1500 مەتردە - جەتىنشى, 3000 مەتردە - ونىنشى ورىن الدى. گولۋبەۆا جانە موروزوۆامەن بىرگە كوماندالىق ءىز كەسۋ سايىسىندا ارينا يلياششەنكو دا سەگىزىنشى ناتيجە كورسەتتى.
قازاقستاندىق كونكيمەن جۇگىرۋشى ەۆگەني كوشكين 500 مەتر قاشىقتىقتا توعىزىنشى ورىنعا تۇراقتادى.
شورت-ترەكشى دەنيس نيكيشا 500 مەتر قاشىقتىقتا جەتىنشى ورىن الىپ, جەكەلەي سايىستاعى ءوزىنىڭ ەڭ جوعارى ناتيجەسىنە قول جەتكىزدى.
فريستايل-اكروباتيكادان ارالاس كوماندالىق باسەكەدە قازاقستان قۇراماسى جەتىنشى بولدى. بۇل سىندا اسىلحان اسان, رومان يۆانوۆ جانە ايانا جولداس ونەر كورسەتتى. ايتا كەتەيىك, ەرلەر اراسىندا رومان يۆانوۆ 13-ورىن الىپ, ۇلتتىق قۇراما تاريحىنداعى ۇزدىك ناتيجەنى جاڭارتتى.
موگۋلشى اناستاسيا گورودكو دا ۇزدىك وندىققا ەندى. ول پاراللەلدى موگۋلدا شيرەك فينالعا دەيىن جەتىپ, سەگىزىنشى ورىن الدى. وسى ديستسيپلينادا پاۆەل كولماكوۆ توعىزىنشى ساتىعا جايعاستى.
مانەرلەپ سىرعاناۋدان ايەلدەر اراسىندا سوفيا سامودەلكينا قازاقستان تاريحىندا ەڭ جوعارى ناتيجەنى تىركەدى. قىسقا جانە ەركىن باعدارلامانىڭ قورىتىندىسى بويىنشا ول ونىنشى ورىنعا تۇراقتادى.
جالپى, ميلان-كورتينا-2026 وليمپياداسىندا قازاقستان اتىنان 36 سپورتشى 10 سپورت تۇرىندە سىنعا ءتۇستى.
قىسقى وليمپيادانىڭ سالتاناتتى جابىلۋ ءراسىمىن قايدان كورۋگە بولادى؟
