بۇگىندە بۇل مەكەندە 90 تۇرعىن ۇيدە 480 ادام تاتۋ-ءتاتتى ءومىر ءسۇرىپ كەلەدى. حالىق سانى از بولعانىمەن, اۋىزبىرشىلىگى مىعىم, قوعامدىق تارتىپكە دەگەن جاۋاپكەرشىلىگى جوعارى.
اۋىلداعى تۇراقتىلىق پەن تىنىشتىقتىڭ ساقتالۋىنا ۋچاسكەلىك پوليتسيا ينسپەكتورى سەرىك گابدۋلوۆ تە سۇبەلى ۇلەس قوسىپ كەلەدى. ول تۇرعىندارمەن تىعىز بايلانىس ورناتىپ, پروفيلاكتيكالىق جانە ءتۇسىندىرۋ جۇمىستارىن جۇيەلى تۇردە جۇرگىزەدى.
ەڭ باستى جەتىستىك – ولكەدە سوڭعى ءتورت جىل ىشىندە بىردە-ءبىر قىلمىس تىركەلمەگەن. بۇل – اۋىل تۇرعىندارىنىڭ ءوزارا قۇرمەت پەن جاۋاپكەرشىلىككە نەگىزدەلگەن ءومىر سالتىن تاڭداعانىن ايعاقتايدى.
اۋىلدىڭ تاعى ءبىر ەرەكشەلىگى – سوڭعى 15 جىل بويى مۇندا الكوگول ونىمدەرى ساتىلمايدى. بۇل باستاما اۋىل اقساقالدارى مەن بەلسەندى ازاماتتاردىڭ ورتاق كەلىسىمىمەن قابىلدانىپ, بۇگىندە يگى داستۇرگە اينالعان.
«ىشىمدىكتەن باس تارتۋ – قوعامدىق تۇراقتىلىقتىڭ, وتباسى بەرەكەسىنىڭ جانە ۇرپاق تاربيەسىنىڭ مىزعىماس تىرەگى بولىپ وتىر. اۋىل تۇرعىندارى بوس ۋاقىتىن ادال ەڭبەكپەن, سپورتپەن, ۇلتتىق جانە وتباسىلىق قۇندىلىقتاردى دارىپتەۋمەن وتكىزەدى», دەلىنگەن حابارلامادا.
اباي وبلىسىندا 15 اۋىل «ىشىمدىكسىز ەلدى مەكەن» مارتەبەسىن الدى
ايتا كەتەيىك, بۇگىندە اتىراۋ وبلىسى اۋماعىندا 56 ەلدىمەكەن الكوگولدەن باس تارتقان. مۇنداي اۋىلداردا قوعامدىق ءتارتىپ نىعايىپ, تۇرعىندار اراسىنداعى ءوزارا سىيلاستىق پەن سەنىم ارتا تۇسەدى.
