فورۋم بارىسىندا وبلىس اكىمى قۇمار اقساقالوۆ بۇگىندە ەلىمىزدە جاڭا قۇندىلىقتار قالىپتاسىپ, حالىقتىڭ قۇقىقتىق مادەنيەتى ارتىپ كەلە جاتقانىن تىلگە تيەك ەتە كەلىپ, وڭىردە قىلمىستىڭ الدىن الۋ ماقساتىندا جانە جاستاردى الەۋمەتتىك قولداۋ باعىتىندا اتقارىلىپ جاتقان جۇمىستارعا توقتالدى. اكىمنىڭ ايتۋىنشا, 2022 جىلى وبلىس اۋماعىندا 6 859 قىلمىستىق قۇقىق بۇزۋشىلىق تىركەلگەن. وسى كورسەتكىشتى ازايتۋ ماقساتىندا تۇرعىنداردىڭ, سونىڭ ىشىندە جاستاردىڭ قۇقىقتىق جاۋاپكەرشىلىگىن ارتتىرۋعا باعىتتالعان اۋقىمدى جۇمىس اتقارىلعان.
«اتاپ ايتقاندا, قوعامدىق ورىنداردا ەلەكتروندىق باقىلاۋ قۇرىلعىلارى ورناتىلىپ, پوليتسيانىڭ ماتەريالدىق-تەحنيكالىق الەۋەتى كۇشەيتىلدى. جول قوزعالىسى ەرەجەلەرىن بۇزۋشىلاردى اۆتوماتتى تىركەۋ جۇيەلەرى جاقسارىپ كەلەدى. سونىمەن قاتار جاستاردى جۇمىسپەن قامتاماسىز ەتۋ, تۇرعىن ءۇي ماسەلەسى دە رەت-رەتىمەن شەشىمىن تاۋىپ جاتىر. كەيىنگى جىلدارى قوستانايدا زاماناۋي تالاپتارعا ساي بىرنەشە زاۋىت ىسكە قوسىلدى. «كيا», «كامليت» سەكىلدى كومپانيالاردا بىرنەشە مىڭداعان جۇمىس ورىندارى اشىلدى. بۇل – ءبىزدىڭ جاستارعا بەرىلىپ وتىرعان زور مۇمكىندىك. بۇگىندە جاڭا ونەركاسىپ ورىندارىندا ەڭبەك ەتىپ جاتقان جۇمىسشىلاردىڭ 55 پايىزىن جاستار قۇرايدى. وڭىردە جۇزەگە اسىرىلىپ جاتقان «قوستاناي جاستارى» جوباسى اياسىندا 344 جاس وتباسى باسپانالى بولدى. بيىل وسى جوبا شەڭبەرىندە تاعى 100 جاس وتباسى پاتەر الادى», دەدى ق.اقساقالوۆ.
ءىس-شارانى ۇيىمداستىرىپ وتىرعان وبلىستىق پروكۋراتۋرا وكىلدەرى جاستار اراسىندا قۇقىقتىق مادەنيەتتى قالىپتاستىرۋ ماقساتىندا وقۋ ورىندارىندا ءتۇرلى مازمۇنداعى ءىس-شارالار وتكىزگەن. وسىنداي كەشەندى جۇمىستاردىڭ ناتيجەسىندە وبلىستا كەيىنگى ءۇش جىل ىشىندە قىلمىس دەڭگەيى 28 پايىزعا ازايعان. فورۋمدا ءسوز العان وبلىس پروكۋرورى مارات سەكسەمباەۆ وسى جايتتارعا توقتالا كەلىپ جاستارعا اقىل-كەڭەسىن ايتتى.
«بارلىعىڭىز – جاقسى, جاماننىڭ نە ەكەنىن اجىراتا الاتىن جاستاسىزدار. الدارىڭىزدان سان تاراۋ تاڭداۋ كۇتىپ تۇر. سوندىقتان ارقايسىڭىزعا الداعى جارقىن ومىرلەرىڭىزگە جول سالاتىن دۇرىس تاڭداۋ جاساي ءبىلۋ ماڭىزدى. ويتكەنى مەكتەپ, ۋنيۆەرسيتەتتە ساباقتا جىبەرگەن قاتەلىگى ءۇشىن بىرەۋ «ۇشتىك», بىرەۋ «تورتتىك» باعا الىپ جاتادى. كەيبىر قاتەلىكتەردى تۇزەتۋگە بولادى. كەشىگىپ قالساڭ, كەلەسىدە كەشىكپەۋگە تىرىساسىڭ, بىرەۋدى رەنجىتسەڭ, كەشىرىم سۇرايسىڭ. ال ەرەسەك ومىردەگى قاتەلىكتىڭ قۇنى مۇلدە باسقا. كەيبىر تۇزەتىلمەيتىن قاتەلىكتەر بولادى. ءومىر دەپ اتالاتىن بۇل ساپار ادامعا ءبىر-اق رەت بەرىلەدى. سوندىقتان سىزدەردەن وتىنەرىم – ءاردايىم دۇرىس تاڭداۋ جاساۋعا ۇمتىلىڭىزدار. ءيا, بۇگىن ستاتيستيكا جاقسارىپ كەلەدى. بىراق كەيىنگى بەس جىلدا وبلىستا 91 ءجاسوسپىرىمنىڭ سوتتالعانىن ايتپاسقا تاعى بولمايدى. سوندىقتان قازىردەن باستاپ جاقسى مەن جاماننىڭ پارقىن ايىرا ءبىلىپ, دۇرىس جولدى تاڭداۋ ماڭىزدى», دەدى م.سەكسەمباەۆ.
فورۋم اياسىندا «جاس قولداۋشى» تالىمگەرلەر كلۋبى اتتى جاڭا جوبانىڭ تۇساۋكەسەر ءراسىمى ءوتتى.
«اتالعان كلۋبتى جاستارعا اقىل-كەڭەس بەرەتىن, قولداۋ كورسەتەتىن, قيىن جاعدايدا قولۇشىن سوزىپ كومەك بەرەتىن ورتالىق دەسەك تە بولادى. ماقساتىمىز – ءىزىمىزدى باسىپ كەلە جاتقان ءىنى-قارىنداستارىمىزعا دۇرىس باعىت-باعدار بەرۋ, جول سىلتەۋ. ءبىز زاڭ مەن ءتارتىپ, ءبىلىم مەن پاراسات ۇستەمدىك قۇراتىن قوعام قۇرۋىمىز كەرەك. ال جازا باسسا, جازاعا تارتىلاتىندىعىن اركىم بىلۋگە ءتيىس. بۇگىندە جاستار اراسىندا زاڭمەن تىيىم سالىنعان تاۋارلاردى تاراتىپ جۇرگەندەر كوپ. وڭاي ولجاعا كەنەلەمىن دەپ اداسىپ جازا باسقان كەيبىر زامانداستارىمىز قىلمىستىق جاۋاپكەرشىلىككە تارتىلىپ, 5 جىلدان 10 جىلعا دەيىن باس بوستاندىعىنان ايىرىلىپ جاتىر. سونىڭ ءبارىن جاستارعا ءتۇسىندىرىپ, جاقسىلىققا قاراي جەتەلەپ, ءجون كورسەتۋدى كوزدەپ وتىرمىز», دەيدى كلۋب مۇشەسى سايد احماتجانوۆ.
ءىس-شارا سوڭىندا جاستار فورۋمعا ارنايى كەلگەن «پاترۋل» تەلەحيكاياسىنىڭ اكتەرلەرىمەن كەزدەستى.
قوستاناي وبلىسى
