وتىرىستا 10-نان استام سۇراق رەداكتسيالىق جانە ناقتىلاۋ سيپاتىندا بولدى. جيىندا سالىق قۇپياسىنا جاتپايتىن مالىمەتتەر تىزبەسىن كەڭەيتۋ ماسەلەسى, ەلەكتروندىق شوت-فاكتۋرالاردى جازۋ ءتارتىبى, وزگە دە تەحنيكالىق نورمالار تالقىلاندى. سونىمەن قاتار سۇراقتاردىڭ ءبىر بولىگى ينۆەستيتسيالىق نارىققا ىقپالى تۇرعىسىنان قاراستىرىلدى.
قازاقستان قارجىگەرلەر قاۋىمداستىعى كەڭەسىنىڭ توراعاسى ەلەنا باحمۋتوۆانىڭ مالىمەتىنشە, جاڭا سالىق كودەكسى اقشالاي نىساندا بەرىلگەن كرەديتتەر مەن ميكروكرەديتتەرگە قاتىستى پايىزداردى ققس-دان بوساتادى. الايدا بانكتىك كەپىلدىكتەر مەن كەپىلدىكتەر بەرۋ وپەراتسيالارى ققس-دان بوساتىلمايدى. فاكتورينگتىك وپەراتسيالار دا سالىق سالۋعا جاتادى.
فاكتورينگ – بۇل جەتكىزۋشى بانككە نەمەسە قارجى ۇيىمىنا تالاپ قويۋ قۇقىعىن بەرۋ ارقىلى تاۋار ءۇشىن تولەمدى مەرزىمىنەن بۇرىن الاتىن قۇرال. بىرقاتار بانكتەرگە بۇل ماسەلە وتە ماڭىزدى. ويتكەنى كليەنتتەرمەن جۇمىستىڭ ەداۋىر بولىگى كەپىلدىكتەر مەن فاكتورينگتىك وپەراتسيالار ارقىلى قۇرىلادى. دامىعان نارىقتاردا فاكتورينگ قارجىلىق قىزمەت رەتىندە قاراستىرىلادى ءارى ول بويىنشا پايىزدىق كىرىس ادەتتە ققس-دان بوساتىلادى. سالىق رەجىمىن حالىقارالىق تاجىريبەگە كەلتىرۋ قارجى نارىعىنىڭ باسەكەگە قابىلەتتىلىگىن ارتتىرىپ, بيزنەس ءۇشىن قارجىلاندىرۋ قۇنىن تومەندەتۋى مۇمكىن.
تالقىلاۋ قورىتىندىسىندا بىرقاتار تۇجىرىمدار جاسالدى. ققس-دان بوساتۋ سالىق جەڭىلدىگى بولىپ ەسەپتەلەدى, سونداي-اق قارجى نارىعىن رەتتەۋ جانە دامىتۋ جونىندەگى اگەنتتىكتىڭ ۇستانىمىن تالاپ ەتەدى. ۇكىمەتتىڭ ساياساتىنا سايكەس, ەگەر ولار ەكونوميكانىڭ ناقتى سەكتورىن قارجىلاندىرۋعا, ىشكى ينۆەستيتسيالىق بەلسەندىلىكتىڭ وسۋىنە ىقپال ەتسە, سالىقتىق جەڭىلدىكتەر بەرۋ مۇمكىندىگى قاراستىرىلادى.
سونىمەن قاتار جيىندا بورىشتىق قۇرالدار بويىنشا سىياقى تۇرىندەگى تابىستى ايقىنداۋ ماسەلەسى جەكە قارالدى. قولدانىستاعى رەداكتسيادا باعالى قاعازداردى وتەۋ كەزىندەگى ديسكونت سىياقى قۇرامىنان الىنىپ, قۇننىڭ وسۋىنە جاتقىزىلادى. بۇل سالىق شەگەرىمدەرىن قولدانۋدى قيىنداتادى ءارى قوسىمشا سالىق جۇكتەمەسىنە اكەلۋى ىقتيمال. قارجى قوعامداستىعىنىڭ وكىلدەرى نورمالاردى ەكىۇشتى تۇسىندىرمەۋ ماقساتىندا سىياقى قۇرامىندا ديسكونتتى ساقتاۋدى ۇسىندى.
سالىق سالىناتىن كىرىستى ازايتۋ ماقساتىندا بورىشتىق باعالى قاعازدارعا كەمىندە ءۇش جىل يەلىك ەتۋ قاجەتتىلىگى تۋرالى نورما دا تالقىعا ءتۇستى. نارىق قاتىسۋشىلارىنىڭ پىكىرىنشە, بۇل ينۆەستورلاردىڭ وسىنداي قۇرالدارعا دەگەن قىزىعۋشىلىعىن تومەندەتىپ, بيرجالىق الاڭدار اراسىندا تەڭسىزدىك تۋعىزۋى مۇمكىن. بارلىق ۇسىنىس كابىلدانعان كودەكستە ەسكەرىلىپ, جان-جاقتى قارالادى.
تاعى ءبىر ماسەلە اۋىل شارۋاشىلىعى ونىمدەرىن ەكسپورتتاۋ كەزىندەگى ققس-نى تۇزەتۋگە قاتىستى بولدى. قولدانىستاعى نورماعا سايكەس, ەكسپورت كەزىندە اۋىل شارۋاشىلىعى تاۋارىن ءوندىرۋشى بۇرىن ەسەپكە قابىلدانعان ققس-نى 80%-عا ازايتۋعا مىندەتتى. تيىسىنشە, قايتارۋ 20% مولشەرىندە جۇزەگە اسىرىلادى. ويتكەنى فەرمەرلەر سالىق مىندەتتەمەلەرىن 80%-عا تومەندەتۋگە قۇقىلى. بۇل نورما بەيىندىك زاڭناماعا سايكەس ەگىن شارۋاشىلىعى مەن مال شارۋاشىلىعى ونىمدەرىنە, ونىڭ ىشىندە باستاپقى قايتا وڭدەۋ ونىمدەرىنە عانا قولدانىلاتىنى ءتۇسىندىرىلدى.
مەملەكەتتىك كىرىستەر كوميتەتىنىڭ مالىمەتىنشە, 12 اقپاندا جەڭىلدەتىلگەن دەكلاراتسيا نەگىزىندە ارنايى سالىق رەجىمىن 921 مىڭ سالىق تولەۋشى, جالپىعا بىردەي بەلگىلەنگەن رەجىمدى 113 مىڭ ادام تاڭداعان. 500 مىڭعا جۋىق سالىق تولەۋشى ءالى تاڭداۋ تۋرالى شەشىم قابىلداعان جوق. ولارعا 1 ناۋرىزعا دەيىن سالىق رەجىمىن تاڭداۋ قاجەتتىگى تۋرالى ەسكەرتىلىپ, جەكە كابينەتتەرى ارقىلى قايتالاما حابارلامالار جىبەرىلدى.
