وسى ورايدا ەلىمىزدە دە ارميانى بارلاۋشى ءارى سوققى بەرۋشى دروندارمەن ءارى ونىڭ ءتىلىن بىلەتىن ماماندارمەن جاساقتاۋ – ۋاقىت تالابى. ول ءۇشىن ءتۇرلى ءىس-شارا وتكىزىلىپ, ءتيىمدى شەشىمدەر قابىلدانىپ جاتىر. سونداي ءىس-شارانىڭ ءبىرى – ۇلتتىق قورعانىس ۋنيۆەرسيتەتى (ۇقۋ) اسكەري-زەرتتەۋ ينستيتۋتىنىڭ بازاسىندا وتكەن قۇرلىق اسكەرلەرى ۇشقىشسىز اۆياتسيالىق جۇيەلەرى وپەراتورلارىنىڭ بىلىكتىلىگىن ارتتىرۋعا ارنالعان اپتالىق كۋرس.
مۇندا ساربازدارعا ارنالعان ساباقتاردى ۇشقىشسىز اۆياتسيا سالاسىندا ون جىلدان اسا جۇمىس تاجىريبەسى بار وقىتۋشىلار مەن نۇسقاۋشىلار جۇرگىزدى. كۋرس بارىسىندا قازىرگى جاعدايدا سۇرانىسقا يە تاجىريبەلىك دايىندىققا نەگىزگى باسىمدىق بەرىلگەنىن ايتا كەتۋ كەرەك.
اسكەري قىزمەتشىلەر «تورعاي-10» قۇرىلعىسىن ۇشقىشسىز ۇشۋ اپپاراتىنا بولشەكتەپ جيناۋ داعدىلارىن مەڭگەردى. سونىمەن قاتار تاكتيكالىق-تەحنيكالىق سيپاتتامالارىن زەردەلەپ, قاۋىپسىزدىك شارالارى مەن ءارتۇرلى جاعدايدا قولدانۋ ەرەكشەلىكتەرىن دە ۇيرەندى. بۇعان قوسا ۇلتتىق قورعانىس ۋنيۆەرسيتەتىنىڭ عىلىمي قىزمەتكەرلەرى ازىرلەگەن «ارا» دروندارىن قولدانۋدىڭ تاجىريبەلىك ساباقتارى جۇرگىزىلدى.
جەكە وقۋ ءمودۋلى FPV-دروندارعا ارنالعان. بۇل ساباقتا تىڭداۋشىلار ولاردى قۇراستىرۋ, باعدارلامالاۋ, دياگنوستيكالاۋ مەن اقاۋلارىن جويۋدى مەڭگەرىپ شىقتى.
ء«بىز قولدانبالى داعدىلارعا باسىمدىق بەرەمىز. ماقساتىمىز – العان بىلىمدەرىن ءوز بولىمشەلەرىندە تاراتا الاتىن مامانداردى دايارلاۋ», دەپ اتاپ ءوتتى ۇقۋ قارۋ-جاراق جانە اسكەري تەحنيكا عىلىمي زەرتتەۋ ينستيتۋتى زەرتتەۋ قىزمەتىنىڭ باستىعى, پولكوۆنيك جارقىن قابدولدا.
ۇشقىشسىز اۆياتسيالىق جۇيەلەردى قولدانۋ جەكە قۇرامنىڭ قاۋىپسىزدىگىن ارتتىرىپ, جاۋىنگەرلىك تاپسىرمالاردى ورىنداۋدىڭ تيىمدىلىگىن جوعارىلاتادى, دالدىكتى, جەدەل بارلاۋ مەن قارسىلاسقا قاشىقتان اسەر ەتۋدى قامتاماسىز ەتەدى.
«ۇشقىشسىز ۇشۋ اپپاراتتارى تاكتيكالىق باسىمدىقتىڭ نەگىزگى ەلەمەنتىنە اينالدى. ولاردى قولدانۋ فورمالارى مەن تاسىلدەرىنىڭ ەۆوليۋتسياسى قازىرگى زامانعى ۇرىس قيمىلدارىنىڭ سيپاتىنا ەلەۋلى تۇردە اسەر ەتەدى», دەيدى ينستيتۋتتىڭ زەرتتەۋ قىزمەتىنىڭ باستىعى, پولكوۆنيك الەكسەي بويكو.
بۇگىندە ۇشقىشسىز جۇيەلەردى باسقارۋ ماماندارىن دايارلاۋ – قارۋلى كۇشتەردىڭ باستى مىندەتىنىڭ ءبىرى. ونىڭ جۇزەگە اسىرىلۋى جەكە قۇرامنىڭ تەحنيكالىق بىلىكتىلىگىنىڭ ءوسۋى مەن ۇشقىشسىز تەحنولوگيالاردى قولدانۋ مۇمكىندىكتەرىنىڭ كەڭەيۋىنە ىقپال ەتەدى.
بۇعان دەيىن ساعادات نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتىنىڭ بازاسىندا ۇۇا ماماندارىن دايارلايتىن اسكەري مەكتەپ اشىلعان ەدى. سونداي-اق دەسانتتىق-شابۋىلداۋ اسكەرلەرىندە ۇشقىشسىز اپپاراتتاردى قۇراستىرۋ, سىناقتان وتكىزۋ مەن بولىمشەلەرگە بەرۋ جۇمىستارىنىڭ تولىق تسيكلى جولعا قويىلدى.
