اۋلاداعى جاسىل الاڭ جاراسىم تاپتى

“قارا قۇرلىقتا” فۋتبولدان الەم چەمپيوناتى دۇرىلدەپ ءوتىپ جات­قاندا, جامبىلدىق شەنەۋنىكتەر دە تارازدىق جاس فۋتبولشىلاردى توسىن سىيلىقپەن تاڭقالدىرىپ تاستادى. ول سىيلىقتىڭ “اۆتورى” جام­بىل وبلىسىنىڭ اكىمى قانات بو­زىمباەۆ دەسەك تە جاراساتىن سياقتى. اتاپ ايتساق, ايتەكە بي كوشە­سىن­دەگى №11 كوپقاباتتى تۇرعىن ءۇيدىڭ اۋلاسىنان شاعىن فۋتبول الاڭى اشىلدى. ەرەكشەلىگى – ول جاساندى “شوپپەن” جابىلعان. كو­گالدان ايىرماسى جوق بۇل جاساندى جامىلعىنى ىسكەر ازاماتتار سوناۋ گوللانديادان ارنايى الدىرىپتى. ءسوزدىڭ توقەتەرى, بالالار الاڭسىز الا دوپ تەبەتىن الاڭنىڭ قۇرىلىسى حالىقارالىق تالاپتارعا ساي. ايتپاقشى, بالالار مەن ولار­دىڭ اتا-انالارى ءۇشىن تاپتىرماس الاڭ وبلىس بويىنشا فۋتبولدى دامىتۋ باعدارلاماسى شەڭبەرىندە جۇزەگە اسىرىلىپتى. اكىمنىڭ اي­تۋىنا قاراعاندا, الداعى ۋاقىتتا وب­لىس كولەمىندە وسىنداي 20 فۋت­بول الاڭى سالىنباقشى ەكەن. ونىڭ تەڭ جارتىسى تاراز قالاسىنداعى كوپقاباتتى تۇرعىن ۇيلەردىڭ اۋلا­سىنان ورىن تەپپەك. – ەلباسى نۇرسۇلتان نازار­باەۆ­ت­ىڭ بيىلعى جولداۋىندا قا­زاق­ستان حالقىنىڭ كەمىندە 30 پايى­زىن بۇقارالىق سپورتپەن قامتۋ ماسەلەسى العا قويىلعانى بەلگىلى. سوندىقتان بۇقارالىق سپورتتىڭ دامۋىنا ءبىز ەرەكشە كوڭىل بولەمىز. فۋتبول الاڭدارىمەن بىرگە, بيىل وبلىسىمىزدا 20 بوكس زالىن اشامىز. سپورتتىڭ باسقا تۇرلەرىن دامىتۋ بويىنشا دا جوسپارلار بار, – دەدى اۋلاداعى جاسىل الاڭعا كەلىپ, الا دوپتى العاشقىلاردىڭ ءبىرى بولىپ تەپكەن وبلىس اكىمى ق. بوزىمباەۆ. اتالعان فۋتبول الاڭدارى تەك دەمەۋشىلەردىڭ كومەگى ەسەبىنەن سالىنۋدا. مۇنداي باستامانى ەندى اۋدان اكىمدەرى قولعا الماقشى. –مەن وسى ءۇيدىڭ “باسشىسى” دەگەن جاۋاپكەرشىلىكتى موينىما العان كەزدە 38 جاستا ەدىم, قازىر 68 جاسقا كەلدىم. ياعني, اۋلا بالالارى 30 جىلعا جۋىق قارا توپىراقتىڭ ۇستىندە دوپ قۋىپ كەلدى. ەندى, مىنە, وبلىس اكىمى قانات الدابەرگەن­ ۇلىنىڭ باستاماسىمەن اق شاڭداق جەر جاسىل ءتۇستى جاساندى جامىل­عىمەن تۇرلەنىپ شىعا كەلدى, – دەيدى ءسانيا اسانوۆا اپاي قۋانىپ. بۇگىندە وبلىستا 4 000 بالا فۋتبول سپورتىمەن اينالىسادى. “تاراز” فۋتبول كلۋبىنىڭ كوپتەگەن ويىنشىلارى العاشقى گولدارىن وسىنداي شاعىن الاڭداردا سوققا­نىن ەسكەرسەك, ايتەكە بي كوشە­سىندەگى №11 ءۇيدىڭ اۋلاسىنان بو­لاشاق  ليونەل مەسسي, كريش­تيانۋ رونالدۋ جانە دەۆيد بەكحەم سياقتى جۇلدىزدار شىعىپ جاتسا, ەش تاڭقالماڭىزدار. كوسەمالى ساتتىباي ۇلى, جامبىل وبلىسى.