كەشە مەملەكەت باسشىسى قاسىم-جومارت توقاەۆ 2026 جىلعى 15 ناۋرىزدا رەسپۋبليكالىق رەفەرەندۋم وتكiزۋ تۋرالى جارلىققا قول قويدى. ال بۇگىن, 12 اقپاندا «Egemen Qazaqstan» گازەتىندە ەلىمىزدىڭ جاڭا كونستيتۋتسياسىنىڭ جوباسى جاريالاندى. ول بارلىعى 96 باپتان تۇرادى. وسى قۇجاتتىڭ 95-بابىندا جاڭا كونستيتۋتسيا قابىلدانعان جاعدايدا پارلامەنت وكىلەتتىگى قاي ۋاقىتتان باستاپ توقتايتىنى تۋرالى ايتىلعان.
جوبادا: «1995 جىلعى 30 تامىزداعى قازاقستان رەسپۋبليكاسىنىڭ كونستيتۋتسياسىنا سايكەس قالىپتاستىرىلعان قازاقستان رەسپۋبليكاسىنىڭ پارلامەنتى ءوز وكىلەتتىگىن 2026 جىلعى 1 شىلدەدەن باستاپ توقتاتادى. كونستيتۋتسيا كۇشىنە ەنگەن كۇننەن باستاپ ءبىر اي ىشىندە قازاقستان رەسپۋبليكاسىنىڭ پرەزيدەنتى قۇرىلتاي سايلاۋىن جاريالاۋعا ءتيىس جانە ول ەكى اي ىشىندە وتكىزىلۋگە ءتيىس», دەپ جازىلعان.
بۇدان بولەك جوبادا كورسەتىلگەندەي, ءبىرىنشى شاقىرىلعان قۇرىلتايدىڭ ءبىرىنشى سەسسياسى اشىلعان كۇننەن باستاپ ەكى اي ىشىندە قازاقستان رەسپۋبليكاسىنىڭ پرەزيدەنتى قۇرىلتايدىڭ كەلىسىمىمەن ۆيتسە-پرەزيدەنتتى تاعايىنداۋعا ءتيىس.
كونستيتۋتسيالىق سوت توراعاسى مەن سۋديالارى ءبىرىنشى شاقىرىلعان قۇرىلتايدىڭ ءبىرىنشى سەسسياسى اشىلعان كۇننەن باستاپ ەكى اي ىشىندە تاعايىندالۋعا ءتيىس.
