سۋرەت: inbusiness.kz
«قازىر ەلىمىزدەگى تاۋاردىڭ 60 پايىزى تەمىرجولمەن تاسىمالدانادى. سوندىقتان تەمىرجول جەلىلەرىن بارىنشا دامىتۋ – ايرىقشا ماڭىزدى مىندەت. بۇگىندە بىرقاتار ءىرى ينفراقۇرىلىم جوباسىنىڭ قۇرىلىسى اياقتالدى. تەمىرجول ارقىلى جۇك تاسىمالداۋ مۇمكىندىگى ەداۋىر جاقسارىپ, تەمىرجولدىڭ جالپى جاعدايى تۇراقتالدى. دەسەك تە, ەلىمىزدىڭ تەمىرجول ءترانزيتى سالاسىنداعى الەۋەتىن تولىعىمەن پايدالانۋىمىز قاجەت. الايدا بۇل ماڭىزدى ماسەلە بويىنشا انىق, ايقىن ستراتەگيا ءالى جوق سياقتى. توزىعى جەتكەن تەمىرجول ينفراقۇرىلىمى ءالى دە كوپ. كەيبىر جەرلەردەگى احۋال ءتىپتى كۇردەلى دەۋگە بولادى. بيىل «مويىنتى – قىزىلجار», «داربازا – ماقتاارال» باعىتىنداعى جاڭا تەمىرجول جەلىلەرىن ىسكە قوسۋ كەرەك. سونداي-اق «التىنكول – جەتىگەن» جانە «بەينەۋ – ماڭعىستاۋ» تەمىرجولىن جاڭعىرتۋ جۇمىستارىن اياقتاۋ قاجەت. «باقتى – اياگوز» جەلىسىن ۋاقتىلى پايدالانۋعا بەرۋ كەرەك», دەدى مەملەكەت باسشىسى.
پرەزيدەنت اتاپ وتكەن ستراتەگيالىق ماڭىزى بار «داربازا – ماقتاارال تەمىرجول جەلىسىنىڭ قۇرىلىسى» جوباسىن تولىق ىسكە قوسۋ 2026 جىلدىڭ جەلتوقسان ايىنا جوسپارلانعان. تۇركىستان وبلىسى اكىمدىگىنىڭ حابارلاۋىنشا, قۇرىلىس الاڭىندا اتقارىلىپ جاتقان جۇمىستاردىڭ بارىسى قاتاڭ باقىلاۋعا الىنعان. جوبانىڭ قۇرىلىسىن «قازاقستان تەمىر جولى» ۇك» اق تاپسىرىسىمەن «Integra Construction KZ» جشس جۇرگىزىپ جاتىر. جۋىردا وبلىس اكىمى نۇرالحان كوشەروۆتىڭ «قازاقستان تەمىر جولى» ۇك» اق-نىڭ قۇرىلىس جونىندەگى باسقارۋشى ديرەكتورى مارات يسقاليەۆپەن جانە جوبانى ىسكە اسىرۋشى «Integra Construction KZ» جشس وكىلدەرىمەن كەزدەسۋىندە قۇرىلىس بارىسىنداعى وزەكتى ماسەلەلەر مەن ولاردى شەشۋ جولدارى جان-جاقتى تالقىلاندى. جوبانىڭ نەگىزگى ماقساتى – «داربازا – ماقتاارال» جاڭا تەمىرجول جەلىسى ارقىلى جۇك جانە جولاۋشىلار تاسىمالىنىڭ كولەمىن ارتتىرۋ, ترانزيتتىك تاسىمالداردى اشۋ, جاڭا باعىتتاردى ىسكە قوسۋ, سونداي-اق تۇركىستان – شىمكەنت – تاشكەنت ۋچاسكەسىندەگى وتكىزۋ قابىلەتىن تاۋلىگىنە 35 جۇپ پويىزعا دەيىن ۇلعايتۋ.
«قازاقستان تەمىر جولى» ۇك» اق-نىڭ قۇرىلىس جونىندەگى باسقارۋشى ديرەكتورى مارات يسقاليەۆتىڭ ايتۋىنشا, قازىرگى ۋاقىتتا اياقتالعان جەر قازۋ جۇمىستارىنىڭ جالپى كولەمى 9,1 ملن تەكشە مەتردى قۇرايدى. 19,8 شاقىرىمعا رەلستى شپال تورى توسەلگەن. سونىمەن قاتار كوپىرلەر مەن وتكەلدەر سالۋ, سۋ قۇبىرلارىن جۇرگىزۋ, جاساندى قۇرىلىمداردى مونتاجداۋ جۇمىستارى قارقىندى اتقارىلىپ وتىر. جەر تەگىستەۋ جۇمىستارى 70 پايىزعا اياقتالعان. سىرداريا وزەنى جاعالاۋىنداعى جۇمىستار جۇرگىزىلىپ كەلەدى. سونداي-اق تەمىر جول بويىنا شاعال توسەلىپ, كوپىرلەر سالىنىپ جاتىر. «ەرداۋىت» ستانساسىنان وزەنگە دەيىن 7 كوپىر سالىنعان. بۇل جۇمىستارعا جالپى سانى 560-تان استام ادام مەن 400-گە جۋىق ارنايى تەحنيكا جۇمىلدىرىلعان.
تەمىرجول جەلىسىنىڭ ۇزىندىعى 172 شاقىرىمدى قۇرايدى. جاڭا باعىت «سارىاعاش» وتكىزۋ پۋنكتىنىڭ جۇكتەمەسىن تۇسىرەدى, سونداي-اق سارىاعاش, كەلەس, جەتىساي, ماقتاارال مەن شاردارا اۋداندارىن بايلانىستىرادى. اتالعان باعىتتىڭ وتكىزۋ قابىلەتىن ەداۋىر ارتتىرىپ, ماگيسترالدىق كولىك, كەدەندىك جانە شەكارالىق ينفراقۇرىلىمنىڭ دامۋ دەڭگەيىن كوتەرۋگە مۇمكىندىك بەرەدى. بۇدان بولەك, وبلىستىڭ الەۋمەتتىك-ەكونوميكالىق الەۋەتىن ارتتىرىپ, جاڭا وندىرىستەردىڭ اشىلۋىنا, قوسىمشا جۇمىس ورىندارىنىڭ قۇرىلۋىنا ىقپال ەتەدى.
مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ V وتىرىسىندا ەلدەگى كولىك ينفراقۇرىلىمىن دامىتۋ ماسەلەسىنە ەرەكشە توقتالعان ەدى. سونىڭ ىشىندە سارىاعاش قالاسى ماڭىنداعى كولىك قوزعالىسىنىڭ تىعىز ەكەنىن اتاپ ءوتىپ, وسى ماسەلەنى شەشۋ ماقساتىندا بيىل «سارىاعاش اينالما جولى» جوباسىنىڭ قۇرىلىسىن قولعا الۋ قاجەتتىگىن ايتتى.
ال كۇنى كەشەگى ۇكىمەت وتىرىسىندا تەمىرجولمەن قاتار اۆتوكولىك تاسىمالىن دامىتۋعا قاتىستى ءىرى جوبالاردى دا جۇزەگە اسىرۋ بارىسىن قاتاڭ باقىلاۋعا الۋدى تاپسىردى. سارىاعاش اينالما جولىنىڭ جالپى ۇزىندىعى 102 شاقىرىم بولادى. جوبالاۋ-سمەتالىق قۇجاتتامانىڭ قۇنى – 238,1 ملرد تەڭگە. بۇل – I ب ساناتىنداعى ءتورت جولاقتى اۆتوموبيل جولى. جوبا رەسپۋبليكالىق ماڭىزى بار ا-15 اۆتوموبيل جولىنا بالاما باعىت رەتىندە قىزمەت اتقارىپ, سارىاعاش قالاسى مەن وعان ىرگەلەس اۋماقتارداعى كولىك جۇكتەمەسىن ازايتادى. ترانزيتتىك كولىكتەردىڭ كەدەرگىسىز قوزعالىسىن قامتاماسىز ەتۋگە مۇمكىندىك بەرەدى. سونىمەن قاتار جول قوزعالىسى قاۋىپسىزدىگى ارتىپ, ءوڭىردىڭ كولىك-لوگيستيكالىق الەۋەتىن دامىتۋعا وڭ اسەرىن تيگىزەدى. تۇركىستان وبلىسى اكىمدىگىنىڭ حابارلاۋىنشا, مەملەكەت باسشىسىنىڭ تاپسىرمالارىن ۋاقتىلى ءارى ساپالى ورىنداۋ باعىتىنداعى جۇمىستار تۇراقتى باقىلاۋعا الىنىپ, جوبانىڭ بەلگىلەنگەن مەرزىمدە ىسكە اسۋى قامتاماسىز ەتىلمەك. قۇرىلىس جۇمىستارى بيىل باستالماق.
تۇركىستان وبلىسى
