پارلامەنتتە سالىق رەفورماسى تالقىلانعان كەزدە مۇگەدەكتىگى بار ادامداردى جۇمىسقا الاتىن ۇيىمدارعا قاتىستى ەرەجە وزگەرتىلدى. دەپۋتاتتاردىڭ ۇسىنىسىنا سايكەس, بيىلدان باستاپ مۇنداي قىزمەتكەرلەرگە تولەنەتىن ەڭبەكاقى قورىنىڭ 51%-ى كورپوراتيۆتىك تابىس سالىعى بويىنشا جەڭىلدىك رەتىندە ەسەپتەلەدى. بۇعان دەيىن ەستۋ, سويلەۋ, كورۋ قابىلەتى بۇزىلعان ادامدار جۇمىس ىستەيتىن ارنايى ۇيىمداردا 35% مولشەرى قولدانىلعان ەدى. ەندى بۇل نورما وزگەرتىلدى.
جاڭا ءتارتىپ جۇمىس بەرۋشىلەرگە تاڭداۋ جاساۋدىڭ قاجەتى بولمايتىنداي ەتىپ ەنگىزىلدى. ۇيىمنىڭ تۇرىنە قاراماستان, مۇگەدەكتىگى بار ادامدى جۇمىسقا الۋ مۇمكىندىگى كەڭەيەدى. سونىمەن قاتار قىزمەتكەرلەردىڭ جەكە تابىس سالىعىنا بەرىلەتىن جەڭىلدىگى بۇرىنعىداي تولىق ساقتالادى. بۇل وزگەرىستىڭ باستى ماقساتى جۇمىس بەرۋشىلەردى جاڭا جۇمىس ورىندارىن اشۋعا ءارى ولاردى تۇراقتى ساقتاۋعا ىنتالاندىرۋ بولىپ وتىر.
سونىمەن قاتار سالىق كودەكسىنە العاش رەت مۇگەدەكتىك توبىنا بايلانىستى جەكە تابىس سالىعىندا الەۋمەتتىك شەگەرىمدى بولەك ەسەپتەۋ ءتارتىبى ەنگىزىلدى. بۇعان دەيىن جۇمىس ىستەيتىن مۇگەدەكتىگى بار ادامعا شەگەرىمنىڭ جالپى شەگى 882 اەك بولاتىن. جاڭا وزگەرىستەر بويىنشا بۇل مولشەر ءۇشىنشى توپقا ساقتالىپ قالدى. ال ءبىرىنشى جانە ەكىنشى توپتاعىلارعا شەگەرىم كولەمى 5000 اەك-كە دەيىن ۇلعايتىلدى.
وسى جاڭا نورمانى قولدانۋعا بايلانىستى مەملەكەتتىك ورگاندارعا وتىنىشتەر تۇسە باستاعان. مىسالى, ەگەر ءبىر جىل ىشىندە قىزمەتكەردىڭ دەنساۋلىعى ناشارلاپ, ءۇشىنشى توپ ءبىرىنشى نەمەسە ەكىنشى توپقا اۋىسسا يا كەرىسىنشە وزگەرسە, سول جىلعا جەكە تابىس سالىعىن قالاي ەسەپتەۋ كەرەك دەگەن سۇراقتار تۋىندادى. سالىق كودەكسىنىڭ 404-بابىنىڭ 2-تارماعىنا سايكەس, الەۋمەتتىك شەگەرىم سول نەگىز پايدا بولعان نەمەسە بۇرىن قولدانىلعان كۇنتىزبەلىك جىلعا ەسەپتەلەدى.
وسى ماسەلەنىڭ الەۋمەتتىك ماڭىزىن ەسكەرە وتىرىپ, جوبالىق كەڭسەنىڭ وتىرىسىندا ناقتى شەشىم قابىلداندى. ەگەر مۇگەدەكتىك توبى ءبىرىنشى مەن ەكىنشى نەمەسە ءۇشىنشى توپ اراسىندا وزگەرسە, سول جىل ءۇشىن تولىقتاي 5000 اەك مولشەرىندە الەۋمەتتىك سالىق شەگەرىمى قولدانىلادى. بۇل شەشىم جۇمىس ىستەيتىن مۇگەدەكتىگى بار ادامداردىڭ تابىسىن قوسىمشا قورعاۋعا, سالىق جۇكتەمەسىن ازايتۋعا, ادىلەتتى جۇيە قالىپتاستىرۋعا باعىتتالعان.
ەڭ ءجيى كوتەرىلەتىن ماسەلەلەردىڭ ءبىرى – سالىق تولەۋشىنىڭ جەكە شوتىندا ارتىق تولەم بولعان جاعدايدا, قوسىلعان قۇن سالىعىن تولەگەننەن كەيىن ەلەكتروندىق شوت-فاكتۋرانى قانداي تارتىپپەن جانە قانداي مەرزىمدە راسىمدەۋ كەرەك دەگەن سۇراق. وسىعان بايلانىستى مەملەكەتتىك كىرىستەر كوميتەتى جاقىن ۋاقىتتا ءوز رەسمي اقپاراتتىق رەسۋرستارىندا ارنايى تۇسىنىكتەمە جاريالاۋدى جوسپارلاپ وتىر.
سونىمەن قاتار جوبالىق كەڭسەنىڭ وتىرىسىندا «اتامەكەن» ۇلتتىق كاسىپكەرلەر پالاتاسىنىڭ باستاماسىمەن تاعى ءبىر ماسەلە كوتەرىلدى. ول – كۆازيمەملەكەتتىك كومپانيالاردى ساتىپ الۋ كەزىندە سالىق تولەۋشىنىڭ شىعىندارىن ەسەپكە الۋ ءتارتىبى. اسىرەسە وڭايلاتىلعان دەكلاراتسيا نەگىزىندە ارنايى سالىق رەجىمىن قولداناتىن كاسىپكەرلەردەن الىناتىن تاۋارلار, جۇمىستار مەن قىزمەتتەرگە قاتىستى شىعىنداردى كورپوراتيۆتىك تابىس سالىعى بويىنشا شەگەرۋگە جاتقىزۋ ماسەلەسى تالقىلاندى. بۇل باعىتتا قوسىمشا تالداۋ جاساپ, زاڭعا تاۋەلدى قۇجاتتارعا وزگەرىستەر ەنگىزۋ جانە جەتكىزۋشىلەرگە قويىلاتىن تالاپتاردى قايتا قاراۋ قاجەت ەكەنى ايتىلدى.
سونداي-اق وتكەن اپتادا مەملەكەتتىك ورگاندارعا جانە مەملەكەتتىك كىرىستەر كوميتەتىنە call-ورتالىق پەن Salykbot Telegram-ارناسى ارقىلى شامامەن 14 مىڭ ءوتىنىش تۇسكەنى حابارلاندى. بۇل كورسەتكىش الدىڭعى اپتامەن سالىستىرعاندا 2,1 مىڭعا ازايعان.
