فوتو: turkystan.kz
ونىڭ ايتۋىنشا, كاسىپوداقتار ءۇشىن ەڭ ماڭىزدى ماسەلەنىڭ ءبىرى – كونستيتۋتسيالىق رەفورمانىڭ اشىقتىعى جانە تالقىلاۋعا ەڭبەك ەتىپ جۇرگەن ازاماتتاردى كەڭىنەن تارتۋ. بۇل باعىتتا ايماقتاردا, ەڭبەك ۇجىمدارىندا جۇيەلى كەزدەسۋلەر ۇيىمداستىرىلعان.
«كاسىپوداقتاردىڭ شامامەن 2 ميلليون مۇشەسىنىڭ وكىلى رەتىندە بۇل قۇجاتتى تالقىلاۋ كوميسسيا مەن ساراپشىلار ورتاسىنىڭ شەڭبەرىندە عانا قالماۋى – مەن ءۇشىن اسا ماڭىزدى بولدى», دەدى ساتىبالدى داۋلەتالين.
مارات شيبۇتوۆ: اتا زاڭ جوباسى جالپىحالىقتىق رەفەرەندۋمعا شىعارۋعا دايىن
وڭىرلەردەگى كەزدەسۋلەر بارىسىندا ەڭبەك ادامدارىنىڭ كۇندەلىكتى ومىرىنە تىكەلەي اسەر ەتەتىن ماسەلەلەر كوتەرىلگەن. اشىق ديالوگ, كەيدە قىزۋ پىكىرتالاسقا ۇلاسقان تالقىلاۋلار شىنايى سيپاتتا وتكەن.
«تالقىلاۋ ازاماتتارمەن بەتپە-بەت, كەيدە قىزۋ پىكىرتالاس تۇرىندە, بىراق شىنايى اڭگىمە سيپاتىندا ءوتتى. ادامدار ەڭبەك قاۋىپسىزدىگى, بالالارىنىڭ بولاشاعى تۋرالى ايتتى. كاسىپوداقتار فەدەراتسياسى جاڭا كونستيتۋتسيا جوباسىن قولدادى. سەبەبى ول كوپ جاعدايدا ءبىز ەڭبەك ادامدارىنان ەستىپ وتىرعان وي-پىكىرلەرمەن سايكەس كەلدى», دەدى فەدەراتسيا توراعاسى.
سپيكەر جاڭا كونستيتۋتسيا جوباسىندا الەۋمەتتىك مەملەكەت قاعيداتىنىڭ جانە ادامنىڭ ەڭ جوعارى قۇندىلىق رەتىندە بەكىتىلۋىنىڭ ايقىن كورىنىس تاپقانىنا ەرەكشە توقتالدى. ونىڭ پىكىرىنشە, بۇل – بارلىق مەملەكەتتىك شەشىمدەر ءۇشىن نەگىزگى باعدار بولۋى ءتيىس.
«العاشقى باپتىڭ وزىندە-اق قازاقستان الەۋمەتتىك مەملەكەت رەتىندە ايقىندالىپ, ەڭ جوعارى قۇندىلىق رەتىندە ادام, ونىڭ ءومىرى, قۇقىقتارى مەن بوستاندىقتارى اتالادى. جالدامالى جۇمىسكەر ءۇشىن بۇل – اسا ماڭىزدى بەلگى. مەملەكەت ەندى ساندار مەن ەسەپتەردىڭ اينالاسىندا ەمەس, ەڭبەك ەتىپ, ءونىم وندىرەتىن, ەلىمىزدىڭ تۇراقتىلىعىن قامتاماسىز ەتەتىن ادامدار اينالاسىندا قۇرىلادى», دەدى ساتىبالدى داۋلەتالين.
جاڭا كونستيتۋتسيا جوباسىندا ادام مەن ازاماتتىق قۇقىقتىڭ ارا-جىگىن اجىراتۋ ۇسىنىلدى
ەڭبەك قۇقىقتارى ماسەلەسىنە كەلگەندە, ول ەكونوميكالىق جانە تەحنولوگيالىق وزگەرىستەر كەزەڭىندە مەملەكەتتىڭ جۇمىسپەن قامتۋ مەن ەڭبەك جاعدايلارىنا جاۋاپكەرشىلىگى ساپالىق تۇرعىدان جاڭا دەڭگەيگە كوتەرىلەتىنىن ايتتى.
«ەڭبەك – ادامنىڭ جەكە تاۋەكەلى رەتىندە ەمەس, لايىقتى ءومىردىڭ نەگىزى رەتىندە مويىندالادى. تاعى ءبىر ماڭىزدى باعىت – ىنتىماقتاستىق قاعيداتى. مۇندا ول ءوزىنىڭ ناعىز شىنايى مانىنە قايتا ورالادى. بۇل – مەملەكەت, بيزنەس جانە ەڭبەك اراسىنداعى ىنتىماقتاستىق. تاۋەكەلدى جۇمىسكەردىڭ موينىنا ىلە سالۋ ەمەس. بىرجاقتى جاۋاپكەرشىلىك تە ەمەس. بۇل – مەملەكەت بەلسەندى قاتىسۋشى بولا وتىرىپ, ادامداردىڭ تۇرمىس جاعدايىنا جاۋاپكەرشىلىك الاتىن مۇددەلەردىڭ ءادىل تەڭگەرىمى. جۇمىسشى ءۇشىن بۇل, ەڭ الدىمەن, ەرتەڭگى كۇنگە دەگەن سەنىم», دەپ تۇيىندەدى ول.
ءسوز سوڭىندا كاسىپوداقتار فەدەراتسياسىنىڭ توراعاسى اۋىزبىرشىلىك پەن قوعامنىڭ بىرلەسە ارەكەت ەتۋى ەلدىڭ تۇراقتى دامۋىنىڭ باستى العىشارتى ەكەنىن اتاپ ءوتىپ, كونستيتۋتسيالىق كوميسسيا مۇشەلەرىنە اشىق ءارى مازمۇندى ديالوگ ءۇشىن العىس ءبىلدىردى.
حالىقارالىق زاڭگەرلەر قاۋىمداستىعى: جاڭا كونستيتۋتسيا جوباسى حالىقارالىق ستاندارتتارعا ساي
