فوتو: olympickz/سالي سابيروۆ, تۇرار قازانعاپوۆ
قازاقستان قۇراماسى دەلەگاتسيالار شەرۋىندە 44-ءشى بولىپ شىقتى. دەلەگاتسيالاردىڭ رەتى ەل اتاۋلارىنىڭ يتاليا تىلىندەگى ءالىپبي ءتارتىبى بويىنشا انىقتالدى.
ميلانداعى «سان-سيرو» ستاديونىندا ەلىمىزدىڭ مەملەكەتتىك تۋىن شورت-ترەكتەن ەكى دۇركىن الەمنىڭ ۆيتسە-چەمپيونى دەنيس نيكيشا الىپ شىقتى. دەلەگاتسيا قۇرامىنا ميلاندا ونەر كورسەتەتىن كونكي سپورت تۇرلەرىنىڭ وكىلدەرى ەندى.
وسى ۋاقىتتا ليۆينو قالاسىندا ەلىمىزدىڭ مەملەكەتتىك تۋىن ۋنيۆەرسيادانىڭ ۆيتسە-چەمپيونى, فريستايل-موگۋلدان سپورتشى اياۋلىم امرەنوۆا الىپ شىقتى. ونىڭ ارتىنان شاڭعى فريستايلى تۇرلەرىندە باق سىنايتىن قازاقستان دەلەگاتسياسىنىڭ ءبىر بولىگى ءجۇرىپ ءوتتى.
كورتينا مەن پرەداتستسو قالالارىندا قازاقستاندىق شاڭعىشىلار, بياتلونشىلار, تاۋ شاڭعىشىلارى, ترامپليننەن سەكىرۋشىلەر جانە قوسسايىس شەبەرلەرى شەرۋگە قاتىستى. اياۋلىم امرەنوۆا مەن دەنيس نيكيشا – 2026 جىلعى قىسقى وليمپيادا ويىندارىندا قازاقستان قۇراماسىنىڭ رەسمي تۋ ۇستاۋشىلارى.
ايتا كەتەيىك, يتالياداعى XXV قىسقى وليمپيادا ويىندارىنىڭ اشىلۋ سالتاناتى 6 اقپاندا ميلان ۋاقىتىمەن ساعات 20:00-دە (قازاقستاندا 7 اقپانعا قاراعان ءتۇن) ميلانداعى ايگىلى «سان-سيرو» ستاديونىندا باستالدى. سالتاناتتى كەشتىڭ تاقىرىبى Armonia (يتاليان تىلىنەن اۋدارعاندا «گارمونيا», «ۇيلەسىم») دەپ اتالادى.
ەسكە سالا كەتەيىك, ميلان-كورتينا وليمپياداسىندا ەل نامىسىن 10 ديستسيپلينادا 36 سپورتشى (18 ەر, 18 ايەل) قورعايدى. جالپى دوداعا 93 مەملەكەتتەن 3000-عا جۋىق اتلەت قاتىسادى. ولار 16 باعدارلامادا 116 مەدال جيىنتىعىن ساراپقا سالادى. وليمپيادا 22 اقپاندا مارەسىنە جەتەدى.
قىسقى وليمپيادا ويىندارىن ەلىمىزدىڭ 4 تەلەارناسى − Qazaqstan, Qazsport, «حابار» جانە Jibek Joly تىكەلەي ەفيردە كورسەتەدى.
