كوكەيكەستى ءارى ماڭىزى زور مىندەت

جاقىندا نورۆەگيانىڭ استاناسى وسلو قالاسىندا ەقىۇ پارلامەنت­تىك اسسامبلەياسىنىڭ جىل سايىنعى سەسسياسى ءوز جۇمىسىن باستاعان بو­لا­تىن. كەزەكتى 19-شى سەسسيا بارىسىندا قازاقستاننىڭ ۇيىمعا توراعالىعىنا جوعارى باعا بەرىلگەنىن بۇعان دەيىن حابارلاعان ەدىك. بۇگىن اياقتالاتىن القالى جيىن بارىسىندا قازاقستان تارابى “قۇقىقتىڭ ۇستەمدىگى: ترانسۇلتتىق قىلمىسپەن جانە كوررۋپتسيامەن كۇرەس” تاقىرىبىندا بايانداما جاسادى.بۇل باياندامانى ەقىۇ-نىڭ ءىس باسىنداعى توراعاسى, قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ جاساۋى ءتيىس بو­لا­تىن. بىراق قازاقستاندا ءوتىپ جاتقان بىرقاتار ءىرى حالىقارالىق شارالارعا جانە 16-17 شىلدەدە الماتىدا وتەدى دەپ جوسپارلانعان ەقىۇ-عا مۇشە مەملەكەتتەر سىرتقى ىستەر مي­نيستر­لەرىنىڭ بەيرەسمي كەزدەسۋىندە جان-جاقتى دايىندىقتارعا بايلا­نىستى ق.ساۋداباەۆتىڭ وسلوعا اتباسىن تىرەۋگە  مۇرشاسى بولمادى. سوندىقتان, ول ءوزىنىڭ ءسوزىن ەقىۇ باس حاتشىسى م.پ. دە بري­شام­بو­نىڭ وقىپ بەرۋىنە وكىلەتتىك ەتتى. مەن پارلامەنتتىك اسسامبلەيا بۇگىنگى كۇننىڭ اسا كوكەيكەستى جانە ماڭىزدى ماسەلەلەرىنىڭ ءبىرىن تال­قىلاۋعا باستاما كوتەرىپ وتىر دەپ ەسەپتەيمىن, دەلىنگەن ەقىۇ ءىس با­سىن­داعى توراعاسىنىڭ سوزىندە. زاڭ­نىڭ ۇستەمدىگى ادام ولشەمى سالا­سىندا وتە ماڭىزدى. سەسسيا تاقى­رى­بىنا سايكەس جانە كۇن ءتارتىبىن­دەگى ماسەلەگە وراي مىنا ءۇش ماسە­لەگە باسا نازار اۋدارعىم كەلەدى: – قىرعىزستان جانە ەقىۇ-نىڭ الدىن الۋ الەۋەتىن ىسكە قوسۋ قاجەتتىگى; – كورفۋ ۇدەرىسى بويىنشا پىكىر­تالاستار قورىتىندىسى; – الماتىداعى الدا وتەتىن مي­نيسترلەردىڭ بەيرەسمي كەزدەسۋى مەن ەقىۇ ءسامميتىن وتكىزۋ. ءىس باسىنداعى توراعانىڭ ءسوزىن وقىعان باس حاتشى زاڭنىڭ ۇستەم­دى­گىن قامتاماسىز ەتۋ قاجەتتىگى جا­قىندا قىرعىزستاندا ورىن العان قايعىلى وقيعالار بارىسىندا انىق بايقالعانىن اتاپ كورسەتتى. بۇل دە­مو­كراتيالىق ينستيتۋتتاردىڭ ءال­سىز­دىگىنەن, ەكونوميكالىق دامۋدىڭ تۇراقسىزدىعى مەن كوررۋپتسيادان باستاۋ الىپ وتىر. ال بۇل ءوز كەزە­گىندە ترانسۇلتتىق قىلمىستىڭ وسۋىنە الىپ كەلۋى ابدەن مۇمكىن. ق.ساۋداباەۆ وسىنداي تۇرعىدا قاۋىپ بىلدىرە كەلىپ, قىرعىزستانداعى احۋال­دى تۇراقتاندىرۋعا بايلانىس­تى توراعالىق ەتۋشى ەل – قازاقستان تاراپىنان اتقارىلعان جۇمىستارعا توقتالىپ ءوتتى. ءسويتىپ, قىر­عىز­ستان­دا رەفەرەندۋم وتكىزۋگە قول جەت­كىزىلدى. ەندى ەل بەيبىت دامۋ جولىنا تۇسەدى دەۋگە نەگىز بار. ەكىنشىدەن, “كورفۋ پروتسەسى” جالعاسۋ ۇستىندە. ول ۇيىمعا قاتى­سۋشى مەملەكەتتەر ءوزارا سەنىمدى نىعايتىپ, ەقىۇ-نىڭ تيىمدىلىگىن ارتتىرۋعا كومەكتەسەتىن ماڭىزدى تەتىكتەردىڭ ءبىرى بولىپ تابىلادى. بۇل, اسىرەسە, ەۋرواتلانتيكالىق جانە ەۋرازيالىق قاۋىپسىزدىك ءما­سەلەسىندە ماڭىزدى. كورفۋ پرو­تسەسىنە بايلانىستى جۇرگىزىلگەن اشىق ۇنقاتىسۋ بارىسىندا ەقىۇ ءۇشىن اسا كوكەيكەستى ون ماسەلە تال­قىلاندى. بۇلار ترانسۇلتتىق قاۋىپ-قاتەرلەر, جانجالدار, قاۋىپسىزدىك پەن قارۋ-جاراققا باقىلاۋ ورناتۋ, ەكونوميكا مەن ەكولوگيا, گۋماني­تارلىق سالا, ولشەمارالىق قادام­دار مەن ونىڭ تيىمدىلىگى, ەۋرو­ات­لانتيكالىق جانە ەۋرازيالىق قاۋىپسىزدىك, ت.ب. ءىس باسىنداعى توراعانىڭ جول­داۋى بويىنشا ءسوز ساپتاعان م.پ. دە بريشامبو قورىتىندىسىندا ۇيىم اياسىندا شەشىمىن كۇتكەن وتكىر ماسەلەلەر بويىنشا  ءوتۋى ۇستىمىزدەگى جىلدىڭ قازان ايىنا جوسپارلانىپ وتىرعان ەقىۇ سامميتىنە ۇلكەن ءۇمىت ارتىلاتىنىن اتاپ ءوتتى. “ەگەمەن-اقپارات”.