سۋرەت: olympic.kz
- ەلىمىز «FIFA Series 2026» دوپ دوداسىن وتكىزۋ قۇقىعىنا يە بولعانى بەلگىلى. كەشە سول جارىستىڭ كەستەسى جاريالاندى. جەرلەستەرىمىز تۇساۋكەسەر كەزدەسۋىن 25 ناۋرىزدا كومور ارالدارىنا قارسى وينايدى. سول كۇنى كۋۆەيت پەن ناميبيا كۇش سىناسادى. اراعا ءۇش تاۋلىك سالىپ العاشقى ماتچتا جەڭىلگەن كوماندالار كەزدەسسە, جەڭىسكە جەتكەندەرى ءوزارا شەبەرلىك بايقاسادى. باسەكەلەر «استانا ارەنادا» وتەدى.
- مالديۆ ارالدارىنىڭ استاناسى – مالەدە ۆولەيبولدان ايەلدەر اراسىندا ورتالىق ازيانىڭ چەمپيوندار ليگاسى باستالدى. تۇڭعىش رەت ۇيىمداستىرىلىپ وتىرعان جارىستا بىلتىر ەلىمىزدىڭ كۋبوگىن ولجالاعان الماتىنىڭ «تۇرانى» باق سىنايدى. ولار «ا» توبىنا ءتۇستى. قارسىلاستارى – جەرگىلىكتى «ۆامكو» مەن شري-لانكانىڭ ء«حيردارامانيى». ۆ توبىندا يراننىڭ «ۆۋلاد», وزبەكستاننىڭ «حۋمو», نەپالدىڭ «نەپال پوليس», ءمالديۆتىڭ «حۋرا كوميۋنيتي» كلۋبتارى شەبەرلىك بايقاسادى. جارىستىڭ جەڭىمپازى ءساۋىر ايىنىڭ سوڭىندا وڭتۇستىك كورەيانىڭ كويان قالاسىندا تۇساۋى كەسىلەتىن AVC چەمپيوندار ليگاسىندا كۇش سىناسۋ قۇرمەتىنە يە بولادى.
- 8 اقپاندا ارالاس جەكپە-جەكتەن لاس-ۆەگاستاعى UFC Fight Night 266 تۋرنيرىندە نيكولاي ۆەرەتەننيكوۆ (13-7) برازيليالىق جوزە ەنريكە سوۋزامەن (8-1) سايىسقا تۇسۋگە ءتيىس ەدى. الايدا قارسىلاسى ۆيزا ماسەلەسىن دەر كەزىندە شەشە المادى. سول سەبەپتى ول جارىستان شەتتەتىلدى. ەندى جەرلەسىمىز اقش فايتەرى نيكو پرايسپەن (16-9) ايقاسادى.
- الماتىدا سپورتتىق گيمناستيكادان ەرلەر مەن ايەلدەر اراسىنداعى ەل چەمپيوناتى مارەگە جەتتى. جارىستا ءىلياس ءازىزوۆ ەركىن جاتتىعۋ مەن شىعىرشىقتا توپ جارسا, رومان حەگاي قوسسىرىق پەن كوپسايىستا دارا شىقتى. ات جاتتىعۋىندا ناريمان قۇربانوۆقا, قولدى تىرەپ سەكىرۋدە التىنحان تەمىربەككە, كەرمەدە ميلاد كاريميگە تەڭ كەلەر ەشكىم تابىلمادى.
- ەركىن كۇرەستەن ەلىمىزدىڭ ەرلەر قۇراماسىن (U23) ەندى 40 جاستاعى ەركەبۇلان كەشۋباەۆ جاتتىقتىرادى. ءوز ءىسىنىڭ بىلگىر مامانى الماتىداعى شاڭىراق شاعىن اۋدانىندا ورنالاسقان سپورتتاعى دارىندى بالالارعا ارنالعان مەكتەپ-ينتەرناتتا ەڭبەك ەتكەن جىلدارى ءبىر شوعىر مىقتى بالۋانداردى تاربيەلەدى. سولاردىڭ بىرەگەيى – ەلىمىزدەن شىققان تۇڭعىش الەم چەمپيونى ريزابەك ايتمۇحان. ال جاستار قۇراماسىنىڭ (U23) تىزگىنىن 36 جاستاعى داۋلەت نيازبەكوۆ ۇستادى. سىر بويىنىڭ ساڭلاعى الەم چەمپيوناتىندا ءبىر كۇمىس, ءبىر قولا مەدال يەلەنىپ, ازيا چەمپيوناتىندا ءۇش التىن, ءتورت قولانى ولجالادى. سونداي-اق لوندون, توكيو وليمپيادالارىنا قاتىسىپ, ەكى جارىستا دا بەسىنشى ورىنعا تابان تىرەدى.
