«قازمەديا» ورتالىعىندا قىسقى وليمپيا ويىندارىنىڭ تەلەترانسلياتسياسىنا ارنالعان رەسمي تانىستىرىلىم ءوتتى. ءىس-شاراعا مادەنيەت جانە اقپارات مينيسترلىگى مەن تۋريزم جانە سپورت مينيسترلىگىنىڭ وكىلدەرى, تانىمال سپورتشىلار مەن سالا ارداگەرلەرى, سپورت جۋرناليستەرى, سونداي-اق ويىنداردى جۇرگىزەتىن كوممەنتاتورلار قاتىستى.
قىسقى وليمپيا ويىندارىنىڭ جۇلدەگەرى, قازاق سپورتىنىڭ تاريحىندا قىسقى وليمپيادا دا التىن مەدال يەلەنگەن تۇڭعىش سپورتشى ۆلاديمير سميرنوۆ بايلانىسقا شىعىپ, ۇلتتىق قۇراما مۇشەلەرىنە ساتتىلىك تىلەپ, ولارعا زور سەنىم ارتاتىنىن جەتكىزدى. ەلورداداعى قىسقى سپورت تۇرلەرىنە ماماندانعان سپورت كەشەندەرىنەن تىكەلەي قوسىلىمدار ۇيىمداستىرىلىپ, شورت-ترەك, مانەرلەپ سىرعاناۋ مەن بياتلون سپورت تۇرلەرىنەن دوداعا تۇسەتىن سپورتشىلار دا پىكىرىن ءبىلدىرىپ, سۇحباتتار جۇرگىزىلدى. ءىس-شارا سوڭىندا وليمپيادا دوداسىنا قاتىساتىن سپورتشىلار تىكەلەي ەفيرگە قوسىلىپ, ءوز پىكىرلەرى مەن دايىندىق بارىسى تۋرالى ايتتى.
بايراقتى باسەكەنىڭ تەلەترانسلياتسياسى رەسمي اشىلۋ سالتاناتىنان ەكى كۇن بۇرىن باستالادى. العاشقى بولىپ حوككەيدەن ايەلدەر قۇرامالارى مەن كەرلينگ سپورتشىلارى جارىس جولىنا شىعادى. يتالياداعى دودادا 10 سپورت تۇرىنەن 36 سپورتشىمىز ەل سەنىمىن ارقالايدى.
قىسقى وليمپيا ويىندارىنىڭ اشىلۋ سالتاناتى 6 اقپان كۇنى ساعات 00:00-دە «Qazaqstan» جانە «Qazsport» تەلەارنالارى ارقىلى تىكەلەي ەفيردە كورسەتىلەدى. ەكى تەلەارنانىڭ ەفيرىندە وليمپيا ويىندارىن 22 كوممەنتاتور جۇرگىزەدى. ولاردىڭ قاتارىندا ەسەي جەڭىس ۇلى, سەرگەي رايليان, رۋسلان باقىتجان, ەرسىن ەرىك ۇلى, ازات سماعۇلوۆ, ليليانا ءالجانوۆا سىندى كوممەنتاتورلار بار. سونداي-اق «Qazaqstan» جانە «Qazsport» تەلەارنالارىنان كۇن سايىن «وليمپيادا ويىندارىنىڭ شولۋى» باعدارلاماسى, ال «Qazsport» ارناسىنان تىكەلەي ەفيردە «ميلان–كورتينا-2026» ستۋديالىق باعدارلاماسى كورەرمەنگە جول تارتادى.
