فوتو: Sputnik / ۆلاديسلاۆ ۆودنەۆ
«جاڭا كونستيتۋتسيا جوباسىندا ايقىندالعان مەملەكەتتىڭ جاڭا مودەلىنىڭ باستى ەرەكشەلىگى – پارلامەنتتىڭ, سوت جۇيەسىنىڭ جانە ازاماتتىق قوعامنىڭ ءرولىن كۇشەيتۋ, سونداي-اق ادامدى جانە ونىڭ قۇقىقتارىن مەملەكەتتىڭ ەڭ جوعارى قۇندىلىعى رەتىندە بەكىتۋ. بۇل قازاقستان قوعامىن جاڭعىرتۋ ۇدەرىسىندەگى ماڭىزدى مەجەلى كەزەڭ, سونداي-اق پرەزيدەنت ق.توقاەۆ جاريالاعان ادىلەتتى قازاقستاندى قالىپتاستىرۋعا باعىتتالعان ستراتەگيالىق باعىتتىڭ لوگيكالىق جالعاسى سانالادى», – دەپ اتاپ ءوتتى پرەزيدەنت ورتالىعىنىڭ ديرەكتورى باقىتجان تەمىربولات.
ءماجىلىس دەپۋتاتى ەرلان سايروۆتىڭ ايتۋىنشا, ەلىمىز ءوزىنىڭ ساياسي دامۋىنىڭ ساپالىق جاڭا كەزەڭىنە قادام باستى. ەلدە جۇزەگە اسىرىلىپ جاتقان كونسەنسۋس رەفورمالارىن باعالاۋ كەزىندە كەيىنگى ونجىلدىقتا الەمدە بولعان اۋقىمدى گەوساياسي وزگەرىستەردى ەسكەرۋ قاجەت.
«كۇردەلى حالىقارالىق احۋالدا مەملەكەتتىڭ ءبىرتۇتاس قۇرىلىمى مەن پرەزيدەنتتىك باسقارۋ فورماسىن ساقتاۋ ەلىمىز ءۇشىن ستراتەگيالىق ماڭىزعا يە. ورتالىقتاندىرىلعان, ءتيىمدى باسقارۋ جۇيەسى ەلدىڭ تۇراقتىلىعى مەن تەرريتوريالىق تۇتاستىعىن قامتاماسىز ەتەدى», — دەدى ول.
ال پارلامەنتشى اجار ساعاندىقوۆا جاڭا رەداكتسياداعى نەگىزگى زاڭ جوباسىندا مەملەكەتتى جۇيەنىڭ ورتالىعى رەتىندە قاراۋدان ادامدى ونىڭ باستى ءمانى رەتىندە ايقىندايتىن تۇبەگەيلى بەتبۇرىس جاسالعانىن اتاپ ءوتتى. ونىڭ ايتۋىنشا, بۇل ۇستانىم قۇجاتتىڭ قۇرىلىمىنان, پرەامبۋلاسىنان, بولىمدەردىڭ قايتا قارالۋىنان, سونداي-اق قۇقىقتار مەن بوستاندىقتاردىڭ كەپىلدىكتەرىن كۇشەيتۋدەن كورىنىس تاپقان.
بۇگىندە كونستيتۋتسيا جوباسىندا ءدال وسى كەپىلدىكتەرگە ەرەكشە ءمان بەرىلىپ وتىر. اتاپ ايتقاندا, ادامنىڭ مەملەكەتپەن العاشقى ءوزارا ءىس-قيمىلىنان باستاپ پروتسەسسۋالدىق قۇقىقتارىنىڭ قامتاماسىز ەتىلۋى, جەكە ءومىرى مەن دەربەس دەرەكتەرىن, ونىڭ ىشىندە تسيفرلىق ورتادا قورعاۋ, ادۆوكاتۋرانىڭ ءرولىن نىعايتۋ جانە قۇقىقتاردى قورعاۋدىڭ تۇسىنىكتى ءارى ءتيىمدى تەتىكتەرىن بەكىتۋ كوزدەلگەن.
«بۇگىندە جاڭا كونستيتۋتسيا جوباسىن قوعامدىق تالقىلاۋ ۇدەرىسىنە ازاماتتاردىڭ بەلسەندى قاتىسۋىن ەلدەگى ساياسي جاڭعىرۋدىڭ نەگىزگى كورسەتكىشتەرىنىڭ ءبىرى رەتىندە قاراستىرۋعا بولادى. وسى ورايدا ازاماتتىق بەلسەندىلىكتىڭ ارتۋى كونستيتۋتسيالىق رەفورمانىڭ قوعامدىق لەگيتيمدىلىگىن نىعايتۋعا ىقپال ەتىپ قانا قويماي, ازاماتتاردىڭ ساياسي-قۇقىقتىق ساناسىنىڭ وسۋىنە دە اسەر ەتەدى. ءارتۇرلى قاۋىمداستىقتار مەن كاسىبي توپتاردىڭ ۇسىنىستارى كونستيتۋتسيا جوباسىنىڭ ساپاسىن ارتتىرۋعا, ونى قوعامنىڭ ناقتى قاجەتتىلىكتەرىنە بەيىمدەۋگە مۇمكىندىك بەرەدى», – دەدى مەملەكەت تاريحى ينستيتۋتىنىڭ ديرەكتورى نۇربەك پۇسىرمانوۆ.
جيىندى قورىتىندىلاي كەلە, ساراپشىلار مەملەكەتتىڭ جاڭا مودەلى پارلامەنتتىڭ, سوت جۇيەسى مەن ازاماتتىق قوعامنىڭ ءرولىن كۇشەيتۋگە, سونداي-اق بيلىك تارماقتارى اراسىنداعى وكىلەتتىكتەردى نەعۇرلىم تەڭگەرىمدى بولۋگە باعىتتالعاندىعىمەن ەرەكشەلەنەتىنىن ايتتى.
