سۋرەتتى تۇسىرگەن – جۇماباي مۇسابەك
ايتۋلى كەش اقىن رۋحىنا تاعزىم ەتىپ قانا قويماي, پوەزيانىڭ ساحناداعى ومىرشەڭدىگىن تاعى ءبىر دالەلدەدى. سۇلتان سرايىلوۆتىڭ شىعارماشىلىق يدەياسى نەگىزىندە دۇنيەگە كەلگەن بۇل جوبا – ءداستۇرلى سپەكتاكلدەن گورى پوەتيكالىق سىرلاسۋ فورماتىنا جاقىن. قويىلىم رەجيسسەرى ۇلان احمەتوۆ, كومپوزيتورى تۇرسىنجان شاپاي. ال باستى بەينەنى قازاقستاننىڭ ەڭبەك سىڭىرگەن قايراتكەرى سافۋان رىسباي ۇلى سومداپ, كورەرمەندى اقىننىڭ جان دۇنيەسىمەن جۇزدەستىردى. ساحنادا وعان دارحان دۇيسەنوۆ, كۇنەكەي مۇحتارحان, اريزا اسقاروۆا, قاراقات شىنداۋلەت جانە اسەم مۇراتوۆا سەرىك بولدى.
«مۇقاعالي» مونوسپەكتاكلى – ومىرباياندىق بايانداۋ ەمەس, بۇل – اقىننىڭ جان الەمىنە ۇڭىلۋگە جاسالعان كوركەم تالپىنىس. ءبىزدىڭ ماقسات – كورەرمەنگە دەرەك ايتۋ ەمەس, سەزىم سىيلاۋ بولدى. مۇقاعالي پوەزياسى – تۇنىپ تۇرعان ەموتسيا, ىشكى داۋىس, ادام جانىنىڭ ارپالىسى. ساحنالىق شەشىمدەردى بارىنشا ىقشام ۇستاپ, ءسوز بەن ۇنسىزدىكتىڭ قۋاتىنا سۇيەندىك. سەبەبى مۇقاعاليدى ارتىق قيمىلمەن ەمەس, جۇرەكپەن وقۋ كەرەك. بۇل قويىلىم – اقىنمەن سىرلاسۋ, كورەرمەندى دە سول سىرلاسۋعا شاقىرۋ», دەيدى قويىلىم رەجيسسەرى ۇلان احمەتوۆ.
مونوسپەكتاكلدە ءسوز, ۇنسىزدىك جانە ىشكى ەموتسيا ۇندەسىپ, مۇقاعاليدىڭ ماحابباتقا, تاعدىرعا, ۋاقىت پەن جالعىزدىققا قاتىستى تەرەڭ تولعانىستارى پوەزيا تىلىمەن ءورىلدى. قويىلىمنىڭ ىقشام ءپىشىنى كوركەمدىك قۋاتتى السىرەتپەي, كەرىسىنشە, ءار ءسوزدىڭ سالماعىن ارتتىرا تۇسكەن. نەبارى قىرىق بەس مينۋتقا سىيعان ساحنالىق شەشىم كورەرمەندى ءبىر ساتكە دە بەيجاي قالدىرمادى.
قازاقستاننىڭ ەڭبەك سىڭىرگەن قايراتكەرى سايلاۋ قاميەۆ پوەتيكالىق جانردىڭ قازاق بولمىسىنا جاقىندىعىن اتاپ ءوتىپ, اكتەردىڭ مۇقاعالي پوەزياسىن ساحنادا «تىرىلتە» بىلگەنىن جوعارى باعالادى. ونىڭ ايتۋىنشا, قىسقا دا نۇسقا قويىلىم جۇرەككە جول تاباتىن اسەرىمەن قۇندى.
باستى ءرولدى سومداعان سافۋان رىسباي ۇلى بۇل جۇمىستى اقىن جان دۇنيەسىمەن سىرلاسۋ دەپ سيپاتتايدى. «مۇقاعالي – سارقىلمايتىن الەم. ءبىر كىتابىنىڭ وزىندە ادام ومىرىنە قاتىستى بارلىق تاقىرىپ بار. ءبىز سول تەرەڭ مۇحيتتىڭ ءبىر عانا تامشىسىن ۇسىندىق», دەيدى اكتەر.
كەش سوڭىندا جۇرتشىلىق ارتىستەرگە تىك تۇرىپ قوشەمەت كورسەتتى.
جەتىسۋ وبلىسى
