قىزىلشا – اۋا-تامشىلى جولمەن وتە جىلدام تارالاتىن جۇقپالى ۆيرۋستىق اۋرۋلاردىڭ ءبىرى. ءتيىمدى ۆاكتسينا بار بولعانىنا قاراماستان, ينفەكتسيا الەمدە دە, ەل ىشىندە دە ءالى تولىق جويىلعان جوق. دۇنيەجۇزىلىك دەنساۋلىق ساقتاۋ ۇيىمىنىڭ دەرەگىنە سايكەس, 2025 جىلى الەمدە شامامەن 247 مىڭ قىزىلشا جاعدايى تىركەلگەن.
ۆاكتسيناتسيا دەڭگەيىنىڭ تومەندەۋى – نەگىزگى قاۋىپ فاكتورى
ەپيدەميولوگتار اۋرۋدىڭ كوبەيۋىن بىرنەشە سەبەپپەن بايلانىستىرادى. ولاردىڭ قاتارىندا ۆاكتسيناتسيانىڭ تومەندەۋى, ەكپەدەن باس تارتۋ جاعدايلارىنىڭ ارتۋى, حالىق كوشى-قونى جانە COVID-19 پاندەمياسى كەزەڭىندە جوسپارلى ەكپەلەردىڭ كەشىگۋى بار.
قازاقستاندا 2025 جىلى اۋرۋشاڭدىق ايتارلىقتاي تومەندەگەنىمەن (شامامەن 7 ەسە), جىل سوڭىنا قاراي قايتا ءوسىم بايقالعان. بۇل ۇجىمدىق يممۋنيتەتتىڭ تۇراقتى دەڭگەيىن ساقتاۋدىڭ ماڭىزىن كورسەتەدى.
بالالار – ەڭ وسال توپ
قىزىلشا جۇقتىرعانداردىڭ باسىم بولىگى – بالالار. ناۋقاستاردىڭ شامامەن 83%-ى 14 جاسقا دەيىنگى بالالار بولسا, ولاردىڭ 70%-دان استامى – 5 جاسقا دەيىنگى سابيلەر.
سونىمەن قاتار, اۋىرعانداردىڭ 76,3%-ى ۆاكتسينا الماعاندار. ولاردىڭ ەلەۋلى بولىگى – اتا-اناسىنىڭ ەكپەدەن باس تارتۋىنا بايلانىستى ەگىلمەگەن بالالار.
ەپيدەميولوگيالىق احۋال اسىرەسە استانا جانە الماتى قالالارىندا, سونداي-اق بىرنەشە وڭىرلەردە كۇردەلى كۇيىندە قالىپ وتىر.
ۆاكتسيناتسيا شارالارى كۇشەيتىلدى
احۋالدى تۇراقتاندىرۋ ماقساتىندا ەلىمىزدە كەشەندى پروفيلاكتيكالىق شارالار جۇزەگە اسىرىلىپ جاتىر:
- بالالارعا جوسپارلى يممۋنداۋ جۇرگىزۋ;
- 6-11 ايلىق سابيلەرگە قوسىمشا ۆاكتسيناتسيا;
- 2-5 جاستاعى بالالارعا قامتۋشى ەكپە;
- 7-18 جاس ارالىعىنداعى جاسوسپىرىمدەرگە جەتپەگەن يممۋنداۋ;
- ەكپە مارتەبەسى راستالماعان 30 جاسقا دەيىنگى مەديتسينا قىزمەتكەرلەرىن ۆاكتسيناتسيالاۋ.
بۇل شارالار ۇجىمدىق يممۋنيتەتتى قالىپتاستىرۋعا جانە ينفەكتسيانىڭ تارالۋ تىزبەگىن ۇزۋگە باعىتتالعان.
قىزىلشا – الدىن الۋعا بولاتىن اۋرۋ
مامانداردىڭ ايتۋىنشا, قىزىلشا اسقىنعان جاعدايدا پنەۆمونيا, ورتاڭعى قۇلاقتىڭ قابىنۋى, ءتىپتى ەنتسەفاليت سياقتى اۋىر سالدارعا اكەلۋى مۇمكىن. دەگەنمەن, اۋرۋ تولىقتاي الدىن الۋعا بولاتىن ينفەكتسيا بولىپ سانالادى.
قازىرگى جاعداي قىزىلشانى باقىلاۋدا ۇستاۋ تىكەلەي ۆاكتسيناتسيا دەڭگەيىنە بايلانىستى ەكەنىن كورسەتەدى. پروفيلاكتيكالىق شارالاردى كۇشەيتۋ جانە ەكپەگە جاۋاپكەرشىلىكپەن قاراۋ ينفەكتسيانىڭ تارالۋىن ءتيىمدى تەجەۋگە مۇمكىندىك بەرەدى.
بالالاردى قىزىلشادان قالاي قورعاۋ كەرەك؟ دارىگەر كەڭەسىنە نازار اۋدارىڭىز
2026 جىلدىڭ I توقسانىنىڭ مونيتورينگ دەرەكتەرىنە سايكەس, قىزىلشاعا قارسى ككپ ۆاكتسيناسىمەن 1 جاستاعى 170 034 بالا (19,5%) جانە 6 جاستاعى 90 904 بالا (16,8%) ەگىلگەن.
