جايىق وزەنىنىڭ سۋى نەگە جاسىل؟

جايىق وزەنىنىڭ سۋى بىرنەشە جىلدان بەرى ارناسىنا تولماي كەلەدى. ەندى بۇل ازداي, ونىڭ سۋى ءاپ-ساتتە جاسىل تۇسكە بويالىپ شىعا كەلدى. ازىرگە بۇعان قاتىستى ناقتى قورىتىندى ايتىلا قويعان جوق. دەگەنمەن, اتىراۋ تۇرعىندارىن جايىق وزەنى سۋىنىڭ تازالىعى الاڭداتا باستادى. اۋەلى الەۋمەتتىك جەلىلەر ارقىلى قۇبىر بويىمەن ءار پاتەرگە جەتكىزىلەتىن اۋىز سۋ دامىندە جاعىمسىز ءيىستىڭ بارى حابارلاندى. ناقتىلاي ايتقاندا, سۋدا دۋستىڭ (زياندى جاندىكتەرگە قارسى قولدانىلاتىن ۋلى ۇنتاق) ءيىسى شىعاتىنى ايتىلدى. ارادا كوپ كۇن وتپەي جاتىپ, جايىق وزەنىنىڭ سۋى جاسىل تۇسكە ەنگەنى جۇرتشىلىقتىڭ الاڭداۋشىلىعىن ودان ءارى كۇشەيتە تۇسۋدە. وسىعان وراي «العاشقى بولجام بويىنشا بۇل بوياۋ ەمەس, ورگانيكالىق زات بولۋى مۇمكىن. قازىر ەكولوگيا دەپارتامەنتىمەن بىرلەسىپ, وزەن سۋىنان سىنامالار الىنۋدا», دەپ ءمالىم ەتتى اتىراۋ وبلىسى تابيعات قورعاۋ پروكۋرورىنىڭ كومەكشىسى جاقسىلىق ساكيموۆ جەرگىلىكتى «اقجايىق» گازەتىنە بەرگەن سۇحباتىندا. جولداسبەك شوپەعۇل, «ەگەمەن قازاقستان». اتىراۋ.