سورا ءوسىرىپ سورلادى

وڭاي ولجا ارقىلى تەز بايىپ كەتۋدى ارماندايتىندار از ەمەس. «جەڭىلدىڭ استىمەن, اۋىردىڭ ۇستىمەن» ءجۇرىپ, ماڭداي تەر, تابان اقىسىز قالتاسىن قامپايتقىسى كەلەتىندەر قاشاندا بولعان. دەگەنمەن, ونىڭ بارلىعى زاڭ بۇزۋشىلىققا اكەپ سوعادى. ناتيجەسى بەلگىلى. تەمىر توردىڭ ارعى بەتىنەن ءبىر-اق شىعادى. بۇگىندە رەسپۋبليكا اۋماعىندا «كوكنار» جەدەل-پروفيلاكتيكالىق شاراسى ءجۇرىپ جاتىر. بۇل ىسكە قىزىلوردالىق پوليتسەيلەر دە تىڭعىلىقتى كىرىسىپ كەتكەن. وسى شارا بارىسىندا ارال اۋدانى, جىڭىشكەقۇم اۋىلىنان شىعىسقا قاراي 45 شاقىرىم جەردە ەسىرتكى زاتىنا ۇقساس وسىمدىك ءوسىپ تۇرعان 5 القاپ انىقتالعان. تەكسەرۋ جۇمىستارى كەزىندە زاڭمەن تىيىم سالىنعان 3704 ءتۇپ سورا وسىمدىگىن كۇتىپ-باپتاپ جاتقان جەرىنەن 57 جاستاعى, 45 جاستاعى جانە 32 جاستاعى ءۇش ازامات ۇستالدى. القاپتاعى وسىمدىكتىڭ جالپى سالماعى 3 توننا 333 كيلونى قۇراعان. سونىمەن قاتار, سەزىكتىلەردىڭ جا­تىن ورىندارىنا ءتىنتۋ جۇرگىزۋ كەزىندە جالپى سالماعى 28 كيلو 77 ءتۇپ كەپ­تىرىلگەن سورا وسىمدىگى تابىلدى. انىق­تالعان ايعاق زاتتار پسيحوتروپتىق زاتتار مەن پرەكۋرسورلاردى زەرتتەۋ سوت-ساراپتاماسىنا جىبەرىلدى. قازىرگى تاڭدا اتالعان ءۇش ازاماتتىڭ ۇستىنەن قازاقستان رەسپۋبليكاسى قىلمىستىق كودەكسىنىڭ 300-بابى, 1-بولىگى بويىنشا قىلمىستىق ءىس قوزعالىپ, سوتقا دەيىنگى تەرگەپ-تەكسەرۋ امالدارى جۇرگىزىلۋدە. ءۇش ازامات تا ۋاقىتشا ۇستاۋ اباقتىسىنا قاماققا الىندى. ەرجان بايتىلەس, «ەگەمەن قازاقستان». قىزىلوردا وبلىسى.